Ek het ‘n navraag gekry oor gebed. Is dit werklik moontlik om die Here suiwer te aanbid en vir ander in te tree? Hoe kry ons dit reg om vir meer te bid as maar net ons eie belang?

Dit is ‘n vraag wat my roer. Want, dit is so dat ons gewoonlik bid vanuit ons eie visie op wat om ons aangaan. Dat ons eie belange ons motiewe om te bid beïnvloed.

Ons het twee Voorbidders!

Gelukkig is dit iets wat ook die Here se hart roer! Dit is waarom Hy ons uitnooi om, met ons eie beperkinge, Hom te nader en met danksegging en smeking te bid (Fil 4:4-7).

Soos ‘n Abraham van ouds sal ons ervaar, dat al vra ons dat die Here Sodom en Gomorra spaar ter wille van die moontlikheid van 10 regverdiges, en daar uiteindelik minder is, en ons kan dink dat die Here die gebed nie sal beantwoord nie, die Here tog die onuitgesproke gebed verhoor, dat Lot en sy mense veilig sal wees (Gen 19).

Nog belangriker, Jesus is die eerste Voorspraak (1 Joh 2:1) en Voorbidder, want Hy tree vir ons in by God sy Vader (Hebr 7:25; 9:24). Hy is namens ons en vir ons in die hemel.

Daarmee saam, die Heilige Gees is die tweede of ander Voorspraak of Trooster (Joh 14:16) wat by ons bly en wat ook ons Voorbidder is wat in ons bid volgens God se wil (Rom 8:26-28). Hy omvorm ons gebede om Godvererend te wees.

Gebruik die Skrif!

Wat ons verder kan help om uit ons selfgerigtheid te kom, is om die Skrif self te gebruik om te bid.

• Die Ons Vader (Matt 6:9-13),
• Die Liefdesgebed (Ef 3:14-21),
• Die Gebed vir die heiliges (Ef 6:18),
• Die Gebed vir die evangelie (Kol 4:3),
• Die Gebed te alle tye (1 Tess 5:17),
• Die Gebed van die gemeente (1 Tim 2:8),
• Die Gebed vir Wysheid (Jak 1:5).

Ag en só kan aangaan! Lees hier meer oor Nehemia se tien gebede, om maar net een voorbeeld uit die OT te noem.

Die belangrikste praktiese riglyn is egter die Psalms. Daar is gebede vir elke enkele geleentheid, met beloftes vir elke behoefte.

Bid die Psalms!

Elke Psalm is ‘n gebed of gebede op sy eie. Kies een wat met jou perspektief ooreenkom, en gebruik die woorde wat God vir ons gegee het om te bid, bv (net in die eerste 8 Psalms):

Psalm 1 is ’n wysheidsPsalm, lei die hele Psalmboek in en vestig die basiese veronderstelling van die Psalmboek, dat die sin en betekenis van alles in God self gevind word. Wysheid begin by die fokus op God en sy woorde. Ons persoonlike verhoudinge met God het vreugde en voorspoed tot gevolg.

Bid aan die hand daarvan dat ons almal in God bevestig sal word.

Psalm 2 is ’n koningsPsalm wat waarskynlik by die troonbestyging van die koning gesing is. Dit bevestig God se heerskappy in die geskiedenis deur sy Gesalfde (=Messias), sy Seun, wat in OT na die koning verwys, en in die NT as begronding dien van die perspektief op Jesus as die Christus (=Messias), die Seun van God, en deur sy opstanding ook Here (=Jahwe), soos dit in Petrus se toespraak op Pinksterdag uitgespel word (Hand 2). Psalm 2 is daarom ’n ongelooflike belangrike sleutel om die betekenis van Jesus in die NT te ontsluit. Dit bevestig ook dat ons God kan vertrou vir die publieke en politieke lewe.

Bid dat ons vrede in ons land sal hê sodat ons God kan dien.

Psalm 3-7 is ’n eerste siklus van vyf klaagpsalms waarin die getroue God om hulp gesmeek word van vyande (Psalm 3,5,7), droogte (Psalm 4) en siekte (Psalm 6).

Gebruik dié Psalms om vir verlossing van vyande, droogte en siekte te bid.

Psalm 8 is ’n lofpsalm vir die majestueuse Skepper vol van ontsag vir die feit dat Hy besorg is oor en omgee vir mense, wat hulle waardigheid bevestig ten spyte van hulle nietigheid. Daarmee word die eerste siklus klaagpsalms afgesluit.

Gebruik dié Psalm om die Here te loof vir sy omgee vir ons.

Een van die groot vrae in verband met die Psalms is wat ons as volgelinge van Jesus Christus moet maak met die wraakgierige houding teenoor die vyande soos baie keer grafies in die Psalms uitgespreek word. Ons vind dit nie net in die sogenaamde “vloek”-Psalms nie (bv Ps 35; 59; 69; 109), maar ook in talle ander Psalms, trouens in talle ander gedeelte regdeur die Bybel.

Hoekom is sulke gedeeltes ingesluit in die Bybel? Is dit steeds aanvaarbaar om dié tipe “vloek“-Psalms te bid? Veral as ons Jesus se opdrag om ons vyande te seën in ag neem?

Ek hou baie van die beginsel wat Marvin Tate gebruik in sy aanpak van die “vloek”-Psalms. Hierdie beginsel kan vir alle moeiliker gedeeltes in die Bybel gebruik word. Hy sê:

“In the appropriation of this language into the life of faith it is well to begin with a framework of understanding rather than with an apology in the sense of an effort to explain away the disturbing elements.” (Psalms: Word Biblical Commentary).

Ons moet dus altyd eerder probeer om die vervloekinge te verstaan as te verdoesel. Ons moet die versoeking weerstaan om die moeiliker gedeeltes in die Bybel weg te verklaar in ‘n misplaaste poging om die res van die Bybelse boodskap te verdedig. Dit lei altyd onvermydelik tot ‘n reduksie van die boodskap van die geheel van die Bybel en ‘n wantroue in die gesag daarvan.

Hier is vier opmerkings vir jou nadenke om die vervloekinge in die Bybel beter te verstaan:

“If you can dip your pens into your hearts, appealing in earnestness to the Lord, you will write well; and if you can gather your matter on your knees at the gate of heaven, you will not fail to speak well. Prayer, as a mental excercise, will bring many subjects before the mind, and so help in the selection of a topic, while as a high spiritual engagement it will cleanse your inner eye that you may see truth in the light of God. Texts will often refuse to reveal their treasures till you open them with the key of prayer.”

From Charles Spurgeon: “The Preacher’s Private Prayer” in Lectures to my Students, Lecture 3.