Jeremia 28 – Die Here vee Gananja van die aarde af weg

Die teenstand van die profeet Gananja kom in dieselfde konteks van die priesters en die volk aan wie Jeremia se boodskap gebring het.  Let op dat dit in die vyfde maand van daardie jaar gebeur, want in die sewende maand van dieselfde jaar is die oordeel van die Here oor Gananja voltrek (vers 17).

Gananja, waarskynlik ’n Assiriër uit Gibeon, slaan Jeremia se woorde in die wind met ’n profesie dat Nebukadnesar binne 2 jaar verslaan sou word en die tempelgoedere sowel as koning Jojagin sou terugkeer.  In woorde wat duidelik gemik is teen Jeremia se simboliese juk, verklaar Gananja dat die Here die juk van die koning van Babel sal verbreek.

Jeremia antwoord dat hy dit ook graag só sou wou hê, maar die ongemaklike waarheid is dat die Here vas besluit het op die ballingskap.  As daar dan voorspoed sou wees, soos Gananja voorspel, moet dit op een of ander manier bewys word, anders is hy doodgewoon ’n valse profeet.

In die voortslepende onderonsies tussen dié twee – waarin Gananja onder andere ’n juk op Jeremia se nek as simbool van die stelligheid van sy boodskap, gebreek het, en Jeremia op sy beurt dít met ’n ysterjuk vervang het – is Gananja dood as gevolg van sy misleiding, soos Jeremia inderdaad voorspel het, skaars twee maande ná Gananja se eerste weerstand.

Weereens lees ons nie van enige reaksie van Sedekia nie.

Boodskap

Dit is maklik om ná die tyd wys te wees oor die woord van die Here. Om God se woord egter te verkondig vóór daar nog iets sigbaar is van God se beloftes, vat baie meer moed.  ’n Mens doen goed om nie in die Naam van die Here iets te verkondig, as jy nie wéét dit kom van Hom af nie.  Die omgekeerde is natuurlik ook waar. Ás jy iets hoor wat die Here wil hê dat mense moet weet, kan jy die verantwoordelikheid daarvan nie ontwyk nie.