Jeremia 1:11-19 – Hulle sal teen jou veg, maar nie die oorhand oor jou kry nie, want Ek is by jou

21 Augustus

Die RCL gebruik weer Jeremia 1:4-10 soos vroeër die jaar. Jy kan my vorige bydrae daaroor hier lees: https://bybelskool.com/jeremia-14-10-ek-is-by-jou-om-jou-te-red-ek-le-my-woorde-in-jou-mond/. Ek gebruik vandag dus eerder vers 11-19.

Jeremia 1:11-19 – Hulle sal teen jou veg, maar nie die oorhand oor jou kry nie, want Ek is by jou

¹¹Die woord van die Here het tot my gekom: “Wat sien jy, Jeremia?” Ek het geantwoord: “Ek sien die tak van ‘n amandelboom.” ¹²Toe sê die Here vir my: “Jy het goed gekyk, want Ek is bedag daarop om my woord uit te voer.” ¹³Die woord van die Here het ‘n tweede keer tot my gekom: “Wat sien jy?” En ek het geantwoord: “Ek sien ‘n stomende pot – sy inhoud kook van die noordekant af oor.” ¹⁴Toe sê die Here vir my: “Uit die noorde sal die onheil losbreek oor al die inwoners van die land. ¹⁵Want kyk, Ek gaan al die familiegroepe van die koninkryke in die noorde oproep,” is die uitspraak van die Here, “en hulle sal kom en hulle sal elkeen sy troon neersit by die ingang van Jerusalem se poorte, en by al haar stadsmure reg rondom, en by al die dorpe van Juda. ¹⁶Ek sal my oordele oor hulle uitspreek weens al hulle boosheid – omdat hulle My verlaat het, vir ander gode offers verbrand het en voor hulle handewerk in aanbidding gebuig het. ¹⁷Maar jy, jy moet jou heupe omgord, gereedmaak en vir hulle alles gaan sê wat Ek jou beveel. Moenie vir hulle bang wees nie, anders gee Ek jou ‘n rede om vir hulle bang te wees. ¹⁸En Ek, kyk, Ek maak jou vandag ‘n versterkte stad, ‘n ysterpilaar en ‘n koperstadsmuur teen die hele land – die konings van Juda, Jerusalem se hoë amptenare, haar priesters en die volk van die land. ¹⁹Hulle sal teen jou veg, maar sal nie die oorhand oor jou kry nie. Want Ek is by jou,” is die uitspraak van die Here, “om jou te red!”

Jeremia se roeping word as ’n gesprek tussen God en Jeremia uitgebeeld, soos meermale die geval was met ander Bybelfigure wat deur God geroep is – Abraham, (Gen 12), Moses (Eks 3), Samuel (1 Sam 3), Jesaja (Jes 6), Esegiël (Eseg 1) ensomeer. Trouens, dié tipe gesprek tipeer hulle verhouding met die Here.  Gesprek met God stempel die pad wat Hy met hulle loop. Wat veral uitstaan uit die eerste deel van sy roeping – vers 1-10 – is dat die Here Jeremia aangestel het as ‘n profeet vir die nasies: “om uit te ruk en af te breek, om ten gronde te laat gaan en plat te slaan, om te bou en te plant.” Jeremia se reaksie daarop was om sy jonkheid as hindernis voor te hou. Die Here is egter nie daardeur van stryk gebring nie en praat hom moed in met twee visioene – vers 11-19.

Die twee visioene bevestig dat God gaan optree (tak van ‘n amandelboom) — God sê letterlik Hy “staan wag” oor sy woorde, om te doen wat Ek gesê het — en dat die oordeel uit die noorde sal kom (die stomende pot). Die leërs van Assirië en Babilon kom natuurlik van die ooste, maar het telkens uit die noorde ingeval om die tog deur die Trans Jordaniese woestyn oos van Juda te vermy.

Die betroubaarheid en sekerheid van God se woorde tref ’n mens opnuut. Die woorde, soos telkens in die res van die profesieë van Jeremia, verwys duidelik na die vloeke en seën van die verbond, soos in Levitikus 26 en Deuteronomium 28 aan die volk voorgehou is. Die seën en die straf word uitgespel in terme van die ekologie, ekonomie, gesondheid, en die politiek.  Dit is die agtergrond en basis vir wat Jeremia regdeur die boek gaan sê.  Die negatiewe kant van die beloftes van Levitikus en Deuteronomium gaan dus hier in vervulling. Dit sal darem opgevolg word met die seën van die Here in ‘n nuwe toekoms, soos veral Jeremia 30-34 sal uitspel.

Aan hierdie roeping word daar daarby ’n persoonlike belofte gekoppel dat die Here Jeremia sal staande hou, uitgedruk met drie metafore: ’n versterkte stad, ’n ysterpilaar, en ’n koperstadsmuur.  Die Here sal by hom wees om hom te red en te sorg dat hy nie oorweldig word nie. “Hulle sal teen jou veg, maar sal nie die oorhand oor jou kry nie. Want Ek is by jou.” Iets wat ons ook vir onsself kan toeëien vir die roeping wat die Here vir ons het.

Lees meer: https://bybelskool.com/jeremia-1-jeremia-geken-gevorm-geheilig-en-gekies/