Openbaring 22:6-21 – Jesus beloon elkeen volgens sy optrede

29 Mei

Openbaring 22:6-21 – Jesus beloon elkeen volgens sy optrede

⁶Toe het die engel aan my gesê: “Hierdie woorde is betroubaar en waar. Die Here, die God van die geeste van die profete, het sy engel gestuur om aan sy diensknegte te wys wat binnekort moet gebeur.” ⁷“Kyk, Ek kom gou! Gelukkig is dié wat vashou aan die woorde van die profesie van hierdie boekrol.” ⁸Ek, Johannes, is die een wat hierdie dinge gehoor en gesien het. Toe ek dit gehoor en gesien het, het ek in aanbidding neergeval aan die voete van die engel wat hierdie dinge aan my gewys het. ⁹Maar hy het vir my gesê: “Moet dit nie doen nie! Ek is net ‘n dienskneg saam met jou en jou broers, die profete, en saam met diegene wat vashou aan die woorde van hierdie boekrol. Aanbid God!” ¹⁰Hy het ook vir my gesê: “Moenie die woorde van die profesie van hierdie boekrol verseël nie, want die bestemde tyd is naby. ¹¹Wie onreg pleeg, laat hy nog meer onreg pleeg; wie onrein is, laat hy nog meer onrein word; maar wie regverdig is, laat hy nog meer geregtigheid beoefen; en wie heilig is, laat hy nog meer heilig word.” ¹²“Kyk, Ek kom gou! En die beloning is by My, om elkeen volgens sy optrede te beloon. ¹³Ek is die Alfa en die Omega, die Eerste en die Laaste, die Begin en die Einde. ¹⁴Gelukkig is diegene wat hulle lang stolas was, sodat hulle reg kan hê op die boom van die lewe, en die stad deur die poorte kan binnegaan. ¹⁵Die honde bly buite, ook die towenaars en die hoereerders, die moordenaars en die afgodedienaars, en ook elkeen wat die leuen liefhet en beoefen. ¹⁶“Ek, Jesus, het my engel gestuur om teenoor julle oor hierdie dinge in die gemeentes te getuig. Ek is die wortel en die geslag van Dawid, die helder môrester.” ¹⁷En die Gees en die bruid sê: “Kom!” En laat elkeen wat luister, sê: “Kom!” En laat elkeen wat dors het, kom. En laat elkeen wat dit begeer, die water van die lewe kom kry, verniet! ¹⁸Ek getuig teenoor elkeen wat die woorde van die profesie van hierdie boekrol hoor: “As iemand iets hieraan toevoeg, sal God die plae waarvan in hierdie boekrol geskryf is, aan hom toevoeg. ¹⁹En as iemand van die woorde van die boekrol van hierdie profesie wegneem, sal God sy aandeel aan die boom van die lewe, en aan die heilige stad waarvan in hierdie boekrol geskryf is, wegneem.” ²⁰Hy wat hierdie dinge getuig, sê: “Ja, Ek kom gou!” Amen! Kom, Here Jesus! ²¹Die genade van die Here Jesus bly by julle almal.

Die boek Openbaring sluit in hoofstuk 22 af met 1) ’n prentjie van die utopiese karakter van die Nuwe Jerusalem wat herinner aan die oorspronklike paradystuin van Eden in Genesis 2 sowel as die saligspreking van Psalm 1 wat ook met ’n boom metafoor werk – vers 1-5 en 2) ’n versekering van die Here Jesus Christus se wederkoms in ’n wisselspraak tussen die engel, die Here Jesus self, die Heilige Gees, die bruid, Johannes en die veronderstelde lesers van die boek – vers 6-21. Ons het al na vers 1-6 gekyk en fokus nou op die laaste perikoop. Die feit dat die woorde van dié boek as betroubaar en eg geag word, soos die engel aan Johannes te kenne gee, gee besondere krag aan die oproep aan elke gelowige om te volhard in gehoorsaamheid. Trouens, Jesus se eerste belofte van sy wederkoms word as saligspreking daaraan verbind: “Gelukkig is dié wat vashou aan die woorde van die profesie van hierdie boekrol.” Soos in Openbaring 19 is die oomblik só groot vir Johannes dat hy weer die boodskapper probeer aanbid, maar word weereens gehelp om sy fokus op God te plaas, terwyl hy ook aangemoedig word om die woorde van die profesie wyd te versprei weens die spoedige aard daarvan in belang van die lewens van mense.

Die waarskuwing in vers 11 oor “onreg en onreinheid” versus “regverdigheid en heiligheid” kan op twee maniere verstaan word. As ’n beskrywing van wat in werklikheid gebeur – sondaars hou aan met sondig, dié wat gehoorsaam is, groei in gehoorsaamheid – óf as ’n waarskuwing aan goddeloses dat hulle op ’n pad is wat na die verderf lei en omgekeerd ’n aanmoediging aan gelowiges dat hulle moet volhou op die pad wat na die volle gemeenskap met God lei. Die belofte van ‘n beloning van die Here Jesus word nie aan hulle saligheid gekoppel nie, maar aan hulle gehoorsaamheid. Dié gehoorsaamheid word gekontrasteer met die ongehoorsaamheid van diegene wat nie deel van die paradys sal hê nie – honde (seksuele perverte), towenaars, onsedelikes, moordenaars, afgodsaanbidders en leuenaars – ’n soortgelyke lys as wat in hoofstuk 21 gegee is. Die idee van ‘n beloning word regdeur die Bybel gevind en is ‘n belangrike deel van ons motivering om vir die Here te leef met alles wat ons het en is. Jesaja beskryf dit as die voorreg om die “vrug van ons dade te geniet” (Jes 3:10-11). Jesus beskryf dit as die vergoeding wat God gee vir dié wat ander help sonder om iets terug te verwag (Luk 14:14). Paulus beskryf dit as God se beloning vir ons werk. (1 Kor 3:8, 12-15; 9:17-18) Vergelyk ook die volgende verwysings: Job 34:11; Ps 28:4; 62:12; Jer 17:10; Matt 12:36; 16:27; Gal 6:7; Rom 2:2, 6-11, 16; 14:10-12; 2 Kor 5:10; Ef 6:8; Openb 2:23; 11:18; 20:12.

Die Gees en die bruid eggo die belofte van die Here Jesus se koms met die byvoeging dat daar nog genadetyd beskikbaar is vir dié wat dors het en luister. Hy is immers die Wortel en Nakomeling van Dawid (vgl Jes 11:1), die helder Môrester (Num 24:17). Johannes bevestig self oor die inhoud van sy boek dat dit gesagvol is, een van die redes waarom die boek uiteindelik in die kanon ingesluit is, komende van ’n apostel wat die Here Jesus op aarde geken het. Niemand mag hieraan verander nie, anders sal hy of sy nie net die plae wat in die boek beskryf is, ondervind nie, maar ook uit die Boek van die Lewe uitgeskryf word. Die boek sluit met die derde belofte van die Here Jesus Christus dat Hy op pad is om terug te keer, waarop die kerk asof in ’n liturgie antwoord: “Amen! Kom, Here Jesus!”, asook ’n seënbede in die naam van die Here Jesus en sy genade.

Lees meer (dit is my boek oor Openbaring wat jy gerus gratis kan aflaai om die hele Openbaring deur te werk): https://ngkerksomerstrand.co.za/wp-content/uploads/2020/05/Ek-kom-gou.pdf