Maleagi 3:1-5 – God reinig en suiwer sodat ons aan Hom kan behoort

29 November

Maleagi 3:1-5 – God reinig en suiwer sodat ons aan Hom kan behoort

¹“Kyk, Ek gaan my boodskapper stuur en hy sal ‘n pad voor My gereedmaak. Onverwags sal hy na sy tempel kom, die heer na wie julle soek, die boodskapper van die verbond na wie julle uitsien. Kyk, hy gaan kom,” sê die Here, Heerser oor alle magte. ²Wie kan die dag van sy koms verduur, wie kan staande bly wanneer hy verskyn? Ja, daardie dag is soos die vuur van die smelter en soos die loog van wassers. ³Hy sal gaan sit as iemand wat silwer smelt en suiwer. Hy sal die Leviete reinig en hulle soos goud en silwer suiwer. Hulle sal aan die Here behoort, en offers in geregtigheid bring. ⁴Dan sal Juda en Jerusalem se offers weer vir die Here aangenaam wees, soos in die ou dae, soos in vroeër jare. ⁵“Ek sal na julle toe kom vir die oordeel en Ek sal sonder om te huiwer ‘n getuie wees teen towenaars, egbrekers en wie vals sweer; teen hulle wat dagloners, weduwees en vaderlose kinders verdruk en hulle wat vreemdelinge wegwys en nie ontsag vir My het nie,” sê die Here, Heerser oor alle magte.

In hierdie tweede week van Advent lees ons Maleagi 3 wat fokus op die probleem wat die volk met God gehad het – sy oënskynlike gebrek aan optrede om iets aan die probleem van boosheid en onreg te doen. Dié vraag maak die Here egter skoon “moeg”, omdat dit só ver van die waarheid af is. God het nie verander nie – hulle het! Trouens, Hy sal reg laat geskied ten spyte van hulle ongeregtigheid. In hulle tyd. Soos die mense van Maleagi se tyd dit ervaar het met die hervormings van Esra en Nehemia.

Die Here se agent van verandering word egter ook in eskatologiese taal geskets. Sy boodskapper, sy verbondsengel, het die gesag en die mag om die volk te suiwer om die Here op die regte wyse te kan dien. In die NT word dié boodskapper met Johannes die Doper verbind (Mark. 1:2-3; Matt. 11:10,14). Hy het die weg voorberei vir die Messias wat die boosheid aan die kruis oorwin, en ‘n nuwe koninkryk aangekondig het.

Ons moet dus nie kyk na die relatiewe teë- of voorspoed wat ons of ander mense ervaar nie, maar eerder hierdie belofte van God omarm dat Hy uiteindelik alles sal regstel. Dan sal ons getrou kan bly, selfs al sien ons dat boosheid nog floreer in hierdie wêreld. Want, dit is mense vir wie die beloftes van God genoeg is, wat uiteindelik sal ervaar dat die Messias, die Here Jesus Christus, alles sal verander. Dit is op Hom en die sekerheid dat sy ewige koninkryk sal seëvier wat ons opnuut in hierdie Advent fokus.

Lees meer: https://bybelskool.com/maleagi-217-46-god-sal-reg-laat-geskied-ten-spyte-van-hulle-ongeregtigheid/