Handelinge 11:1-18 – God gee ook aan heidene wat in Jesus glo die bekering tot die lewe

10 Mei

Handelinge 11:1-18 – God gee ook aan heidene wat in Jesus glo die bekering tot die lewe

¹Die apostels en die broers dwarsdeur Judea het gehoor dat ook die heidene die woord van God aanvaar het. ²Toe Petrus na Jerusalem opgegaan het, het diegene wat besny is, met hom geargumenteer ³en gesê: “Jy was by onbesnede mans aan huis en het saam met hulle geëet.” ⁴Daarop het Petrus dit soos volg stap vir stap vir hulle begin uitlê: ⁵“Ek was in die stad Joppe besig om te bid, en in ekstase het ek ‘n visioen gesien: iets soos ‘n groot linnedoek wat afsak en wat aan sy vier hoeke uit die hemel neergelaat word; en dit het tot by my gekom. ⁶En ek het aandagtig daarna gekyk, en opgemerk, en viervoetige diere van die aarde en wilde diere en kruipende diere, asook voëls van die hemel gesien. ⁷Ek het ook ‘n stem vir my hoor sê, ‘Staan op, Petrus, slag en eet!’ ⁸Maar ek het geantwoord, ‘Onder geen omstandighede nie, Here! Want niks wat besoedel of onrein is, het al ooit by my mond ingegaan nie.’ ⁹Die stem het toe ‘n tweede keer uit die hemel geantwoord, ‘Wat God rein gemaak het, mag jy nie as onrein beskou nie.’ ¹⁰Dit het drie maal gebeur, en toe is alles weer in die hemel opgetrek. ¹¹En kyk, skielik het daar drie mans wat van Caesarea af na my gestuur is, aangekom by die huis waar ons was. ¹²En die Gees het vir my gesê dat ek sonder aarseling saam met hulle moes gaan. Hierdie ses broers het toe saam met my gegaan en ons het die man se huis binnegegaan. ¹³Daarop het hy ons vertel hoe hy die engel in sy huis sien staan het wat vir hom sê, ‘Stuur manne na Joppe en laat haal Simon, ook bekend as Petrus. ¹⁴Hy sal vir jou ‘n boodskap meedeel waardeur jy verlos sal word – jy en jou hele huis.’ ¹⁵En toe ek begin praat, het die Heilige Gees op hulle neergedaal, net soos aanvanklik ook op ons. ¹⁶Ek het egter die woord van die Here onthou, toe Hy gesê het, ‘Johannes het wel met water gedoop, maar julle sal met die Heilige Gees gedoop word.’ ¹⁷As God dan aan hulle dieselfde gawe gegee het as aan ons wat in die Here Jesus Christus glo, wie was ek dan dat ek God sou verhinder?” ¹⁸Toe hulle dit hoor, het hulle geswyg en God verheerlik en gesê: “So het God dus ook aan die heidene die bekering tot die lewe geskenk.”

Die gebeure in Sesarea is van só ’n paradigma-skuiwende aard dat Petrus homself en die werk wat God onder die heidene (nie-Jode) gedoen het, moet gaan verantwoord teenoor die “moeder”-gemeente in Jerusalem. Dié werkswyse sou ’n patroon word wat later ook met die uitbreiding deur Paulus se sendingreise gevolg moes word, waar die seël van goedkeuring deur die gemeente in Jerusalem geplaas moes word op die oorsteek van nuwe grense met die evangelie (Hand 15). Dit is dan ook die begin van die idee van ’n verband van kerke soos deur die meeste gemeentes regdeur die wêreld gevolg word. ’n Mens sien hier ook die groot vraag oor die plek van die besnydenis wat gelowiges uit die Jodedom in Jerusalem bly vra het, iets wat wel later in Handelinge 15 se vergadering geantwoord is (dat besnydenis nie nodig was vir gelowiges uit die heidene nie – vgl ook Gal 2:3). Dit sou egter op baie plekke in die wêreld ’n sleutelkwessie tussen gelowiges uit die Jodedom en die heidendom bly.

Die bekering van die heidene word deur Petrus hier op twee maniere beskrywe. Aan die een kant word bekering met die aanvaarding / aanneming (letterlik ontvangs) van die woord (logos) van God (vers 1) beskrywe. Dws – bekering is iets wat gebeur met die luister na die woord van God wat lei na gehoorsaamheid. Bekering is dus iets waartoe jy instem, wat jy aangryp, wat jy doen. Jy verander jou lewe om in ooreenstemming te kom met God se woord. Maar, dit is net een kant daarvan. Die menslike kant van gehoorsaamheid.

Aan die ander kant word bekering ook as ’n bekering tot die lewe wat God gee beskrywe. Bekering is dus nie net iets wat jy doen nie waar jy omdraai van jou verkeerde lewenswyse en God se woorde aanneem wat in ‘n nuwe lewenstyl gestalte in jou lewe kry nie. Bekering is ook iets wat God jou gee. Natuurlik in reaksie op en as uitvloeisel van sy woorde. Maar, steeds ‘n geskenk. Let ook op dat bekering ook direk met die ontvangs van (doop met) die Heilige Gees verbind word wat hierdie punt onderstreep. Om die waarheid te sê, die doop met die Heilige Gees vind voor die doop met water plaas, soos ons in die vorige hoofstuk kan sien. Die doop met water is dus nie noodsaaklik vir die ontvangs van die Heilige Gees nie, want dit is God se gawe wat Hy op soewereine wyse uitdeel. Ons sien ook hier hoe God die bekering van die heidene nie net self aanvoer nie, maar dan op die koop toe deur Petrus laat verdedig by die leiers van die vroeë kerk. Soos Gamaliël vroeër al voorspel het in die Joodse Raad: “as hierdie plan of onderneming die werk van mense is, sal dit tot niet gaan; maar as dit van God af kom, sal julle hulle nie kan keer nie – moenie dat dit blyk dat julle teen God veg nie!” (Hand 5:38-39).

Lees meer: https://bybelskool.com/handelinge111-18-god-gee-aan-nie-jode-die-bekering-tot-die-lewe/