Psalm 30 – Sy toorn duur ‘n oomblik, sy goedgesindheid ‘n lewe lank

27 April

Psalm 30 – Sy toorn duur ‘n oomblik, sy goedgesindheid ‘n lewe lank

¹‘n Psalm. ‘n Lied vir die inwyding van die huis. Van Dawid. ²Ek verheerlik U, Here, want U het my opgetrek en U het nie toegelaat dat my vyande hulle oor my verheug nie. ³Here my God, ek het na U om hulp geroep en U het my gesond gemaak. ⁴Here, U het my lewe uit die doderyk laat opkom; U het my lewend gehou tussen dié wat afdaal in die put. ⁵Besing die Here, julle wat sy getroue volgelinge is, en prys sy heilige, gevierde Naam, ⁶want sy toorn duur ‘n oomblik, sy goedgesindheid ‘n lewe lank. In die aand word daar aanhoudend gehuil, maar teen die oggend is daar jubelkrete. ⁷Ek is die een wat onbesorg gesê het: “Ek sal nooit wankel nie!” ⁸Deur u goedgesindheid het U, Here, my so sterk soos ‘n berg laat staan. Verberg U u gesig, is ek beangs. ⁹“Na U, Here, roep ek, by my Heer smeek ek om genade: ¹⁰Watter nut het dit as my bloed gestort word, as ek na die grafkuil afgaan? Sal stof U prys? Sal dit u trou verkondig? ¹¹Luister, Here, en wees my genadig! Here, wees vir my ‘n helper! ¹²“U het my rouklag in ‘n koordans verander, my rouklere uitgetrek en my met vreugde omgord, ¹³sodat my hele wese U kan besing en nie stilbly nie. Here, my God, ek sal U vir altyd prys!”

Die opskrif sê dat hierdie Psalm geskryf is vir die inwyding van die huis, wat ook as die tempel verstaan kan word, soos die vertaler dit gedoen het. Ek verkies egter om dit breër te verstaan as huis, omdat dit dan ‘n Psalm is wat eintlik oral gebruik kan word waar op die veiligheid wat God bring, staat gemaak word. Hy is die Rots waarop ons bou. Dawid loof God in vers 1-4 dat Hy hom gesond gemaak, en gered het van die dood (“doderyk” en “put”). Sy vyande se blydskap oor sy ellende was van korte duur. Hulle blydskap het stil geraak. God het na Dawid geluister en hom weer lewe gegun.

Dawid gebruik in vers 5-13 sy ervaring van redding om die geloofsgemeenskap aan te moedig om die Here te loof en getrou te bly dien, want Hy is ‘n God wat lewenslank goed is. “Sy toorn duur ‘n oomblik, sy goedgesindheid ‘n lewe lank.” Sy ervaring dat hy gisteraand nog gehuil het, en vanmôre weer kan lag, is die bewys daarvan.

Hy is egter ook eerlik daaroor dat hy sy vertroue in God se onwankelbaarheid eintlik maklik verkondig het – toe dit nog goed gegaan het met hom. Die toets het egter gekom – hetsy deur sy eie toedoen of deur ander s’n of deur siekte – toe dit nie goed gegaan het met hom nie, en hy die ervaring gehad het dat God sy teenwoordigheid aan hom onttrek het. Dit het sy vertroue op God tot die uiterste getoets. Die Here het egter sy hulpgeroep gehoor en hom genadig gewees, en sy vertroue bevestig. Daarom sal Dawid sing en nie stilbly nie … want God het nie stil gebly nie! “Sy goedgesindheid duur ‘n lewe lank.”

Lees meer: https://bybelskool.com/psalm-28-30-lof-aan-god-omdat-hy-gehoor-en-gehelp-het/