LUKAS 1:57-66 – Johannes die Doper word gebore tot ontsag van almal wat dit gehoor het

⁵⁷Vir Elisabet het die tyd gekom om geboorte te gee, en sy het geboorte gegee aan ’n seun. ⁵⁸En haar bure en familielede het gehoor dat die Here aan haar sy groot barmhartigheid bewys het, en hulle was saam met haar bly.

⁵⁹En dit het gebeur op die agtste dag dat hulle gekom het om die kind te besny, en hulle wou hom Sagaria noem volgens die naam van sy vader. ⁶⁰Maar sy moeder het geantwoord en gesê: “Nee, hy moet eerder Johannes genoem word.”

⁶¹En hulle het vir haar gesê: “Daar is niemand van jou familielede wat met hierdie naam genoem word nie.” ⁶²Hulle het vir sy vader beduie wat hy wou hê hy genoem moes word. ⁶³En hy het ’n skryftablet gevra en geskryf: “Johannes is sy naam.” En hulle was almal verbaas.

⁶⁴Skielik is sy mond en sy tong geopen, en hy het gepraat en God geprys. ⁶⁵En ontsag het oor almal gekom wat rondom hulle gewoon het, en in die hele heuwelland van Judea is al hierdie gebeure bespreek, ⁶⁶en almal wat dit gehoor het, het dit in hulle hart gebêre en gesê: “Wat sal hierdie kind dan wees?” Want die hand van die Here was inderdaad met hom.

Teks en konteks

1:57-63 Hierdie gedeelte gaan oor die vervulling van die belofte aan Sagaria, en sy profesie net hierna oor die Verlosser en sy Voorloper. God se barmhartigheid was dus baie groter as maar net die gawe van ‘n kind aan ‘n kinderlose. Hy het ‘n gawe gegee vir die mensdom, ‘n kind wat die voorloper, die wegbereider vir die Messias, die Verlosser van die wêreld sou wees. Johannes die Doper.

1:64-66 Let op hoe die wonder wat God doen, uitkring. Wat in die privaatheid van die tempel aangekondig is, gekoester is deur Elisabet en die naby familie, het hier met die geboorte van Johannes ’n publieke effek op die bure, die gemeenskap en selfs in die wyer landstreek van Judea. Johannes se geboorte lei dus tot groot vreugde en ontsag in die publiek vir wat God doen. Die wonders van God is bedoel as publieke tekens van sy goedheid en mag.

Dit tref my hoe Lukas skryf dat dit duidelik was dat die Here by Johannes was, iets wat na Pinksterdag eintlik elke kind van God se deel sou wees.

Betekenis en boodskap

1. Ons dink baie keer dat ons lewe nie ‘n groot invloed het nie. Sagaria se verhaal wil ons verbeelding wakker maak. Die getuienis van ‘n gehoorsame lewe het ‘n rimpeleffek in die hele gemeenskap. Dit roer harte en verander lewens. Toe. En vandag nog.
2. Dink spesifiek na oor die hand van die Here wat ook met jou is. In die verlede. En vandag. Loof die Here daarvoor en gebruik dit in jou gebede vir jou toekoms.