1 Petrus 4:12-19 – Die seën van God rus op dié wat ter wille van Christus beledig word

11 Augustus

1 Petrus 4:14 – Die seën van God rus op dié wat ter wille van Christus beledig word

¹²Geliefdes, moenie verbaas wees wanneer ‘n vurige beproewing oor julle kom, asof iets vreemds met julle gebeur nie; ¹³wees eerder bly, namate julle deel het aan die lyding van Christus, sodat julle ook by die bekendmaking van sy heerlikheid uitbundig sal kan jubel. ¹⁴As julle ter wille van Christus se Naam beledig word – gelukkig is julle, omdat die Gees van heerlikheid, dit is die Gees van God, op julle rus. ¹⁵Niemand van julle moet immers as moordenaar of dief of kwaaddoener of bemoeisieke ly nie; ¹⁶as iemand egter ly omdat hy ‘n Christen is, moet hy hom nie skaam nie, maar God verheerlik op grond van hierdie Naam. ¹⁷Dit is immers tyd dat die oordeel begin, en wel by die huishouding van God. As dit by ons begin, wat sal dan die uiteinde wees van hulle wat aan die evangelie van God ongehoorsaam is? ¹⁸Want: “As die regverdige beswaarlik verlos word, wat sal van die goddelose en sondaar word?” ¹⁹Dus moet ook hulle wat, in ooreenstemming met die wil van God, ly, hulle lewe aan die getroue Skepper toevertrou deur te doen wat goed is.

Ons standvastigheid in lyding lê geleë in die insig in die redes vir en doel van lyding, sodat ons dit nie as iets vreemds sal interpreteer nie, maar as iets wat die belofte inhou dat God se seën juis dán op ons rus. Die uitkoms van onregverdige lyding: “ter wille van Christus se Naam,” óf doodgewoon die feit dat iemand ly: “omdat hy ‘n Christen is,” dra by tot die verheerliking van God se Naam. Dit is sy belofte aan ons. Dit wys dat die Gees van God op ons rus. En dit is iets waaroor ‘n mens kan bly wees.

Die 1983-vertaling het in vers 19 die lyding geïnterpreteer met die vertaling as dat dit gebeur: “omdat God dit wil“. Dit kan egter beter vertaal word as: “vanweë God se wil” of soos die 2020-vertaling dit het: “in ooreenstemming met die wil van God.” Dit gee ‘n ander betekenis aan die lyding wat meer hoopvol is. Dit is nie dat God besluit dat ons moet ly nie. Petrus verwys hier na lyding omdat ons God se wil doen. Dit is waarom ons op sulke lyding nie met aggressie en onbegrip moet reageer nie, maar steeds moet voortgaan om God se wil te doen, terwyl ons ons lewe aan God toevertrou en veral aanhou om goed te doen! Weereens word dit ook begrond in die voorbeeld van die Here Jesus Christus. Ons het op dié manier deel aan sy lyding. En ons het die versekering en vreugde dat lyding op paradoksale manier bewys dat die Gees van heerlikheid, die Gees van God, op ons rus. Dit is beter om in dié lewe deur die smeltkroes van lyding te gaan en in die proses al hoe nader aan God te kom, as om die lyding te probeer vermy deur aan God ongehoorsaam te word. Dán bly slegs die vrees vir die ewige dood.

Petrus draai nie doekies om nie. Om God se wil te doen en daarin te volhard is nie kinderspeletjies nie. Dit vra vashou en vasbyt. Wat ons bemoedig in dié uitdagende opdrag is die volgende:

1. In die eerste plek die sekerheid van wat God wil. Waar ons seker is van ons roeping, help dit ons om gefokus te bly.
2. In die tweede plek help dit dat ons mekaar nie net bedien met ons gawes nie – met woorde van God en vanuit die krag van God – maar mekaar ook só lief sal hê dat ons ‘n genadige ruimte vir mekaar skep om die Here te kan bly dien, selfs al struikel ons ook vele kere.
3. In die derde plek inspireer die voorbeeld van Christus ons om aan God gehoorsaam te bly en nooit op te hou om goed te doen nie, selfs al ly ons juis omdat ons God se wil doen óf net omdat ons die naam Christen dra.

Lees meer (preek): https://ngkerksomerstrand.co.za/leef-vir-die-wil-van-god-1-petrus-41-5/