Ek gaan ‘n maand later begin met die Bybelskool oor die 3de en 4de Psalmboek.  Dit is vanweë my werksprogram en die baie vakansiedae in April.  Die eerste bydrae as inleiding oor die 3de Psalmboek – Ps. 73-89 – word op 7 Mei geplaas en die laaste bydrae op 25 Junie.  Daar is ook net 5 byeenkomste in Somerstrand gemeente weens dieselfde faktore, asook verkiesingsdag.  Jammer vir diegene wie se beplanning hierdeur geraak word.

Hier is my voorgestelde program vir die 2de kwartaal:

Die Psalms beklee ’n baie besondere plek in die Bybel.  Dit is omdat die Psalms die taal van die hart gebruik.  Dit sal jou binneste  roer, en jou verbeelding  wakker maak om ‘n ruimte te skep waarin jou eie gesprek met God kan verdiep.

Een van die belangrikste lewenslesse wat die Psalms my geleer het, is dat ons gesprek met God nooit losgemaak kán of hóéf te word van ons lewensomstandighede nie.

Ek het reeds ’n hele paar bydraes oor die Psalmboek geskrywe.  Ek herhaal dit dus nie weer hier nie.  Vir dié wat die eerste keer by ons aansluit – of wat weer hulle geheue wil verfris – kan die volgende bydraes vir jou ’n goeie breë raamwerk gee om die boodskap van die Psalms te ontsluit:

• Inleiding op die Psalms – God is die sin en betekenis van die lewe
• Psalms ingedeel in vyf Psalmboeke
• Historiese raamwerk
• Teologiese temas, soorte Psalms en Jesus en die Psalms
• Digterlike taal
• Psalms vir die lewe
• Oor die liedere wat ons in die kerk sing

by Chris van Wyk

Die derde boek van die Psalms (Psalms 73-89) veronderstel meesal die ballingskap en val van Jerusalem – 6de eeu v.C. – met die vrae en dreigende wanhoop wat dit in die lewe van die volk opgeroep het.  Dit is diep en donker wroeginge oor die toekoms, waarin die voorspoed van die onregverdiges en goddeloses tot baie vrae en worstelinge aanleiding gee.  Ons vind hier dus meesal Klaagpsalms met Psalm 73 die inleiding wat die tema van twyfel eerlik op die tafel sit, weliswaar met die uiteindelike boodskap dat twyfel in die nabye teenwoordigheid van God tot rus kan kom (vers 23-28).

Die vierde Psalmboek (Psalms 90-106) fokus weer op Jahwe se koningskap ten spyte van die problematiek van die Dawidiese koningshuis wat aan God ongehoorsaam was, met ’n appèl aan Jahwe om die ballinge weer terug te bring na Jerusalem (vgl. Ps 106:47).  Psalm 90 – die Psalm van Moses – wat waarskynlik vroeër gedateer kan word, lei die tema van God as toevlug van geslag tot geslag in.  Hier is dus veral Lofpsalms.

Hierdie twee Psalmboeke gee dus vir ons woorde vir ons gebede wat ons kan bid beide in die donker tye wat ons ervaar as in die tye van hoop en verwagting.

by Chris van Wyk

Die eerste Psalm in dié Psalmboek, Psalm 73, begin met die stelling: “God is vir Israel baie goed.” Dít is die stelling van die Psalmis wat deeglik getoets gaan word in die res van die derde Psalmboek, want die vraag is of die stelling waar is in die lig van die voorspoed van die goddeloses en die dilemma van die ballingskap wat aan God se straf toegeskryf word.  Hoekom laat God dit so goed gaan met die goddeloses as dit so swaar gaan met die regverdiges wat ly onder die oordeel van God oor die ongehoorsaamheid van die res van die volk?

Die antwoord wat die derde Psalmboek verskaf, lê onder andere opgesluit in die boodskap van Psalm 82 (en 88) dat die hoop by God self lê en sy ingrype, “want al die nasies behoort aan U.” (82:8)  Hy sal uitspraak lewer sodat daar reg kan geskied regoor die hele aarde (vers 3-4).