Ek begin 13 Oktober met die eerste bydraes om ’n inleiding op die Psalms te gee.  In die gemeente Somerstrand sal ek dit die 19de Oktober bespreek by ons byeenkoms in die ARK om 18:30.

Van die 20ste Oktober begin ek met Psalm 1 en ons maak DV klaar die 28ste November met Psalm 41, waarna ek ’n terugblik gaan gee op die 29ste November veral met verwysing na Psalm 1 (en 2), die inleiding op die hele Psalmboek.

Onthou om te registreer om die bydraes per e-pos te ontvang.

Welkom!

Ek plaas hierdie week ‘n paar inleidende bydraes in voorbereiding vir ons leeswerk in die Psalms:

• (vandag) Donderdag 13 Oktober – Indrukwekkende versameling geestelike liedere
• Vrydag 14 Oktober – Psalms ingedeel in vyf Psalmboeke
• Maandag 17 Oktober – Historiese raamwerk
• Dinsdag 18 Oktober – Teologiese temas, soorte Psalms en Jesus in die Psalms
• Woensdag 19 Oktober – Samestelling van Psalms 1-41, leesplan en Lectio Divina

Geniet!

Indrukwekkende versameling geestelike liedere

Elke Psalm is aanvanklik onafhanklik geskrywe om uitdrukking te gee aan die Godsbelewenis van individue sowel as die gemeenskap van gelowiges, soos bv. nodig was in die tempel liturgie (1 Kron 25).  Meesal word God self aangespreek, hoewel die gemeenskap van gelowiges ook soms aangespreek word (Psalm 33, 37), selfs onderrig word (Psalm 1), en sommige liedere dele bevat wat ook as selfgesprek bedoel is (Psalm 42:6,12; 43:5).  Elke Psalm het dus ’n eie betekenis en perspektief op die ervarings met en van God.

Interessant genoeg is die individuele Psalms nie lukraak opgeneem in die Psalmboek nie.  Die Psalms is versamel en in 5 boeke of bundels ingedeel: 1-41; 42-72; 73-89; 90-106; 107-150.

• Boek 1-2 (Psalms 1-72) is opgebou uit veral die Dawidiese Psalms wat uit die tyd van die konings kom tot en met die ballingskap – ongeveer die 11de tot 6de eeue vC, met Psalm 1 as inleiding.  Die inhoud reflekteer dus die temas van lof en (veral) klag, soos dit verband gehou het met die wel en weë van die volk in daardie tyd, altyd geskets teen die agtergrond van God se oneindige goedheid en sorg vir die volk.
• Boek 3 (Psalms 73-89) veronderstel meesal die ballingskap en val van Jerusalem – 6de eeu vC – met die vrae en dreigende wanhoop wat dit in die lewe van die volk opgeroep het.  Dit is diep en donker wroeginge oor die toekoms, waarin die voorspoed van die onregverdiges en goddeloses tot baie vrae en worstelinge aanleiding gee.  Ons vind hier dus meesal Klaagpsalms met Psalm 73 die inleiding wat die tema van twyfel eerlik op die tafel sit, weliswaar met die uiteindelike boodskap dat twyfel wel in die nabye teenwoordigheid van God tot rus kom.
• Boek 4 (Psalms 90-106) fokus op Jahwe se koningskap ten spyte van die problematiek van die Dawidiese koningshuis, met ’n appèl aan Jahwe om die ballinge weer terug te bring na Jerusalem (Ps 106:47).  Psalm 90, die Psalm van Moses, kan natuurlik baie vroeër wees en lei die tema van God as toevlug van geslag tot geslag in.  Hier is dus veral Lofpsalms.
• Boek 5 (Psalms 107-150) werk met die veronderstelling dat die terugkeer uit ballingskap al plaas gevind het (Ps 107:2-3), en loof God vir sy heerskappy oor die nasies (Ps 108) en fokus op die toekoms wat deur Hom moontlik word vir die volk.  Psalm 107 funksioneer as ’n inleiding vir hierdie deel en loof die Here vir sy goedheid en liefde waaraan daar geen einde is nie.  Die meeste Lofpsalms kom dus in hierdie deel voor.

Teologiese temas

• Gemeenskap met God – die Psalms werk met die veronderstelling dat gemeenskap met God die begin en die sin van die lewe is.  Enigiets wat die kwaliteit en ervaring van die gemeenskap met God bedreig of in gevaar stel, bedreig die lewe self.  God – Jahwe – is die sentrum van die lewe, die sentrum van alles wat bestaan.  Om Hom die sentrum van jou eie lewe en dié van jou mense te maak, is daarom die enigste pad na ware geluk, soos Psalm 1 dit so treffend beskrywe, en wat ’n inleiding is vir die hele Psalmboek.  God se wese word daarom in vele Psalms in gloeiende en oortreffende trappe van vergelyking beskrywe, waarin veral sy liefde en getrouheid, sy barmhartigheid en goedheid, en sy regverdigheid en betroubaarheid uitstaan.  Selfs wanneer daar twyfel is, en die donker dele van die lewe in die oë gestaar moet word, word sin gevind in die nabye teenwoordigheid van God (Psalm 73).