Henog

Ek het ‘n navraag gekry oor die Bybelse Henog.  Hier is ‘n paar feite wat jou gedagtes oor hom en sy betekenis kan stimuleer

Daar is 4 mense wat Henog genoem word in die Bybel:

1. Henog, die seun van Kain. Die stad wat deur Kain gebou is, is na hom vernoem, Gen. 4:17-18.
2. Henog die afstammeling van Set, seun van Jered. Dit is die bekende Henog waarvan ons lees in Gen. 5:18-24. Hierdie Henog word ook in latere geslagslyste genoem: 1 Kron. 1:3; Luk. 3:37, sowel as in Hebreërs 11:5 en Judas 14.
3. Henog (Ganok), seun van Midian, kleinseun van Abraham en Ketúra, Gen. 25:4; 1 Kron. 1:33.
4. Henog (Ganok), oudste seun van Ruben, die oudste seun van Jakob, Gen. 46:9; Eks. 6:13; 1 Kron. 5:3. Sy nakomelinge vorm die geslag van die Henogiete (Ganokiete).

Drie belangrike tekste oor Henog om sy betekenis te begryp

Genesis 5:28-24

“Henog het met God gewandel; en hy was daar nie meer nie, want God het hom weggeneem”.

Hebreërs 11:5

“Omdat Henog geglo het, is hy weggeneem sonder dat hy gesterf het, en hy was nêrens te vind nie, omdat God hom weggeneem het. Van hom word getuig dat hy, voordat hy weggeneem is, geleef het soos God dit wou.”

Judas 14-16

“Dit is oor hierdie mense dat Henog, wat van die sewende geslag ná Adam was, geprofeteer het. Hy het gesê: ‘Kyk, die Here kom met sy duisende heilige engele en Hy sal oor almal oordeel. Hy sal al die goddeloses, al die sondaars straf oor al die goddelose dinge wat hulle in hulle goddeloosheid gedoen het, en oor al die lasterlike dinge wat hulle teen Hom gesê het.’ Hierdie mense kla gedurig en is altyd ontevrede met hulle lot. Hulle leef net volgens hulle eie begeertes, praat groot en sê vleiende dinge van mense om daaruit vir hulleself voordeel te trek.”

Die aanhaling in Judas kom uit die “Boek van Henog” waarvan aanvanklik net brokstukkies bekend was, totdat in 1773 ‘n Ethiopiese vertaling gevind is waarin dit in sy geheel bewaar is.  Lees dit hier.