Psalm 97 – God steek die lig aan vir dié wat die Here liefhet

4 Junie

Psalm 97 – God steek die lig aan vir dié wat die Here liefhet

¹Die Here regeer, laat die aarde juig; laat al die afgeleë eilande bly wees. ²Wolke en diepe duisternis omring Hom, reg en geregtigheid is die grondslag van sy troon. ³Vuur gaan voor Hom uit en rondom Hom verbrand dit sy teenstanders. ⁴Sy weerligstrale verlig die aarde, die wêreld sien dit en sidder. ⁵Berge smelt soos was voor die Here, voor die Heer van die hele wêreld. ⁶Die hemele verkondig sy geregtigheid, en al die volke sien sy majesteit. ⁷Almal wat gesnede beelde dien, wat spog met nikswerd afgode, staan beskaamd. Buig in aanbidding voor Hom, alle gode! ⁸Sion hoor dit en is bly, die dogters van Juda juig oor u oordele, Here. ⁹Want U, Here, is die heel hoogste bo die hele aarde; U is ver verhewe bo alle gode. ¹⁰Julle wat die Here liefhet, moet die kwaad haat. Hy beskerm die lewe van sy troue volgelinge; uit die hand van goddeloses red Hy hulle. ¹¹Lig is gesaai vir die regverdiges, vreugde vir hulle met opregte harte. ¹²Verbly julle in die Here, regverdiges, en prys sy heilige, gevierde Naam.

Die Psalm kan in twee dele verdeel word. Die eerste sluit met ‘n opsommende beskrywing van God as Koning: “Here, is die heel hoogste bo die hele aarde; U is ver verhewe bo alle gode.” – vers 1–9. Die tweede sluit met die opdrag aan ons almal wat Hom liefhet: “Verbly julle in die Here, regverdiges” – vers 10–12.

Die Here se koningskap word op twee maniere beskryf. Dit word eerstens in metaforiese terme as ’n kosmiese gebeure geteken: die aarde juig, die afgeleë eilande is bly, wolke en duisternis omring Hom, vuur gaan voor Hom uit en verbrand sy teenstanders, Sy weerligstrale verlig die wêreld, die aarde “sien dit” en sidder, en die berge smelt soos was voor Hom. Die inhoud van hierdie lofprysing van die heelal is die reg en geregtigheid waarmee God regeer. ’n Mens hoor hierin die vroeëre verskynings van die Here in soortgelyke omstandighede by Sinaiberg in die tyd van Moses (Eksodus 19) en op effens gewysigde manier by Horeb in die tyd van Elia (1 Konings 19 – die Here was juis nie in die sterk wind, aardbewing of vuur nie, maar in die “fluistering in die windstilte”). Die Here se koningskap word tweedens steeds op metaforiese wyse as ’n kommunikasie gebeure geteken: die hemele verkondig sy geregtigheid sodat al die volke Sy Majesteit kan sien (vgl Ps 19) Hierdie getuienis oor God het twee uitkomste. Aan die eenkant staan almal wat afgodsbeelde dien, beskaamd, want dié afgode moet in aanbidding voor Hom buig (vers 7b)! Aan die ander kant hoor die Godstad, Jerusalem, met sy tempel op die Sionsberg, sowel as die “dogters van Juda” (=stede van Juda) dit en het ’n groot blydskap en juig oor God se posisie as die Allerhoogste oor die hele aarde wat ver verhewe is bo alle gode.

Omdat God se koningskap nie net kosmies gedemonstreer word nie, maar inderdaad ook aan mense gekommunikeer word, kan die gelowiges hulle in die Here verbly. Hulle word nie net as regverdiges en troue dienaars (dissipels of “volgelinge” – 2014 vertaling) geteken nie, maar as “liefhebbers van die Here” (1933 vertaling – “Lovers of Jahwe” soos in verskeie Engelse vertalings). Dit is mense wat hulle aktief beywer om met God geassosieer te word, om met Hom in verhouding te lewe, wat Hom liefhet bo alles. Dié liefhebbers van die Here word bemoedig om nie net die Here lief te hê nie, maar ook die slegte en die kwade te haat in die wete dat God die lewe van sy troue volgelinge beskerm en hulle uit die hand van goddelose mense sal red. Met die pragtige metafoor van God wat as’t ware die lig vir regverdiges aansteek (saai), word die vreugde van dié wat met opregtheid God lief het, geteken. Hulle kan inderdaad hulle in die Here verbly en sy heilige, gevierde Naam loof – soos die Psalmis almal oproep.

Lees meer: https://bybelskool.com/psalm-97-verbly-julle-liefhebbers-van-die-here/