Matteus 28:16-20 – Ek is met julle al die dae, tot aan die voleinding van die tyd

7 Junie

Matteus 28:16-20 – Ek is met julle al die dae, tot aan die voleinding van die tyd

¹⁶Die elf dissipels het na Galilea gegaan, na die berg waarheen Jesus hulle ontbied het. ¹⁷Toe hulle Hom sien, het hulle Hom aanbid, maar sommige het getwyfel. ¹⁸Jesus het nader gekom en vir hulle gesê: “Aan My is gegee alle mag in die hemel en op die aarde. ¹⁹Gaan dan en maak dissipels van al die nasies, deur hulle te doop in die Naam van die Vader en van die Seun en van die Heilige Gees, ²⁰en hulle te leer om alles te onderhou wat Ek julle beveel het. En kyk, Ek is met julle al die dae, tot aan die voleinding van die tyd.”

Jesus ontmoet die elf oorblywende dissipels op die berg in Galilea waarheen Hy hulle ontbied het, waarskynlik na die episode by die see. Dit kan die berg wees waar Hy langs die See van Galilea die Bergrede gelewer het (Matt 5-7). Let op dat dit nie die berg is vanwaar Hy hemel toe is nie. Matteus vertel nie vir ons daarvan nie. Die berg van die Hemelvaart was die Olyfberg tussen Jerusalem en Betanië soos Lukas en Markus vertel. Sommige van die dissipels het Hom aanbid, terwyl sommige egter steeds getwyfel het.

Maar dit keer Jesus nie om aan hulle almal die Groot Opdrag te gee om die evangelie aan die hele wêreld te gaan verkondig nie. Hulle was nou getuies van die feit dat Jesus uit die dood opgestaan het en daarom gestuurdes wat deur God ingespan gaan word om die hele wêreld in te lig. Jesus verklaar dan dat Hy alle mag in die hemel en op aarde ontvang het en gee. En Hy werk deur sy dissipels om sy koninkryk te vestig. Hy stuur hulle nou om drie dinge te gaan doen: 1) Om dissipels van al die nasies te gaan maak. 2) Om hulle te doop in die Naam van die Drie-enige God, Vader, Seun en Heilige Gees. Die doop in die Naam van die Vader, Seun en Heilige Gees word die onderskeidingsteken van die volgelinge van Jesus wat alles onderhou wat Hy hulle beveel het. 3) Om hulle te leer om alles te gehoorsaam wat Jesus die dissipels beveel het.

En Jesus belowe daarby dat Hy met sy dissipels sal wees tot aan die einde van die wêreld. Dit is ‘n baie belangrike belofte. Maar, ook ‘n belofte wat ons goed moet verstaan. Soos die Heidelbergse Kategismus in vraag 47 hierop uitbrei, moet ons in gedagte hou dat Christus ware mens en ware God is. Wat sy menslike natuur betref, is Hy nie meer op aarde nie (vgl Hebr 8:4; Matt 26:11; Joh 16:28; Joh 17:11; Hand 3:21). Maar wat sy Godheid, majesteit, genade en Gees betref, gaan Hy nooit meer van ons af weg nie. Jesus sê immers in sy laaste gesprek met die dissipels: “Ek sal julle nie as weeskinders agterlaat nie; Ek kom weer na julle toe.” (Joh 14:18) Jesus sê dus nie net dat Hy die Gees stuur nie, maar dat Hyself na die dissipels (en ons) toe kom. En ons sien ‘n hele paar verhale in Handelinge van Jesus se verskyning, veral aan Paulus. Ursinus en Olivianus, die skrywers van die Heidelbergse Kategismus, antwoord dan die vraag wat ons moontlik kan hê (vraag 48): Maar as die mensheid nie oral is waar die Godheid is nie, word die twee nature in Christus dan nie van mekaar geskei nie? En antwoord: Nee, glad nie. (Die Geloofsbelydenis van Athanasius het dit immers alreeds gesagvol beantwoord: “34. En alhoewel Hy God en mens is, is Hy nogtans nie twee nie maar een Christus. 35. Hy is een, nie deur verandering van die Godheid in die vlees nie maar deur die aanneming van die mensheid in God. 36. Hy is in alle opsigte een, nie deur vermenging van die wese nie maar deur die eenheid van die Persoon. 37. Want soos die redelike siel en die vlees een mens is, so is God en mens een Christus.”) Daarom sê hulle: “Die Godheid kan immers deur niks ingeperk word nie en is orals teenwoordig” (Jer 23:24; Hand 7:49). En hulle sê dan so mooi: “Hieruit moet volg dat die Godheid wel buite sy aangenome mensheid is” (Kol 2:9; Joh 3:13; Joh 11:15; Matt 28:6), maar terselfdertyd “tog ook daarin is en persoonlik daarmee verenig bly.” Dit wil sê, Jesus is God en mens, tegelykertyd, verenig, met sy menslike natuur meer beperk, en sy Goddelike natuur onbeperk. Daarom is Hy in die hemel… EN by ons. Wat ‘n belofte!

Lees meer: https://bybelskool.com/matteus-28-jesus-staan-op-uit-die-dood-en-gee-die-groot-opdrag-aan-sy-dissipels/