Kan Satan jou gedagtes lees?
God weet wat ons dink, soos dit regdeur die Skrif bevestig word (Ps 139:4). So ook Jesus (Mark 2:8; Matt 9:4; 12:25; Luk 6:8; 11:17; Joh 2:25; 6:61; 1 Kor 3:20). Daarom werk Hy deur sy Woord ook diep binne ons om ons die waarheid te help onderskei (Hebr 4:12). Dit is ‘n goddelike eienskap.
Die Satan of duiwel en ander bose geeste is geskape wesens en daarom baie meer beperk in hulle vermoëns. Hulle kan nie gedagtes lees nie. Dit is net God wat die gedagtes van mense ken (1 Kon 8:39). Die duiwels is egter van die begin af betrokke by mense en hou hulle woorde en gedrag die hele tyd dop (Job 1:6-7). Hulle kan ons gedrag wel lees, en dit is baie keer genoeg!
Die Bose kan daarby wel deeglik ons gedagtewêreld beïnvloed. So verduidelik Jesus dit aan die nagmaalstafel: “die duiwel het dit al in die hart van Judas Iskáriot, die seun van Simon, ingegee om Hom te verraai.” (Joh 13:2). Lukas sê selfs dat die Satan in hom gevaar het (Luk 22:3). Dieselfde geld besetenheid deur demone en bose geeste.
Dit is waarom ons gewaarsku word om die volle wapenrusting van God aan te trek om ons te beskerm teen sy invloed (Ef 6:10-20). Dit sluit die beheer oor ons gedagtes (2 Kor 10:4-5) sowel as ons gedrag (Ef 4:27) in. Anders gee ons aan die duiwel ‘n vastrap plek in ons lewe.
Waar ons dus toegewy lewe as ‘n tempel van die Heilige Gees is ons weerbaar teen hierdie beïnvloeding en kan ons die duiwel se listigheid en versoekings oorkom.
Ansie Faure
Goeie middag Geseėnde van die Here, kan u asb vir my die name en betekenis van die Sewe Geeste van God gee volgens openbaring, baie dankie vir u leering en die woord wat elke dag op my tablet kom, Prys die Here vir mense soos u, het jy enige studie’s vir berading en Pastorale bediening. My man Johnny is blind en dit is sy begeerte met ‘n passie vir God en Sy woord, om meer en meer te weet,ek sy vrou Ansie doen al sy leeswerk en kontak per E-posse nogmaals baie dankie en groete.
Chris van Wyk
Hi Ansie. Ek het ‘n kort bydrae gemaak van my antwoord op jou vraag: https://bybelskool.com/sewe-geeste-van-god/
Machiel Odendaal
Chris, hoe moet ons dan Mat 13:19 interpreteer. My woorde: Die Bose kom by elkeen wat die woord hoor maar nie verstaan nie en vat weg wat in die hart gesaai is. In my opinie het die persoon nog niks gesê nie, net gehoor. Tog weet die Bose of die woord ontvang was of nie. Dit gee my ‘n indikasie dat die Bose iets verstaan van ons gedagtes.
Chris van Wyk
Die Bose verstaan verseker ons gedagtes, want hy kan uit ons gedrag aflei wat ons dink. Die vraag is maar net of hy dit kan hoor of nie. Ek dink nie so nie, behalwe as ‘n mens hom toelaat nie. Soos in die geval van Judas. ‘n Mens sou wel kon argumenteer dat hy nie iets uit iemand se hart kan wegneem as hy nie in die eerste plek weet wat daar aangaan nie. Maar, as dit ‘n woord is (getuienis bv) wat gehoor is, sou hy op grond daarvan kon optree en jou deur ander gedagtes of een of ander beïnvloeding van die saad wat gesaai is, kan beroof. Dan hoef hy dit nie noodwendig te gehoor het nie. Maar, ek is altyd oop vir oortuiging uit die Skrif uit. En jy het ‘n goeie argument.
Leon
Ek het vanoggend oppad kerk toe hierdie gesprek gehad met my vrou. Ek is bly oor die bevestiging wat jy gee. Ons eie verkeerde gadagtes kan dikwels die “satan” voorstel. Daarom sê Jakobus 1 vs 14 “Maar elkeen word versoek as hy deur sy eie begeerlikheid weggesleep en verlok word.
15 Daarna, as die begeerlikheid ontvang het, baar dit sonde; en as die sonde tot volle ontwikkeling gekom het, bring dit die dood voort.” Soos jy ook verwys na Ef 6 vs 10 – 18…die volle wapenrusting aantrek teen teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug. Ons stryd is nie teen vlees en bloed nie maar die liste vd duiwel.