Spreuke 1:1-7 – Ontsag vir die Here is die begin van kennis; wysheid en vermaning

17 Junie

Spreuke 1:1-7 – Ontsag vir die Here is die begin van kennis; wysheid en vermaning

¹Die Spreuke van Salomo, seun van Dawid, die koning van Israel: ²om vertroud te raak met wysheid en vermaning, om woorde van insig te verstaan; ³om vermaning wat begrip kweek, te ontvang, begrip vir wat regverdig en billik en reg is; ⁴om onkundiges vernuf aan te leer, jongmense kennis en goeie oordeel ⁵– ‘n wyse sal luister en geleerdheid vermeerder, en ‘n verstandige sal leierskap verwerf – ⁶om ‘n spreuk en ‘n gesegde te begryp, die woorde van wyses en hulle raaisels. ⁷Ontsag vir die Here is die begin van kennis; wysheid en vermaning – net sotte verag dit.

Spreuke beklemtoon in die eerste plek dat wysheid van God af kom. In alles moet jy dus met God begin. Spreuke wil jou ‘n ekspert in die lewe maak. Die boek wil jou kapasiteit vir wysheid bou, sodat jy met wysheid kan optree. Dit sal jou help:

• Om te weet wanneer iemand verstandig praat (Spr 1:2);
• Om ‘n sin vir regverdigheid te ontwikkel (Spr 1:3);
• Om met goeie oordeel op te tree (Spr 1:4);
• Om tot dieper insig te kom (Spr 1:5-6);
• Om nie toe te gee as daar verleiding of dwaasheid oor jou pad kom nie (Spr 1:7).

Die klem op kennis en goeie oordeel (oorleg) in vers 4 tref ‘n mens. Let op dat dit nie teoreties bedoel word nie, maar prakties. Dit gaan ook nie net oor kennis as sodanig nie, maar oor kennis en goeie oordeel. Oordeel kan ook vertaal word met onderskeiding of beraadslaging. Dit veronderstel ’n deurdink van die implikasies en betekenis van kennis, en dit ook nie net op jou eie nie, maar saam met ander, soos Spreuke ook in hoofstuk 11:14 nog verder in terme van leiers en die gemeenskap sal beredeneer. Kennis en goeie oordeel is dus nodig om reg te kan optree. Hierdie tipe wysheid is vir die lewe saam met ander bedoel! Dieselfde geld ‘n sin vir regverdigheid en billikheid in vers 3. Dit is iets wat jy aanleer. Dit is iets wat jy beoefen. Dit is iets waarin jy groei. Maar dit is ‘n leerervaring wat met die gemeenskap te make het. Dit is immers waar jy die regverdigheid moet beoefen. En dit is die basis van ’n goeie en behoorlike opvoeding – dat jy tereg kom in die gemeenskap met God en met ander.

Die eerste ding wat ‘n mens egter moet leer om hierdie tipe wysheid te bekom, begin nie met die gemeenskap as sodanig nie, maar met die “vrees van die Here“, wat in vers 7 vertaal word met “ontsag vir die Here.” Die tipe kennis wat Spreuke dink die moeite werd is, begin met die bewussyn en ontsag vir die Here. Sonder hierdie ontsag vir God raak jy eintlik self god en draai jou lewe te maklik net om jouself. Om die waarheid te sê, sonder ontsag vir God raak dit ook vir jou moeilik om na ander te luister, veral na die rolmodelle wat met ontsag vir God lewe. Peterson vertaal daarom vers 7 met: “Start with God—the first step in learning is bowing down to God.” (The Message). Dit is ook die oorhoofse beginsel vir alles wat Spreuke gaan sê, en waarin die wysheid ook opgesluit lê. Soos kennis by die ontsag vir die Here begin, so begin wysheid ook daarmee (vgl Spr 9:10). Spreuke moedig jou dus aan om beproefde wysheid te beoefen. Beproefde wysheid bring insig, onderskeiding en oorleg. Besluit om die beproefde wysheid van Spreuke jou gedagtes en gedrag te laat vorm.

Lees meer: https://bybelskool.com/spreuke-11-33-begin-met-god/