Verwysings na Jeremia in die Bybel
Daar word vier keer in die res van die OT na Jeremia verwys, in Dan. 9:2, 24-27, 2 Kron. 35:25; 36:20-22 en Esra 1:1.
- Daniël baseer sy intersessie vir die volk in die tyd van koning Darius (waarskynlik kan hy met Kores gelyk gestel word) op: “die Skrifte … volgens die woord van die Here wat tot die profeet Jeremia gekom het” dat Jerusalem sewentig volle jare ’n puinhoop sou wees (Dan. 9:2). Hy het dus waarskynlik een of ander vorm van die boek van Jeremia gebruik.
- Dieselfde geld die Kronis sowel as Esra wat na die terugkeer uit ballingskap verwys as ’n vervulling van die belofte van die Here: “by monde van Jeremia” in die eerste regeringsjaar van koning Kores (waarskynlik gelyk aan Darius) van Persië (2 Kron. 36:20–22; Esra 1:1).
- Die Kronis verwys ook na ’n treurlied wat Jeremia oor Josia gedig het en in die boek Die Treurliedere opgeneem is (2 Kron. 35:25).
Die NT verwys ook drie keer na Jeremia, al drie keer in die evangelie van Matteus: Matt. 2:17; 16:14; 27:9.
- Matteus gebruik ’n aanhaling uit Jeremia 31:15 om die kindermoord wat deur Herodes gelas is met die geboorte van Jesus as ’n tragiese vervulling van die toekomsbelofte van Jeremia te interpreteer (Matt. 2:17-18).
- Hy noem ook dat Jesus in die volksmond met die profeet Jeremia verbind is (Matt. 16:14).
- Die ander keer wat Matteus na Jeremia verwys, verbind hy hom egter verkeerdelik aan ’n teks uit Sagaria 11:12-13 met verwysing na die bloedgeld van Judas, dertig silwerstukke, waarmee die grond van die pottebakker as begraafplaas vir vreemdelinge gekoop is (Matt. 27:9-10). Die fout is waarskynlik gemaak omdat Jeremia ’n keer van die pottebakker se huis praat in sy oordeelsprofesie oor Juda en Jerusalem (Jer. 18:2-3) en self sewentien sikkels silwer betaal het om die stuk grond van sy neef Ganamel in Anatot te koop (Jer. 32:6-9).
