Jakobus 4 – Tree met respek vir mekaar en in afhanklikheid van God op
LEES
Raak stil voor die Here met ’n kort gebed. Lees die teksgedeelte deeglik deur. Let op vir temas in die gedeelte. Vra jouself af: Wat sê dit van God? Wat sê dit van mense? Wat sê dit van die wêreld? Soek vir een sleutelgedagte wat jou besonderlik tref. Skryf dit in jou joernaal neer. Lees dan wat ek hieronder geskryf het.
My bydrae
Jakobus gaan dieper in op die bron van die destruktiewe kragte wat in ‘n hele aantal van die gemeentelede aan die werk is en wat in die oorloë en gevegte te siene is wat onder hulle voorkom. Dié onmin en konflik kom van die “begeertes wat in julle ledemate oorlog voer.”
Hy raai hulle dus aan om op drie maniere daarmee te handel:
- Vertrou God vir sy voorsiening – 4:1-10
- Moenie van mekaar kwaadpraat nie – 4:11-12
- Leef afhanklik van God – 4:13-17
4:1-10 – Vertrou God vir sy voorsiening
Uit Jakobus se beskrywing van die onderlinge oorloë en gevegte onder lede van die geloofsgemeenskap, is dit duidelik dat hulle aandag moet gee aan hulle verhouding met God, hulle verhouding met hulleself en hulle begeertes en omstandighede, sowel as aan hulle verhouding met mekaar .
Die onderlinge konflik en onmin – metafories beskryf as moord – kom van hulle begeerte na besittings wat vererger word deurdat hulle dié wat wel iets het, met jaloesie bejeën. In plaas daarvan om die Here te vertrou vir sy voorsiening en van Hom te vra wat hulle nodig het, veg hulle met mekaar, en veroorsaak dit vyandskappe en stryd.
Daarom moet hulle in die eerste plek aandag gee aan hulle verhouding met God. Hulle gebedsverhouding met Hom moet herstel word. Hulle tree eintlik as vreemdelinge teenoor God op – soos egbrekers – terwyl hulle vriende kan wees! Dit moet hulle bedroef maak en laat huil – nie om die situasie só te laat nie, maar om dit reg te stel. Hulle moet as vriende van God leef, tot Hom nader, met Hom gemeenskap beoefen.
In die tweede plek moet hulle aandag gee aan hulle verhouding met hulleself en hulle begeertes. Dit sluit in dat hulle op God se voorsiening vertrou en nie net van Hom dinge vra wat eintlik net hulle wellus sal bevredig nie. Soos Paulus daaroor geskryf het: “Die Here is naby. Moet oor niks besorg wees nie, maar maak in alles julle versoeke aan God bekend deur te bid, te smeek en Hom te dank. En die vrede van God wat alle begrip oortref, sal in Christus Jesus oor julle harte en gedagtes waak.” (Fil. 4:5-7).
Dit sluit in dat hulle die duiwel sal weerstaan, in terme van die versoeking waarvoor hulle eie begeertes hulle stel, soos in die Ons Vader verwoord: “bring ons nie in versoeking nie, maar red ons van die Bose” (Matt. 6:13). Dit sluit ook in dat hulleself aan God verbind in dade – “reinig die hande” – en gedagtes – “suiwer julle harte”.
En die rede vir dié manier van doen en leef, is dat: “God met jaloersheid waak oor die Gees wat Hy in ons laat woon.” Hy verwys hier na ‘n redelike algemene Skrifbeginsel, eerder as na ‘n direkte aanhaling (vgl. Eks. 34:24; Sag. 8:2). God wil ons vriend wees, nie ons vyand nie. Daarvoor kan ons Hom vertrou.
4:11-12 – Moenie van mekaar kwaadpraat nie
In die derde plek moet hulle aandag gee aan hulle verhouding met mekaar. Hulle moenie van mekaar kwaadpraat nie, veral nie wanneer dit gebore is uit hulle jaloesie oor wat die ander besit nie. Dan raak hulle soos regters wat ‘n oordeel uitspreek oor mekaar, en God se voorsiening in ander se lewens beoordeel, en selfs veroordeel. Deur mekaar te respekteer, respekteer hulle eintlik vir God self.
4:13-17 – Leef afhanklik van God
Die somtotaal van sy boodskap aan hulle is dat hulle in afhanklikheid van God moet leef. Dit moet so wees in terme van hulle beplanning van hulle werkslewe. Dit geld ook in terme van hulle omgee vir ander: “As iemand weet om die goeie te doen en dit nie doen nie, geld dit vir hom as sonde.” God seën ons immers om tot ‘n seën te wees.
Boodskap
Om ‘n vriend van God te wees, is die grootste geskenk wat ‘n mens kan kry. Dít is immers waarom Hy sy Gees in ons laat bly, sodat ons onbelemmerde kontak met Hom kan geniet. Al sy voorsiening en vrygewige genade kom na vore in dié verhouding met Hom. Daarom kan ons met oorgawe werk aan ons verhouding met Hom, kan ons ons begeertes voor Hom bring en van Hom afhanklik lewe. En kan ons in deernis teenoor mekaar optree, sonder om in gevegte betrokke te raak oor dít wat ons dink ander het wat meer is as wat ons self besit.
LUISTER
Dink na oor wat God vir jou prakties deur hierdie gedeelte wil sê. Vra jouself af: Wat vra dit van jou? Wat belowe dit vir jou? Wat moet jy dink of doen daarmee?
LEEF
Besluit hoe jy daarop gaan reageer. Sê dit vir die Here in gebed en skryf dit neer in jou joernaal. Laat die boodskap wat God jou gee met jou saamgaan.
Tags: Jakobus
Trackback from your site.
Chris van Wyk
| #
Ja, dit is heeltemal gratis.
May
| #
Is dit gratis om in te teken “bydrae oor Al 4 evangelise”?
Chris van Wyk
| #
Hi Christopher, die Jode het die Boek van Henog nie as gesaghebbend beskou nie, en omdat die Hervormers die Joodse kanon as maatstaf gebruik het vir die samestelling van die OT, is die boek in die Protestantse beweging nie as deel van die kanon ingesluit nie. Jy kan meer lees hier oor verskillende perspektiewe op die boek.
Christopher
| #
Geagte Pastoor Chris;
Ek wil graag weet waarom die Boek van Enoch nie in die bybel ingesluit is nie?
Is van die informasie daarin verkeerd?
Baie Dankie, Groete.
Chris van Wyk
| #
Hi Alicha, Jesus moedig hier die dissipels aan tot ’n onberispelike lewe wat nie vir ander tot struikeling aanleiding sal gee nie. Hy wil hê dat ons niks sal doen wat ander mense sal laat struikel nie. Want, Hy wil hê dat almal sal floreer. Hy wil hê dat ons almal tot ons volle potensiaal sal lewe. Daarom wil Hy hê dat ons dit vir mekaar moontlik sal maak.
Dit is uiteraard onvermydelik dat daar dinge sal gebeur wat mense sal laat struikel. Versoekings en beproewings. Ons moet egter op geen manier daarvoor verantwoordelik wees nie, want dié wat struikel sal wel vir hulle eie oortredings gestraf word, maar dié wat vir die struikelblokke verantwoordelik is, sal in groter ellende gedompel word.
Ons moet dus op ons hoede wees dat ons niks doen wat ander mense skade kan berokken nie.
Alicha
| #
Goeie Middag Chris,
Kan jy moontlik Lukas 17:1 -2 vir my uiteen sit. Die 2 verse is so eenvoudig, tog so kragtig dat ek voel ek nog nie die volle GROOT prentjie snap nie.
“1 Jesus het vir sy dissipels gesê: “Dit is onvermydelik dat daar dinge kom wat mense laat struikel. Maar ellende wag vir die mens wat die oorsaak daarvan is. 2So ‘n mens kan eerder met ‘n groot klip aan die nek in die see gegooi word as dat hy vir een van hierdie kleintjies ‘n struikelblok word. 3Wees dus self op julle hoede.”
Dankie, ek hoor graag van jou.
Vriendelike Groete
Alicha
Chris van Wyk
| #
Hi Adri, ‘n Christen is iemand wat in die Here Jesus Christus glo en Hom gehoorsaam, wat deur die Gees ‘n kind van God gemaak is. Die “Jahwis” dui op ‘n hipotetiese bron wat gebruik is om die eerste vyf boeke van die Bybel, die Pentateug, te skrywe. Oral waar in die teks “Jahwe” voorkom, word dit as die “Jahwis” bron deur sommige geleerdes beskou (bv Gen 2). Oral in die teks waar net “Elohim” (God) voorkom, word dit as die “Elohis” beskou (bv Gen 1). Ek ondersteun egter nie hierdie onderskeid in bronne nie. Daar is nog nooit enige boek gevind wat eers naastenby met só ‘n bron vergelyk kan word nie. Die onderskeid is net gebaseer op die verbeelding van geleerdes.
Adri
| #
Hi Chris
Kan jy my asb verduidelike wat is die verskil tussen Christen en Yahwis.
Groete Adri
Pastor Barry Noble
| #
God bly God Al stel ons Hom te leuer , Jesus Christ’s nimmer-meer-Hy bly getrou
Chris van Wyk
| #
Dankie Erna, dit bly my vreugde en voorreg.