Sefanja 3:14-20 – God reken af met almal wat jou verdruk

6 Desember

Sefanja 3:14-20 – God reken af met almal wat jou verdruk

¹⁴Jubel van vreugde, dogter van Sion, roep dit uit, Israel! Verbly en verheug jou met jou hele hart, dogter van Jerusalem! ¹⁵Die Here het die oordele oor jou afgewend, jou vyande uit die weg geruim. Die Koning van Israel, die Here, is in jou midde; jy sal geen onheil meer vrees nie. ¹⁶Op daardie dag sal vir Jerusalem gesê word: “Moenie vrees nie, Sion; Moenie dat jou moed jou begewe nie. ¹⁷Die Here jou God is in jou midde, ‘n held wat verlos. Hy verheug Hom met blydskap oor jou, Hy maak jou stil met sy liefde. Hy sal oor jou juig met jubelkrete.” ¹⁸“Die getreur by die fees sal Ek van jou af wegneem, dit is ‘n las op jou, ‘n skande. ¹⁹Kyk, Ek sal dan afreken met almal wat jou in daardie tyd verdruk het. Ek sal die verlamdes verlos, en hulle wat uitmekaar gejaag is, bymekaar maak. Ek sal hulle roem en aansien gee in elke land waar hulle verneder is. ²⁰In daardie tyd sal Ek julle laat kom, terselfdertyd sal Ek julle bymekaarmaak. Ja, Ek sal vir julle onder al die nasies op aarde aansien en roem gee wanneer Ek julle lot voor julle oë verander,” sê die Here.

Sefanja is ‘n tydgenoot van Jeremia, Nahum, Obadja en moontlik Joël. Hy waarsku Juda en Jerusalem dat God se belofte van hulp net omhels kan word deur die nougesette terugkeer na en bekering tot die Here. Dan sal hulle met hulle hele hart kan jubel van vreugde. Die oorlog sal vergete wees, die vyand verslaan. Die Here self sal as Koning optree en hulle van rampe beskerm. Hulle moedeloosheid sal verdwyn.

Let op hoe pragtig Sefanja die teenwoordigheid van die Here beskryf: “Die Here jou God is in jou midde, ‘n held wat verlos. Hy verheug Hom met blydskap oor jou, Hy maak jou stil met sy liefde. Hy sal oor jou juig met jubelkrete.” ‘n Belofte van God se teenwoordigheid wat jy gerus met jou hele lewe kan omhels. Wat vir Israel gegeld het, geld ook vir ons in Jesus Christus.

Sefanja eindig met ‘n besondere woord van troos: “Ek sal dan afreken met almal wat jou in daardie tyd verdruk het. Ek sal die verlamdes verlos, en hulle wat uitmekaar gejaag is, bymekaar maak. Ek sal hulle roem en aansien gee in elke land waar hulle verneder is.” (vers 19). ‘n Mens kan daarin iets raaksien van die feit dat die Here baie bewus is van dié wat ter wille van ander regoor die wêreld en regdeur die eeue smaad gedra het. God tree op en stel onreg reg. Soos Hy van ons verwag dat ons reg sal doen, só sal Hyself altyd reg laat geskied, al sluit dit ook in dat Hy straf om deur die straf dinge reg te stel.

Lees meer: https://bybelskool.com/sefanja-39-20-na-die-oordeel-sal-die-here-julle-nuut-maak-met-sy-liefde/