Miga – God heers nou en vir altyd

Inleiding

Die profeet Miga – jonger tydgenoot van Jesaja, en die eerste geslag ná die vroeëre profete Jona, Hosea en Amos – was van Moreset, 40 km suid-wes van Jerusalem. Hy was dus een van die Judese profete. Hy tree oor ‘n lang tydperk van ongeveer 50 jaar op in die tyd van drie van die Judese konings: Jotam (752-736 v.C.), Agas (736-716 v.C.) en Hiskia (715-686 v.C.), hoewel hy sowel die noordelike ryk (Samaria) as die suidelike ryk (Jerusalem) aanspreek (1:1). Sy boodskap het ook beslissende implikasies vir die nasies van die hele aarde (1:2; 4:1; 5:14).

Die boek Miga, sesde in die ry van die Twaalf Kleiner Profete, verkondig die noodsaak om die genadige God – soos Jona dit verwoord – se heerskappy te erken, want dieselfde oordeel wat Jona oor Nineve uitgespreek het, sal ook oor Israel en Juda voltrek word, as hulle hul nie tot die Here bekeer nie. Wat vra die Here immers anders van hulle: “as om net te doen wat reg is, om troue liefde te bewys en om noulettend die pad saam met jou God te loop?” (Mig. 6:8). God verwag immers nie soseer getrouheid in die nakoming van godsdienstige rituele nie, maar getrouheid in ‘n gehoorsame lewenswyse.

Soos die boek Amos, veroordeel Miga sowel sosiale ongeregtigheid (oneerlike handelaars, leiers wat omkoopgeskenke verwag) as wanpraktyke op godsdienstige gebied (niksseggende godsdienstige rituele). Hy vat ook die vals profete aan sowel as die profete wat net op winsbejag uit is. Dit is ook duidelik dat die agtergrond van sy boodskap van oordeel en verlossing in die verbondsbeloftes van die strawwe en seën van Deuteronomium 28-30 begrond is.

Miga voorspel duidelik die val van Samaria en die noordelike ryk wat ‘n paar dekades na hy begin optree het – in 722 v.C. – plaasgevind het (1:6: “Daarom sal Ek van Samaria ‘n puinhoop maak, ‘n stuk veld vir die aanplant van wingerd. Ek sal haar klippe in die vallei laat afrol, haar fondamente blootlê.”) sowel as dié van Jerusalem en die suidelike ryk in 586 v.C., hoewel dit eers amper twee eeue later gebeur het (3:12: “Daarom, deur julle toedoen sal Sion ‘n omgeploegde veld word; Jerusalem sal puinhope word en die tempelberg oorgroeide heuwels.”).

Tog skets Miga ook hoop vir die toekoms, selfs in ballingskap (4:10), met ‘n visie van ‘n nuwe koning (5:1 vv.) en ‘n terugkeer na God wat uiteindelik alle nasies sal insluit (4:1-7), ‘n visie wat dié van Jesaja 2 eggo. Geen wonder dat hy ‘n reuse rol gespeel het in die geskiedenis van Juda nie, soveel so dat toe ‘n profesie van hom aangehaal word om Jeremia se lewe te probeer spaar, koning Jojakim nie anders kon as om daaraan gehoor te gee nie. Vergelyk Miga 3:12 (hierbo aangehaal) wat die leiers van die land in Jeremia 26:17-19 aanhaal om die koning te oortuig. Lees meer in my bydrae oor Jeremia 26 – Jerusalem sal soos Silo verwoes word.

Miga het ook die onderskeiding dat die skrifgeleerdes in die tyd van Herodes uit Miga 5:1 aanhaal om te bevestig dat die Messias in Betlehem gebore sal word (Matt. 2:5-6). Sy profesieë het dus duidelike Messiaanse trekke bevat, reeds 7 eeu voor die Here Jesus Christus se geboorte.

Indeling

Die boek wissel tussen profesieë van oordeel en verlossing. Ons gaan dit as volg lees:

• 1:1-3:12 – Die Here beplan ‘n ramp teen die volk en hulle leiers
• 4:1-5:14 – Die Here bring verlossing vir die hele wêreld onder sy heerskappy
• 6:1-7:20 – Die Here bring redding vir dié wat Hom vertrou