Handelinge 16:16-40 – Glo in die Here Jesus, en jy en jou hele huishouding sal verlos word

27 Mei

Handelinge 16:16-40 – Glo in die Here Jesus, en jy en jou hele huishouding sal verlos word

¹⁶Terwyl ons ‘n keer op pad was na die bidplek, het ‘n slavin met ‘n gees van waarsêery wat met haar voorspellings baie wins vir haar eienaars ingebring het, ons tegemoet gekom. ¹⁷Sy het agter Paulus en ons aan geloop en aanhoudend geskreeu: “Hierdie mense is diensknegte van God, die Allerhoogste! Hulle verkondig aan julle ‘n weg tot verlossing!” ¹⁸Dit het sy dae aaneen gedoen. Paulus het daaroor ontsteld geraak, omgedraai en vir die gees gesê: “Ek gebied jou in die Naam van Jesus Christus om uit haar uit te gaan!” En presies op daardie oomblik het die gees uitgegaan. ¹⁹Toe haar eienaars merk dat hulle hoop op ‘n inkomste daarmee heen was, het hulle Paulus en Silas gegryp en hulle na die markplein gesleep tot voor die owerhede; ²⁰en nadat hulle hulle voorgebring het, het hulle vir die stadsbestuurders gesê: “Hierdie mense stook onrus in ons stad, want hulle is Jode ²¹en verkondig gebruike wat vir ons as Romeine nie toelaatbaar is om te aanvaar of na te volg nie.” ²²Die skare het toe ook teen hulle gedraai, en die stadsbestuurders het hulle klere laat afskeur en beveel dat hulle met stokke geslaan moet word. ²³Nadat hulle met baie houe geslaan is, is hulle in die tronk gegooi, en is die tronkbewaarder opdrag gegee om hulle baie goed te bewaak. ²⁴In die uitvoering van hierdie opdrag het hy hulle in die binneste deel van die tronk gegooi en hulle voete in die blok vasgeklem. ²⁵Om middernag was Paulus en Silas besig om te bid en tot lof van God te sing, en die gevangenes het na hulle geluister. ²⁶Skielik was daar ‘n hewige aardbewing, sodat die fondamente van die tronk geskud het. Al die deure het onmiddellik oopgegaan, en almal se boeie het losgegaan. ²⁷Die tronkbewaarder het wakker geskrik, en toe hy sien dat die tronk se deure oop was, het hy sy swaard getrek en wou homself doodmaak, omdat hy gedink het dat die gevangenes ontsnap het. ²⁸Maar Paulus het hard uitgeroep: “Moenie jouself leed aandoen nie, want ons is almal hier!” ²⁹Die bewaarder het vir lig gevra, ingestorm en bewend voor Paulus en Silas neergeval. ³⁰Hy het hulle na buite gelei en gesê: “Menere, wat moet ek doen om verlos te word?” ³¹En hulle het geantwoord: “Glo in die Here Jesus, en jy en jou hele huishouding sal verlos word.” ³²Hulle het toe die woord van die Here aan hom en almal in sy huis verkondig. ³³En hy het hulle op daardie uur van die nag saamgeneem en hulle wonde gewas. Hy en al sy mense is onmiddellik gedoop. ³⁴Hy het hulle na sy huis geneem en ‘n ete voorgesit. Hy en sy hele huishouding was jubelend, omdat hulle tot geloof in God gekom het. ³⁵Teen dagbreek het die stadsbestuurders die geregsdienaars gestuur met die opdrag: “Laat daardie mense vry!” ³⁶Die tronkbewaarder het die boodskap aan Paulus oorgedra: “Die stadsbestuurders het laat weet dat julle vrygelaat moet word. Kom dan nou uit en gaan in vrede!” ³⁷Maar Paulus het die geregsdienaars geantwoord: “Hulle het ons sonder verhoor in die openbaar laat slaan en in die tronk laat gooi, alhoewel ons Romeinse burgers is, en nou wil hulle ons stilletjies uitgooi? Beslis nie! Laat hulle ons self kom uitlei.” ³⁸Die geregsdienaars het hierdie boodskap aan die stadsbestuurders oorgedra. Toe hulle hoor dat Paulus en Silas Romeinse burgers is, het hulle bang geword. ³⁹Hulle het hulle om verskoning kom vra, hulle uitgelei en versoek om die stad te verlaat. ⁴⁰Toe hulle uit die tronk kom, het hulle na Lidia se huis gegaan. Daar het hulle die broers gesien, hulle moed ingepraat en vertrek.

Die slavin met ‘n gees van waarsêery is die eerste teenstand wat Paulus en Silas in Filippi ondervind. Die woord wat gebruik word vir die waarsêergees, is puthon-gees. Die Puthon was die mitologiese slang of draak wat die orakel of tempel van Delphi bewaar het en deur Apollo doodgemaak is. Blykbaar het mense onder die invloed van dié gees met buikspraak gepraat, dws sonder dat hulle lippe beweeg het. Maar, Paulus dryf, na ‘n paar dae, die gees uit haar uit, wat waarskynlik beteken dat sy by die huiskerk van Lidia aangesluit het. Die reaksie op die eerste hindernis, die slawemeisie, demonstreer op geen onseker wyse nie, dat God sterker is as die magte van die duisternis. Maar die oorlog het natuurlik nog net begin!

Met die konsternasie wat haar eienaars vir Paulus veroorsaak, want die slavin het nou nie meer geld met haar voorspellings ingebring nie, verskerp die teenstand en word hulle erg verneder en geslaan en in die tronk gegooi. Net om daar ‘n volgende bekeerling vir die gemeente te werf, die tronkbewaarder. “Glo in die Here Jesus, en jy en jou hele huishouding sal verlos word!” Hy en sy huishouding (oikos) word gedoop en Paulus-hulle word in ‘n volgende huis gasvry ontvang. Jesus red die tronkbewaarder van sy selfmoord gedagtes en daarby ook sy huishouding tot geloof in Hom. Die tweede hindernis, die stadsbestuur wat Paulus en Silas in die tronk gooi, word dus nie net oorkom deurdat die aardbewing die deure van die tronk oopforseer nie, maar die tronkbewaarder self kom tot bekering, hy en sy hele huishouding.

Aan die einde van die verhaal, sien ons dat hulle almal (“broers” was die benaming vir die geloofsgemeenskap) weer bymekaar kom in Lidia se huis. En die grondslag vir die eerste gemeente in Europa is gelê. Paulus sou hulle nog twee keer besoek (Hand 20:1 en 6) en uiteindelik die pragtige brief aan die Filippense skryf vanuit die tronk in Rome. En hulle sou hom die meeste kere ondersteun van alle gemeentes wat Paulus ooit gestig het. Die eerste lidmate van hierdie pragtige gemeente begin dus hulle geloofspad saam in die huis van Lidia en word die grootste ondersteunersgroep van Paulus in die res van sy bediening.

Lees meer: https://bybelskool.com/handelinge-166-40-die-europese-kerkgeskiedenis-begin-met-die-bekering-van-n-vrou/