Lukas 21:25-28 – lig julle koppe op, want julle bevryding is naby

22 November

Ek herinner jou aan gister se begronding van beloftes. En ek herhaal my opsomming van wat beloftes is.

God se beloftes kan jy in die Bybel raaksien in wat God sê, sweer, gee of verklaar. Dit sluit sy seëninge en verbonde in, selfs sy oordele. Sommige beloftes is onvoorwaardelik. Ander is gekoppel aan voorwaardes. Die vervulling van ‘n belofte in ‘n spesifieke geval put ook nie die betekenis daarvan uit nie. In Christus hou al die beloftes van God immers stand: verlede, hede en toekoms (2 Kor 1:20). Selfs waar God ‘n spesifieke belofte gemaak en vervul het aan iemand – bv God wat vir Sara en Abraham ‘n kind belowe en gegee het (Gen 17-18; 21) – openbaar God Homself as Iemand wat in ander kontekste dieselfde kan doen – bv in die geval van Hanna wat Samuel van die Here afgebid het (1 Sam 1-2).

Lukas 21:25-28 – lig julle koppe op, want julle bevryding is naby

²⁵“Dan sal daar tekens wees in die son en die maan en die sterre, en op die aarde sal die nasies beangs en verward wees oor die gedreun en hoë golwe van die see. ²⁶Mense sal flou val van vrees en vermoedens oor wat die wêreld gaan tref, want die kragte van die hemele sal geskud word. ²⁷En dan sal hulle ‘die Seun van die Mens op ‘n wolk sien kom’ met krag en groot heerlikheid. ²⁸Wanneer hierdie dinge begin gebeur, staan dan op en lig julle koppe, want julle bevryding is naby.”

Die Adventstyd sluit nie net die beloftes rondom Jesus se eerste koms na die aarde toe in nie. Dit fokus ook ons aandag op die belofte van sy tweede koms, sy wederkoms. Jesus bemoedig hiermee sy dissipels deur die eeue – dws ook vir ons – al sluit dit die ontwrigtings in wat sy wederkoms voorafgaan.

In hierdie week wat eindig met die eerste Adventsondag begin ons dus met Jesus se wederkoms. Daar sal kosmiese ontwrigtings wees. Die son, maan, en sterre sal ontwrig word. Daar sal ook aardse ontwrigting wees met die gedreun van die see en die golwe. Waarskynlik tsunami’s. Daar sal groot benoudheid en angs wees onder die nasies. Trouens, mense sal flou word van vrees vir wat kom, beide weens die ervaring van die verskillende ontwrigtings as weens die onsekerheid van wat nog gaan gebeur. Totdat hulle die Seun van die mens sien kom op ‘n wolk met krag en groot heerlikheid. Die Here Jesus self. ‘n Vervulling van die profesie van Daniël 7:13.

Wat vir die ongelowiges ‘n vreesaanjaende gebeurtenis sal wees, sal egter vir die gelowiges ‘n vreugdevolle geleentheid wees. Soos Jesus dit hier uitspel, hierdie dinge is ‘n teken van die belofte dat hulle verlossing naby is. Daarom moet hulle regop staan en hulle koppe oplig! Hulle bevryding van die verdrukking en verguising deur die eeue is op hande. Dit het dus ook ‘n effek op hoe ons nou al lewe. Ons kan regop staan en ons koppe oplig. Die lyding van die teenwoordige tyd weeg nie op teen die vreugde wat vir ons wag wanneer Jesus weer terugkeer nie. Ons kan onbesorg en voluit lewe. Jesus kom weer. Jesus kom gou.

Lees meer: https://bybelskool.com/lukas-211-38-volhard-in-waaksaamheid-en-gebed/