Openbaring 14:1-13 – Die wat in die Here sterf, kan rus van hulle geswoeg, want hulle dade volg hulle

14 Mei

Openbaring 14:1-13 – Die wat in die Here sterf, kan rus van hulle geswoeg, want hulle dade volg hulle

¹Toe het ek gesien, en kyk, die Lam staan op die berg Sion, en saam met Hom is daar honderd vier-en-veertigduisend mense met sy Naam, en ook sy Vader se Naam, op hulle voorkoppe geskryf. ²En ek het ‘n geluid uit die hemel gehoor, soos die gedruis van baie waters en die gerammel van swaar donderweer. Die geluid wat ek gehoor het, het geklink soos dié van lierspelers wat hulle liere bespeel. ³Hulle het ‘n nuwe lied voor die troon en in die teenwoordigheid van die vier lewende wesens en die ouderlinge gesing. Niemand kon egter dié lied leer nie, behalwe die honderd vier-en-veertigduisend mense wat van die aarde losgekoop is. ⁴Hulle is die mense wat hulle nie met vroue besoedel het nie, omdat hulle kuis is. Hulle volg die Lam, waar Hy ook al gaan. Hulle is uit die mense losgekoop, as eerstelinge vir God en die Lam. ⁵En oor hulle lippe het geen enkele leuen gekom nie. Hulle is onberispelik. ⁶Toe het ek ‘n ander engel gesien wat hoog in die lug vlieg. Hy het ‘n ewige evangelie ontvang, om dit te gaan verkondig aan die aardbewoners, aan elke nasie en stam en taal en volk. ⁷Met ‘n harde stem het hy uitgeroep: “Julle moet ontsag hê vir God en heerlikheid bewys aan Hom, want die tyd van sy oordeel het aangebreek. Aanbid Hom wat die hemel, die aarde, die see en die fonteine geskep het.” ⁸Ná hom het ‘n ander engel, ‘n tweede een, gekom en uitgeroep: “Geval, geval het Babilon, die magtige, sy wat al die nasies van die wyn van die wellus van haar hoerery laat drink het.” ⁹Ná hom het ‘n ander engel, ‘n derde een, gekom en met ‘n harde stem uitgeroep: “As iemand die dier en sy beeld aanbid, en ‘n merk op sy voorkop of op sy hand ontvang het, ¹⁰sal hy ook drink van die wyn van God se toorn, wat onverdun in die beker van God se toorn geskink is. Hy sal ook in die teenwoordigheid van die heilige engele en die Lam met vuur en swael gefolter word.” ¹¹En die rook van hulle foltering bly opstyg vir ewig en ewig, en hulle wat die dier en sy beeld aanbid, kry dag en nag geen rus nie, ook nie hulle wat die merk van sy naam ontvang het nie. ¹²Hiervoor het die heiliges volharding nodig, hulle wat die gebooie van God nakom, en in Jesus bly glo. ¹³Ek het toe ‘n stem uit die hemel hoor sê: “Skryf neer! ‘Gelukkig is die dooies wat van nou af in die Here sterf.’ ” “Ja,” sê die Gees, “sodat hulle mag rus van hulle geswoeg, want hulle dade volg hulle.”

Openbaring 14 skets aan die eenkant die wonderlike toekoms van die gelowiges wat aan God getrou bly, sowel as aan die ander kant die afgryslike toekoms van die ongelowiges wat nie met ontsag vir God gelewe het nie en eerder die dier en sy beeld aanbid het. Dit is nog ‘n prentjie van die wederkoms van die Here Jesus Christus. Die 144 000 mense op Sionsberg is weereens, soos in hoofstuk 7, ’n simbool van die hele volk van God. Hulle het soos “maagde” op onberispelike wyse aan die Here Jesus getrou gebly in die geloofstryd en hulle nie met die wêreld besoedel nie (vgl Deut 23:9-10; 1 Sam 21:5; ook 2 Kor 11:2 waar die metafoor omgekeer word en die kerk as ‘n jongmeisie, ‘n “maagd” voorgestel word). Hulle sing ’n nuwe lied as die eiendom van die Lam in die teenwoordigheid van die vier lewende wesens en die 24 ouderlinge in die hemel. God se Naam en dié van die Lam is op hulle voorkoppe geskryf.

Waar die vorige tekening van die 144 000 na gelowiges verwys het wat nog midde-in die stryd op aarde is, word hulle hierdie keer as in die teenwoordigheid van die Here self en die ander hemelse wesens geteken. Daarmee dra dit die boodskap dat God in staat is om elkeen wat Hy gemerk het as sy eiendom, te bewaar vir die ewige heerlikheid. Die drie engele wat in hierdie perikoop die oordeel en verlossing wat God bring, aankondig regoor die wêreld, doen dit waarskynlik met die hoop op ’n moontlike inkeer van sommige, hoewel dit tog lyk asof die hoop beskaam. Die eerste engel verkondig die aanbidding van God as die Skepper. Die tweede engel verkondig die val van Babilon (Rome – vgl 1 Pet. 5:13 waar Rome direk só genoem word). Die derde engel verkondig die oordeel oor dié ongelowiges wat volhard in die aanbidding van die dier en sy beeld.

’n Grusame prentjie van foltering word aan die ongelowiges voorgehou, interessant genoeg, as waarskuwing vir die gelowiges om te bly volhard in die geloof en gehoorsaamheid. Elkeen wat die dier en sy beeld aanbid het en gemerk is met sy teken sal die wyn van God se toorn drink. Hy sal gepynig word met vuur en swael voor die heilige engele en voor die Lam. Dink jou in dié ewige straf in. Om bedags en snags geen rus te hê nie. Om altyd en ewig jouself te verwyt, het ek maar geluister. Die Gees roep daarenteen oor dié gelowiges ’n saligspreking uit van ewige rus. Hulle dade volg hulle. Dit is die heiliges wat volhard het in die gehoorsaamheid aan God se opdrag en die geloof in Jesus behou het.

Lees meer (dit is my boek oor Openbaring wat jy gerus gratis kan aflaai om die hele Openbaring deur te werk): https://ngkerksomerstrand.co.za/wp-content/uploads/2020/05/Ek-kom-gou.pdf