Openbaring 3:14-22 – As iemand my stem hoor en die deur oopmaak, sal Ek ingaan na hom toe en saam met hom eet

13 Mei

Openbaring 3:14-22 – As iemand my stem hoor en die deur oopmaak, sal Ek ingaan na hom toe en saam met hom eet

¹⁴“Skryf aan die boodskapper van die gemeente in Laodisea: “Dit sê die Amen, die getroue en ware getuie, die begin van God se skepping, ¹⁵“ ‘Ek ken jou dade, dat jy nóg koud, nóg warm is. Was jy nou maar koud of warm! ¹⁶Maar omdat jy louwarm is – nóg warm, nóg koud – gaan Ek jou uit my mond spoeg. ¹⁷Omdat jy sê, “Ek is ryk, ek het skatryk geword, en het aan niks gebrek nie,” en nie besef dat jy ellendig en bejammerenswaardig, brandarm, blind en naak is nie, ¹⁸raai Ek jou aan om by My goud te koop wat deur vuur gesuiwer is, sodat jy ryk kan wees; en wit klere, sodat jy jou kan aantrek, en die skaamte van jou naaktheid nie sigbaar word nie; en salf om aan jou oë te smeer, sodat jy kan sien. ¹⁹Diegene wat Ek liefhet, berispe en tug Ek: Wees dan ywerig en bekeer jou! ²⁰Kyk, Ek staan by die deur en Ek klop. As iemand my stem hoor en die deur oopmaak, sal Ek ingaan na hom toe, en saam met hom eet, en hy saam met My. ²¹“ ‘Wie oorwin, sal Ek saam met My op my troon laat sit, net soos wat Ek ook oorwin het, en saam met my Vader op sy troon sit. ²²Laat dié wat ore het, luister na wat die Gees aan die gemeentes sê.’ ”

Die boodskap aan die gemeente van Laodisea is: “Bekeer julle,” die skerpste oordeel van Jesus aan die sewe gemeentes. Om die boodskap aan hulle te verstaan, is dit belangrik om hulle konteks te verstaan. Die mense van Laodisea was welvarend en voorspoedig, ‘n spilpunt vir die bankdienste in die streek. Die stad het ook in die vervaardiging van sagte, swart wol gespesialiseer waarvan luukse klere en matte gemaak is. Die stad was daarby ‘n leier in antieke medisyne. ‘n Mediese skool in die omgewing het ‘n oogsalf ontwikkel wat oral in die Grieks-Romeinse wêreld verkoop is. Hulle watervoorsiening was egter uiters swak. Die nabygeleë Hiërapolis was bekend vir sy natuurlike warmwaterbronne. ‘n Entjie ander kant was Kolosse wat ‘n standhoudende, koue, natuurlike rivier gehad het. Laodisea se naaste waterbronne was egter besoedel of ontoereikend. Om die probleem te bowe te kom, het Laodisea ‘n ondergrondse akwaduk gebou om water vir die stad te lewer. Maar op die roete van 8 km deur klip- en kleipype, het die water vuil en onaangenaam by die stad aangekom. Dit was nóg warm nóg koud. Die sentrale reservoir in die stad was gevolglik vuil en onwelriekend.

Dit is teen hierdie agtergrond wat ‘n mens die boodskap van Jesus aan hulle moet verstaan. Hy meet hulle aan hulle dade – die praktiese gevolge van hulle geloof in Hom – en bevind hulle louwarm, nóg warm nóg koud. Miskien het jy al die idee gehoor dat dit beter sou wees dat hulle koud was. Want, as hulle geestelik koud was, dan kon hulle nog tot bekering gelei word. Maar, dit is nie wat daar staan nie. Jesus sê, was julle maar koud of warm! Dan sou julle iets beteken het, soos die koue water van Kolosse of die warm water van Hiërapolis. Nou is hulle egter geestelik louwarm soos die water van Laodisea. Hulle is dus van geen nut vir die Here nie. Trouens, Hy gaan hulle uit sy mond uitspoeg. Soos louwarm water. Daarom raai Jesus hulle aan: Om eerder ryk in God te word – suiwer goud van Hom te koop; Om onberispelik te lewe – wit klere om hulle onsedelikheid te bedek; Om in geestelike insig toe te neem – salf vir hulle oë te koop. Dit was metafore wat spesifiek op die drie uitstaande kenmerke van die stad gemik was – die bankwese, die klerebedryf, en die mediese skool.

Die oplossing vir hulle was dus om God ywerig te begin gehoorsaam, aan sy stem gehoor te gee, die geestelike deur van hulle persoonlike en gemeentelike lewe vir Hom oop te maak en in gemeenskap met Hom te leef. Dan sal Hy inkom en met hulle gemeenskap hou. Natuurlik kon Laodisea aanstoot neem aan hierdie skerp boodskap. Jesus gebruik eintlik die dinge waarop hulle in hulle stad trots was, om hulle aan te spreek. En herinner hulle boonop aan die water wat hulle geweet het nie lekker gesmaak het nie. Jesus verduidelik egter vir hulle hoekom Hy so skerp is: “Elkeen wat Ek liefhet (phileō), bestraf en tugtig Ek!” Jesus sê daarmee dat Hy met hulle geassosieer is, dat Hy hulle Here is, en daarom doen Hy die moeite om hulle aan te spreek. Dit is wat God met sy kinders doen. Hierdie boodskap is daarom gerig aan die hele gemeente, maar die fokus is op enigiemand wat bereid is om te luister. Dit is net dié wat luister, wat oopmaak vir die stem van die Here Jesus, wat uiteindelik met Hom gemeenskap sal hê. Hy sal instap en saam met hulle eet. Jesus nooi ons hiermee uit tot ‘n aktiewe gemeenskap met Hom. Dit is hoe ons begin om aan ons doel te beantwoord. Soos warm of koue water. Enigiemand wat hierna luister, sal ervaar dat Jesus instap en sy intrek by hom of haar neem. Selfs al is dit ‘n boodskap wat deur ander in die gemeente geïgnoreer word. Vir diegene wat luister, wat hulleself voorberei om die Here Jesus te ontvang, wat Hom innooi, kom daar ‘n ekstra belofte – ‘n posisie van gesag in die koninkryk van God. Dié wat oorwin, sal Jesus saam met Hom op sy troon laat sit, net soos wat Hy ook oorwin het en saam met sy Vader op sy troon sit. En hulle sal deelneem aan sy heerskappy. Dit sal die oordeel oor die engele, soos Paulus aan die Korintiërs skrywe (1 Kor 6:3) en die oordeel oor die nasies, soos Johannes verder in Openbaring skrywe (Openb 20:4-6), insluit.

Lees meer (dit is my boek oor Openbaring wat jy gerus gratis kan aflaai om die hele Openbaring deur te werk): https://ngkerksomerstrand.co.za/wp-content/uploads/2020/05/Ek-kom-gou.pdf