1 Konings 9:1-5 – God se oë en hart sal altyd wees by dié wat voor Hom leef met ‘n eerlike en opregte hart

23 Februarie

1 Konings 9:1-5 – God se oë en hart sal altyd wees by dié wat voor Hom leef met ‘n eerlike en opregte hart

¹Pas nadat Salomo klaar was met die bou van die huis van die Here en die koninklike paleis, met alles wat hy beplan het, met alles wat hy graag wou doen, ²het die Here ‘n tweede keer aan Salomo verskyn, net soos Hy aan hom verskyn het by Gibeon. ³Die Here het vir hom gesê: “Ek het jou gebed, jou smeekbede wat jy pleitend voor My uitgespreek het, gehoor. Ek het hierdie tempel wat jy gebou het, geheilig deur my Naam vir altyd daar te vestig. My oë en my hart sal altyd daar wees. ⁴En jy, as jy voor My leef soos jou vader Dawid geleef het, met ‘n eerlike hart en in opregtheid, deur op te tree volgens alles wat Ek jou beveel, en my vaste voorskrifte en beslissings nakom, ⁵sal Ek jou koninklike troon oor Israel vir altyd laat standhou, soos Ek jou vader Dawid beloof het deur te sê, ‘Daar sal vir jou nooit iemand ontbreek op die troon van Israel nie.’”

Dit is opmerklik watter rol die herinneringe aan Dawid, en veral sy opregte hart, in die lewe van sy seun, Salomo, speel. Wanneer Salomo reg aan die begin van sy koningskap in gesprek is met die Here en hy terugdink oor sy pa Dawid se lewe sê Salomo van Dawid dat: “hy voor U geleef het in waarheid en geregtigheid, en ook met opregtheid van hart teenoor U.” (1 Kon 3:6) En dit word die motivering vir Salomo om van die Here te vra: “’n hart wat luister.” (1 Kon 3:9) En Salomo spel uit wat só ‘n hart beteken. Dit is met só ‘n hart wat hy sal kan slaag: “om as regter op te tree vir u volk, om te kan onderskei tussen goed en kwaad.” (1 Kon 3:9). Dit is dan presies wat die Here vir Salomo gee. ‘n Onderskeidingsvermoë, ‘n wyse en verstandige hart, ‘n hart soos sy pa, Dawid (1 Kon 3:11-12).

Wanneer Salomo die tempel inwy en in sy omvattende gebed die tempel aan die Here opdra, fokus hy ook op God se werk in hulle harte: “Mag die Here ons God met ons wees, soos Hy met ons voorouers was. Mag Hy ons nie verlaat nie, ons nie in die steek laat nie, sodat Hy ons harte na Hom sal wend om al sy paaie te volg en sy gebooie, vaste voorskrifte en bepalings na te kom wat Hy ons voorouers beveel het.” (1 Kon 8:57-58) En in vers 61: “En mag julle harte volkome by die Here ons God wees, deur sy vaste voorskrifte te volg en sy gebooie na te kom soos dit vandag is.” (1 Kon 8:61)

Hier verskyn die Here weer aan Salomo en maak die volgende belofte: “My oë en my hart sal altyd daar wees.” Wat ‘n ongelooflike toesegging. God wil met sy mense in gemeenskap lewe. Sy oë en sy hart sal altyd daar wees waar sy mense is. Maar, daar is een voorwaarde: “as jy voor My leef soos jou vader Dawid geleef het, met ‘n eerlike hart en in opregtheid, deur op te tree volgens alles wat Ek jou beveel, en my vaste voorskrifte en beslissings nakom.” (1 Kon 9:4-5) God se hart is daar vir dié wat Hom met ‘n eerlike hart en in opregtheid opsoek, wie se hart aan die Here behoort.

Lees meer (kyk aan die einde van ‘n preek oor 1 Samuel 16): https://ngkerksomerstrand.co.za/hoe-lyk-jou-hart-1-samuel-16/