Psalm 23 – Die Here is my Herder en my Gasheer

2 Mei

Psalm 23 – Die Here is my Herder en my Gasheer

¹‘n Psalm. Van Dawid. Die Here is my herder; ek ly nie gebrek nie. ²In groen weivelde laat Hy my rus; na water waar daar rusplek is, lei Hy my. ³Hy gee my nuwe lewenskrag; Hy lei my op die regte paaie ter wille van sy Naam. ⁴Selfs as ek in die donkerste kloof ingaan, is ek nie bang vir gevaar nie, want U is by my. Dit is u staf en u stok wat my gerusstel. ⁵U dek vir my ‘n tafel voor die oë van my teenstanders. U verfris my kop met olie; my beker loop oor. ⁶Net goedheid en troue liefde sal my volg al die dae van my lewe, en ek sal terugkeer na die huis van die Here, tot in lengte van dae.

Psalm 23 werk met twee groot metafore vir God (met erkenning aan JD Barry, Faithlife Study Bible). Hy is die Herder (vers 1) en Hy is die Gasheer (vers 5). Aan dié twee metafore word al die beloftes van die Psalm gekoppel. God kan as Herder gelowiges beskerm en as Gasheer begelei tot oorvloedige lewe, selfs deur diep donkertes en vernietigende vyandskappe. Die beloftes van hierdie Psalm is daarom vir alle seisoene van die lewe. As Herder gee die Here tye van rus en vrede. Dis tye waarin ons ervaar dat ons niks kort kom nie; dat ons rus en vrede ervaar; dat ons krag het vir ons lewenspad. As Gasheer behandel God ons as eregaste by die feesmaaltyd wat Hy voorberei het en waar jy as uitverkore gas kan aansit terwyl ander jaloers moet toekyk. Die hartlikheid waarmee God ons oorlaai, is ‘n besondere voorreg in die lewe saam met God.

Die wonder van ‘n lewe saam met God, is dat daar altyd ‘n dubbele waarde is in enige goeie en vervullende ervaring. ‘n Goeie ervaring word nie net ervaar as ‘n geluk nie, maar as ‘n geskenk, as iets wat God gegee het en wat jou nie per toeval getref het nie, maar met opset, omdat God jou liefhet. Daarom dat Dawid hier skrywe dat die Here sy Herder is, sy Koning wat hom raaksien en vir hom goeie dinge uitdeel. Dit laat hom spesiaal voel en dit gee hom rus en vrede. Dit vul hom met nuwe krag. Daardeur kry hy rigting en betekenis in sy lewe. Beleef hy tye van vooruitgang en voorspoed. Pak hy uitdagende dinge aan en ervaar dat die Here die regte pad aanwys. Baie keer is die regte pad juis dié dinge wat God se eer sal bevorder en juis ‘n manier waarop die regte pad gekies kan word.

Maar dan is Psalm 23 ook die belydenis van iemand wat ervaar dat daar donker dieptes is en wat moet worstel met die pyn van nie-weet-nie, van uitgestelde beloftes, van ondeursigtige raaisels. Dis juis dan wat hy kan bely dat hy nie bang hoef te wees nie, want God is by hom en by God is hy veilig. Hierdie vertroue verdryf nie altyd die donker nie; dit beantwoord nie altyd die vrae nie; maar, dit hou vas aan hoe God Homself deur die eeue laat ken het, as die Betroubare, as die Herder, as die Een wat dinge laat meewerk ten goede, selfs al beteken dit dat die donkerte nie onmiddellik in lig verander nie. Soms lei God se paaie egter wel uit die donkerte na die lig en soms net so verrassend heerlik dat dit voel soos ‘n feesmaal in die aangesig van die teëstanders. Dit is soos om as ‘n eregas aan te sit by die maaltyd wat God die Gasheer voorberei het. Wat jou terugbring by die besef en belydenis, dat die ware doel en sin en betekenis van die lewe, is om God te geniet en in sy teenwoordigheid vir ewig te bly. Wat op die ou end die ware rus en vrede is, dieper as die weivelde en die water en die krag, om maar net by God te wees, diep-tevrede soos ‘n kind. Psalm 23 is dus ‘n feespsalm en ‘n troospsalm. Dit is ‘n psalm vir die lewe en die dood. Dis vir al die seisoene van die lewe. En die waarheid wat in die Psalm opgesluit lê, is dat ons hele lewe altyd by God veilig is.

Lees meer: https://bybelskool.com/psalm-23-die-gebed-vir-alle-seisoene-van-die-lewe/