Tag: Beloftes

24 November

Psalm 25:1-3 – niemand wat op U wag, sal beskaamd staan nie

ALEF – Na U, Here, hunker ek. BET – ²My God, op U vertrou ek; laat my tog nie beskaamd staan nie; laat my vyande nie oor my jubel nie. GIMEL – ³Ja, niemand wat op U wag, sal beskaamd staan nie; maar hulle wat sonder rede ontrou is, sal beskaamd staan.

Psalm 25 is ’n gebed van vertroue. Elke vers begin met ’n opeenvolgende letter van die Hebreeuse alfabet. Dit help met die onthou van die Psalm en leer ons die ABC (in Hebreeus: Alef, Bet, Gimel) aan, die “alfabet van geestelike groei” (Elwell). Jy is welkom om die hele Psalm te lees om die verse in die geheel daarvan te kan interpreteer.

Die Psalm beklemtoon in hierdie Adventstyd dat die basis van die geestelike lewe lê in vertroue. In die belofte dat God ons nie in die steek sal laat nie (vers 2). Dit is immers die ervaring van almal wat hul verwagting in God gestel het, dat God die moeite werd is om te vertrou (vers 3). Soos Hy eenmaal met die geboorte van sy Seun bewys het. Daarop kan ons dus staatmaak.

Dink ook na oor die lewensveranderende gedagte in vers 14 dat God dié wat Hom vertrou in sy vertroue neem. “Die Here neem hulle wat vir Hom ontsag het, in sy vertroue, en sy verbond is daar om hulle te onderrig.” Watter belofte! Dit gee lewe aan jou verhouding met God. Dit skep die verwagting dat die Here jou al hoe meer sal ken in wat Hy besig is om te doen. Dit transformeer jou gebedslewe na ‘n Godservaring!

Lees meer: https://bybelskool.com/psalm-25-33-god-sorg-vir-die-wat-hom-vertrou/

23 November

Deuteronomium 5:32-33 – gehoorsaamheid laat dit met jou goed gaan

³²“Daarom moet julle dit nougeset nakom, soos wat die Here julle God julle beveel het. Julle mag nie na links of regs afwyk nie. ³³Julle moet die hele pad volg, soos die Here julle God julle beveel het, sodat julle kan leef en dit met julle goed kan gaan – ja, sodat julle lank kan leef in die land wat julle in besit gaan neem.

Die persoonlike karakter van die Tien Gebooie word hier in Deuteronomium 5 onderstreep. Die Here soek ‘n hart wat vir Hom ontsag het, ‘n hart wat sy gebooie altyd sal onderhou. Sodat sy belofte vir hulle waar kan word dat dit: “met hulle en hulle kinders goed kan gaan!” (vgl vers 29). God se belofte sluit dus seën vir hulle kinders in. Vir dié wat Hom gehoorsaam.

Dit is waarom Moses verder aan in hierdie tweede preek van hom in Deuteronomium (Deut 4:44-26:68) hulle aanraai om hulle harte te besny (Deut 10:16) – wat eintlik beteken dat hulle die Here sal toelaat om dit te doen (Deut 30:6) – want die Here verwag dat hulle Hom van harte sal liefhê bó alles. En daarby hulle naaste soos hulleself.

Dit is goed om herinner te word hieraan in die Adventstyd. Dit is só ‘n hart, ‘n hart wat deur Jesus van Nasaret verander is, wat in staat is om wat God verbied nooit te doen nie; om wat God gebied altyd te doen; om God se verwagtinge persoonlik, volkome, noukeurig en volhardend te gehoorsaam. Dit is só ‘n hart wat met oorgawe sal leef om God se belofte dat dit met hulle goed sal gaan in besit te neem. Dit sluit seën in ook vir hulle kinders (Deut 5:33).

Lees meer: https://bybelskool.com/deuteronomium-444-533-julle-moet-hierdie-wet-leer-gehoorsaam-en-daarvolgens-lewe/

22 November

Ek herinner jou aan gister se begronding van beloftes. En ek herhaal my opsomming van wat beloftes is.

God se beloftes kan jy in die Bybel raaksien in wat God sê, sweer, gee of verklaar. Dit sluit sy seëninge en verbonde in, selfs sy oordele. Sommige beloftes is onvoorwaardelik. Ander is gekoppel aan voorwaardes. Die vervulling van ‘n belofte in ‘n spesifieke geval put ook nie die betekenis daarvan uit nie. In Christus hou al die beloftes van God immers stand: verlede, hede en toekoms (2 Kor 1:20). Selfs waar God ‘n spesifieke belofte gemaak en vervul het aan iemand – bv God wat vir Sara en Abraham ‘n kind belowe en gegee het (Gen 17-18; 21) – openbaar God Homself as Iemand wat in ander kontekste dieselfde kan doen – bv in die geval van Hanna wat Samuel van die Here afgebid het (1 Sam 1-2).

Lukas 21:25-28 – lig julle koppe op, want julle bevryding is naby

²⁵“Dan sal daar tekens wees in die son en die maan en die sterre, en op die aarde sal die nasies beangs en verward wees oor die gedreun en hoë golwe van die see. ²⁶Mense sal flou val van vrees en vermoedens oor wat die wêreld gaan tref, want die kragte van die hemele sal geskud word. ²⁷En dan sal hulle ‘die Seun van die Mens op ‘n wolk sien kom’ met krag en groot heerlikheid. ²⁸Wanneer hierdie dinge begin gebeur, staan dan op en lig julle koppe, want julle bevryding is naby.”

Die Adventstyd sluit nie net die beloftes rondom Jesus se eerste koms na die aarde toe in nie. Dit fokus ook ons aandag op die belofte van sy tweede koms, sy wederkoms. Jesus bemoedig hiermee sy dissipels deur die eeue – dws ook vir ons – al sluit dit die ontwrigtings in wat sy wederkoms voorafgaan.

In hierdie week wat eindig met die eerste Adventsondag begin ons dus met Jesus se wederkoms. Daar sal kosmiese ontwrigtings wees. Die son, maan, en sterre sal ontwrig word. Daar sal ook aardse ontwrigting wees met die gedreun van die see en die golwe. Waarskynlik tsunami’s. Daar sal groot benoudheid en angs wees onder die nasies. Trouens, mense sal flou word van vrees vir wat kom, beide weens die ervaring van die verskillende ontwrigtings as weens die onsekerheid van wat nog gaan gebeur. Totdat hulle die Seun van die mens sien kom op ‘n wolk met krag en groot heerlikheid. Die Here Jesus self. ‘n Vervulling van die profesie van Daniël 7:13.

Wat vir die ongelowiges ‘n vreesaanjaende gebeurtenis sal wees, sal egter vir die gelowiges ‘n vreugdevolle geleentheid wees. Soos Jesus dit hier uitspel, hierdie dinge is ‘n teken van die belofte dat hulle verlossing naby is. Daarom moet hulle regop staan en hulle koppe oplig! Hulle bevryding van die verdrukking en verguising deur die eeue is op hande. Dit het dus ook ‘n effek op hoe ons nou al lewe. Ons kan regop staan en ons koppe oplig. Die lyding van die teenwoordige tyd weeg nie op teen die vreugde wat vir ons wag wanneer Jesus weer terugkeer nie. Ons kan onbesorg en voluit lewe. Jesus kom weer. Jesus kom gou.

Lees meer: https://bybelskool.com/lukas-211-38-volhard-in-waaksaamheid-en-gebed/

Die Bybel is vol beloftes van God aan die mens

Herbert Lockyer noem 7 487 spesifieke beloftes van God tot mens, gebaseer op die werk van Everet Storms (All the Promises of the Bible).

Hierdie beloftes wissel van breë seëninge van vrugbaarheid aan die mensdom in die algemeen tot spesifieke verbonde met mense soos Noag, Abraham, Isak en Jakob en hulle nageslagte. Dit betrek die korporatiewe en gemeenskapslewe sowel as persoonlike en individuele lewens. Wat van hierdie beloftes van God uitstaan, is dat hulle oorvloedig en divers is, en bedoel is om alle areas en fases van die lewe te dek: tydelik, materieel, fisies, huwelik- en familiegewys, geestelik en ewig.

Selfs waar hierdie beloftes vloeke is wat straf en vernietiging behels, pas hulle in die groter skema van God se genade en voorsienigheid in, byvoorbeeld met die idee van ‘n oorblyfsel in die ballingskap, soos Jesaja so raak sê: “Ek sal uit Jakob ‘n nageslag laat voortkom, en uit Juda dié wat my berge sal besit. My uitverkorenes sal dit in besit neem, en my diensknegte sal daar woon.” (Jes 65:9)

Die OT gebruik verskillende woorde om die beloftes oor te dra