Efesiërs 1:15-23 – God se volheid vul alles in almal

26 Mei Hemelvaart

Efesiërs 1:15-23 – God se volheid vul alles in almal

¹⁵Om hierdie rede, omdat ek gehoor het van julle geloof in die Here Jesus en julle liefde vir al die heiliges, ¹⁶hou ek nie op om God oor julle te dank wanneer ek in my gebede aan julle dink nie. ¹⁷Dan bid ek dat die God van ons Here Jesus Christus, die Vader van die heerlikheid, vir julle dit sal gee: geestelike wysheid en openbaring, wat in die kennis van Hom bestaan, ¹⁸en dat die oë van julle harte verlig mag wees, sodat julle kan insien wat die hoop is wat sy roeping bied, wat die heerlike rykdom van sy erfenis vir die heiliges behels, ¹⁹wat die onvergelykbare grootheid van sy mag is, vir ons wat glo ooreenkomstig die werking van sy groot krag, ²⁰wat Hy uitgeoefen het in Christus, toe Hy Hom uit die dood opgewek het, en Hom laat sit het aan sy regterhand in die hemele, ²¹bo elke owerheid en gesag en mag en heerser, ja, bo enige naam wat genoem kan word, nie alleen in hierdie bedeling nie, maar ook in die toekomstige. ²²Hy het alles onder sy voete gestel, en Hom aan die kerk gegee, as Hoof oor alles, ²³die kerk wat sy liggaam is, die volheid van Hom wat alles in almal vul.

Efese was ‘n groot en belangrike stad in wat ons vandag ken as Turkye. Historici bereken dat daar ongeveer 250 000 mense gewoon het aan die begin van ons jaartelling. Die tempel van Artemis (vgl Hand 19), een van die sewe wonders van die antieke wêreld, was ook daar. Vandag is daar net ruïnes oor van Efese, naby die moderne stad Selçuk. Paulus begin sy brief aan hulle met ‘n gesprek met die gemeente wat uitmond in ‘n gebed. In dié gesprek loof hy God die Vader vir al die seëninge van die Gees wat daar in Christus Jesus aan ons gegee is (1:3-14). In sy gebed bid hy dat die gemeente van Efese God werklik sal kan ken (1:15-23).

Saam met die dankgebed aan God vir hulle geloof en liefde, bid Hy indringend dat God die hoop in hulle verder sal aanwakker. Dit is merkwaardig hoe baie kere Paulus oor hierdie drieling geloof, hoop en liefde skrywe – in ‘n sekere sin een van die kortste opsommings van waaroor dissipelskap gaan (1 Kor 13:13 en vele ander plekke in Paulus se briewe). Paulus hoor dus van hulle dat hulle geloof en liefde groei en dat mense daarvan praat, maar dat hulle sukkel met die vashou aan God se toekoms vir hulle. Daarom bid hy dat hulle geestesoë sal oopgaan om die hoop juis in drie goed te sien: 1) in hulle roeping hier en nou waarvoor hulle met al die geestelike seëninge in die hemel geseën is, 2) in hulle hemelse erfenis wat nie deur aardse gebeure geraak kan en sal word nie en 3) in die groot krag van God wat in hulle aan die werk is; ‘n krag wat met die opstanding en hemelvaart van Jesus Christus gedemonstreer is, en vir hulle as ‘n voorbeeld dien van wat God alles nog vir hulle kan doen.

Let op dat die posisie van Christus as: “hoog bo elke mag en gesag, elke krag en heerskappy” uitgespel word. Dit het volgens Paulus nie net betrekking op wat nou aan die gebeur is nie, maar sal selfs in die bedeling wat kom (die nuwe hemel en aarde) van krag wees. En dit is dié Jesus wat die hoof van die kerk is. Paulus sal later meer hieroor skryf, veral in hoofstuk 3 en dan weer in hoofstuk 6. En dan een van die rykste en wonderlikste uitsprake oor die kerk – vers 23 – “Die kerk is sy liggaam, die volheid van Hom wat alles in almal vervul.” ‘n Mens kan baie hieroor sê, maar dink net nou eers oor die een revolusionêre ding. Paulus sê hier dat die kerk deur God gebruik word “om alles in almal te vervul”. Dit is nie ‘n klein en onbelangrike belofte nie. Om die waarheid te sê, dit word beskrywe as iets wat reeds gebeur … en ons moet daarby inskakel.

Lees meer: https://bybelskool.com/efesiers-11-23-god-seen-ons-om-alles-in-almal-te-vervul/ – en hier is ‘n preek meer spesifiek vir Hemelvaart: https://ngkerksomerstrand.co.za/hulle-het-almal-eensgesind-in-gebed-volhard-handelinge-11-14-hemelvaart-2021/