Psalm 1
Die fokus van hierdie Leesplan is gemeenskap met God. Ons begin telkens met die bid van die Ons Vader, bid dan die Psalm met ‘n tyd van nadenke, en sluit ons gebedstyd af met ‘n kort Lofprysing. Die idee is dat jy na die Ons Vader die kort gedeelte oor die teks en konteks van die Psalm lees, daarna die Psalm met aandag deurlees, en dan vers vir vers in jou eie woorde (hardop as dit kan) bid. Daarna kan jy die kort bydrae oor die boodskap en betekenis lees vir nadenke. Sluit met die bid van die Lofprysing. Die middag en aand bid jy net die Ons Vader, die Psalm, en die Lofprysing.
Ons Vader
“Ons Vader wat in die hemele is, laat u Naam geheilig word. Laat u koninkryk kom. Laat u wil geskied, soos in die hemel, so ook op die aarde. Gee ons vandag ons daaglikse brood. En vergeef ons ons sondes, soos ons ook ons skuldenaars vergeef. En laat ons nie in versoeking kom nie, maar verlos ons van die Bose. Want aan U behoort die koninkryk en die krag en die heerlikheid tot in ewigheid. Amen.” (Matt. 6:9-13)
Teks en konteks
Psalm 1 lei die hele Psalmboek in. Twee groepe mense word hier gekontrasteer wat telkens in die res van die Psalmboek genoem sal word: die regverdiges en die goddeloses. In wese is dit die kern van die Psalms (en die Bybel) se boodskap: 1) Die sin van die lewe word in die regte verhouding met God gevind – regverdiges. 2) Dit is dwaas om sonder God te probeer lewe – goddeloses. Let op hoe die Psalm die impak uitspel wat regverdiges en goddeloses se onderskeie lewenstyle op hulle ervarings en bestemming het. Die pad wat jy kies in hierdie lewe het gevolge. Dit laat ’n mens dink aan Jesus se tipering van twee paaie in Matt 7:13–14. Die een is ’n poort na die verderf, die ander die poort na die lewe.
Bid die Psalm
“Gelukkig is die mens wat nie loop volgens die raad van goddeloses, of staan op die pad van sondaars, of sit in die vergadering van spotters nie. Hy vind egter vreugde in die gebooie van die Here en oordink sy voorskrifte dag en nag. Hy is soos ’n boom geplant langs waterstrome, wat vrugte dra op die regte tyd. Sy blare verwelk nie; in alles wat hy doen, is hy voorspoedig. Maar dit geld nie vir die goddeloses nie. Hulle is soos kaf wat die wind verstrooi. Daarom sal goddeloses nie voortbestaan in die oordeel, of sondaars in die geselskap van regverdiges nie. Want die Here waak oor die pad van die gelowiges; maar die paaie van die goddeloses lei tot ondergang.” NLV
Boodskap en betekenis
Psalm 1 help jou om oor die bron van jou lewe te besin. Die metafoor van die boom by die waterstroom spel die primêre plek uit wat die Woord in jou lewe moet hê. Die Here lei jou daardeur op die regte pad, soos Jeremia ook later sal skryf (Jer. 17:7-8). Die saligsprekings van Jesus sluit nou by hierdie boodskap aan: “Gelukkig is dié wat honger en dors na wat voor God reg is, want Hy sal hulle hartsverlange bevredig… Gelukkig is dié wie se harte volkome op God gerig is, want hulle sal vir God sien.” (Matt. 5:6, 8 – NLV). Dink hieroor na en verbind jou daaraan om die Psalms as die basis van jou gebede vir hierdie jaar te gebruik.
Lofprysing
“Weet vandag en verstaan dat die Here God is; Hy alleen is God in die hemel en op die aarde.” (Deut. 4:39)
Onlangse kommentaar