Romeine 8:1-17 – Almal wat deur die Gees van God gelei word, hulle is kinders van God

3 Junie

Ons het al na Romeine 8:18-30 en Romeine 8:31-39 gekyk. Hier is die eerste perikoop in daardie kragtige hoofstuk van Paulus.

Romeine 8:1-17 – Almal wat deur die Gees van God gelei word, hulle is kinders van God

¹Daar is dan nou geen veroordeling vir diegene wat in Christus Jesus is nie. ²Die wet van die Gees wat in Christus Jesus die lewe gee, het jou immers vrygemaak van die wet van die sonde en die dood. ³Dit waartoe die wet, verswak deur ons sondige aard, nie in staat was nie, het God gedoen: Deur sy eie Seun vanweë die sonde in die gestalte van ‘n sondige mens te stuur, het Hy die sonde in die mens veroordeel, ⁴sodat die vereiste van die wet in ons vervul kon word, ons wat nie volgens ons sondige aard leef nie, maar volgens die Gees. ⁵Wie volgens hulle sondige aard leef, bedink immers die dinge van hulle sondige aard, maar diegene wat volgens die Gees leef, bedink die dinge van die Gees. ⁶Die denke van ons sondige aard loop uit op die dood, maar die denke van die Gees bring lewe en vrede. ⁷Die denke van ons sondige aard is vyandskap teen God; dit onderwerp hom nie aan die wet van God nie, want dit kan ook nie. ⁸Wie in hulle sondige aard bly, kan God nie tevrede stel nie. ⁹Julle, daarenteen, bly nie in julle sondige aard nie, maar in die Gees – as die Gees van God inderdaad in julle woon. As iemand nie die Gees van Christus het nie, behoort hy nie aan Hom nie. ¹⁰Maar as Christus in julle is, is die liggaam, as gevolg van die sonde, wel dood; daarenteen, op grond van die regverdiging, is die Gees lewe. ¹¹As die Gees van Hom wat Jesus uit die dood opgewek het in julle woon, sal Hy wat Christus uit die dood opgewek het, ook julle sterflike liggame lewend maak deur sy Gees wat in julle woon. ¹²Daarom dan, broers, het ons ‘n verpligting – maar nie teenoor ons sondige aard, om daarvolgens te leef nie. ¹³Want as julle volgens julle sondige aard leef, sal julle sterf. Maar as julle deur die Gees die praktyke van die liggaam doodmaak, sal julle leef. ¹⁴Almal wat deur die Gees van God gelei word, hulle is kinders van God. ¹⁵Julle het immers nie ‘n Gees ontvang wat verslawing bring, sodat julle weer bang hoef te wees nie; nee, julle het die Gees ontvang wat bevestig dat ons tot kinders aangeneem is, en deur Hom roep ons “Abba, Vader!” ¹⁶Die Gees self getuig teenoor ons gees dat ons kinders van God is. ¹⁷Maar as ons kinders is, is ons ook erfgename – erfgename van God en mede-erfgename met Christus mits ons inderdaad saam met Hom ly, sodat ons ook saam met Hom verheerlik kan word.

Ek onthou steeds baie helder die effek wat vers 16 op my gehad het in my standerd 5 jaar. My ma het by huisgodsdiens Romeine 8 gelees. Toe sy vers 16 lees: “Hierdie Gees getuig saam met ons gees dat ons kinders van God is,” het ek in trane uitgebars. Ek was diep geraak deur die feit dat God binne in ons die sekerheid bring dat ons sy kinders is en dat dit by uitstek die werk van die Heilige Gees is. Baie jare later sou my ma my vertel dat sy daardie dag geweet het dat ek predikant sou word. Ek moes egter self ’n lang pad loop voor die oortuiging aan die einde van my skoolloopbaan tot my gekom het. Maar ek sal nooit die vertroosting van God se aanraking daardie aand vergeet nie.

En dit is uiteindelik die boodskap van Paulus in dié hoofstuk. Daar is net een manier om die Christelike lewe te leef, en dit is deur die Gees. Geen wonder God word 20 keer genoem in hierdie hoofstuk nie! ’n Oorwinnende Christelike lewe kan nooit deur die wet gebeur nie, daarvoor is ons sondige vlees te swak. Dit kan net wees deur ’n daaglikse oorgawe aan die beheer van die Gees waardeur ’n einde gemaak word aan ons sondige praktyke (Rom 8:13). ’n Mens kan selfs sê soos Paulus dat daar ’n nuwe wet is, die wet van die Heilige Gees (Rom 8:2). Vir elkeen wat in Christus Jesus glo, is daar nou geen veroordeling nie. Die skuld van die sonde is afgeskryf. Ons het vrede in ons verhouding met God! Hiermee sluit Paulus aan by ’n hele paar OT profete wat reeds ’n paar eeue tevore verkondig het dat ware verandering net deur God self kan kom. Jeremia het daaroor gepreek (Jer 31:31-34), Esegiël het dit aan die ballinge verkondig (Eseg 11:19-20), en Jesaja laat ook van hom hoor (Jes 65:17-25).

Let op hoe Paulus dit as ’n geestelike werklikheid skets: “die Gees van God woon inderdaad in julle” (Rom 8:9), maar ook as ’n fisiese werklikheid: “God sal ook julle sterflike liggame lewend maak deur sy Gees wat in julle woon” (Rom 8:11). Ons status het verander deurdat ons aan God verbind is deur die Gees wat in ons woon. Maar, dit het ook ‘n effek op en in ons sterflike liggame. Ons kry dit reg om al hoe meer te lewe soos die Gees wil. Daarom, en dit is baie belangrik, kan hierdie werk van God nie ’n werklikheid vir ons wonder sonder dat ons ons daarop toelê nie. Ons het ’n verpligting om deur die Gees ’n einde te maak aan ons sondige praktyke, iets waarop Paulus in hoofstuk 12 en verder aan weer sal terugkom. Daarsonder sal die werk van die Gees altyd gebrekkig bly in ons lewe.

Lees meer: https://bybelskool.com/romeine-81-17-die-gees-getuig-saam-met-ons-gees-dat-ons-kinders-van-god-is/