JESUS SE GEBOORTE – LUKAS 1:1-4 – Die verhaal van Jesus Christus is betroubaar

1Aangesien baie onderneem het om ’n verhaal op te stel oor die dinge wat onder ons tot vervulling gekom het, 2net soos hulle wat van die begin af ooggetuies en bedienaars van die Woord geword het dit aan ons oorgelewer het, 3het dit ook vir my goed gelyk om alles van die begin af noukeurig te ondersoek en dit in volgorde vir u te skryf, geagte Teofilus, 4sodat u kan weet dat die dinge waaroor u onderrig is, betroubaar is.

Teks en konteks

1:1-2 Dit is belangrik om drie goed in vers 1-2 te hoor :

• dat Lukas skryf oor die dinge wat onder hulle vervul is, dws dinge wat reeds vasstaan, wat deur enigiemand nagegaan kan word;
• dat Lukas hiermee sekerheid kan bring rondom die verhaal van Jesus, omdat sy navorsing gebaseer is op ooggetuies (veral Markus, maar ook Matteus, soos ons uit ’n vergelyking van hulle evangelies kan agterkom) asook op
• dié wat bedienaars van die Woord geword het.

Die evangelie van Lukas is dus op die verhale van ooggetuies en aktiewe “bedienaars van die Woord” (Verbi Dei Minister – VDM – ‘n titel wat ons vandag nog baie keer vir leraars gebruik) gebaseer.

1:3-4 Lukas se bydrae was dus om te sorg, so lui dit in vers 3-4, dat hy alles noukeurig, van die begin af, in volgorde ondersoek en verwoord. Dit moes daarby natuurlik ook in ooreenstemming wees met die dinge waaroor Teofilus reeds onderrig is, maar wat met Lukas se bydrae verder bevestig kan word. Daarmee sou Lukas verseker dat die verhaal van Jesus betroubaar geag, geglo en geleef kan word.

Betekenis en boodskap

Dink aan hoeveel waarde vandag nog aan ooggetuies geheg word om die waarheid van iets te bevestig. Lukas verseker ons dus dat die evangelie van Jesus Christus wat ook aan ons verkondig is, betroubaar is. Ons kan dit as waarheid neem en ons lewe daarop bou.