Lukas 1:67-80 – God bewerk vir ons ‘n kragtige verlossing deur die Here Jesus

20 November

Lukas 1:67-80 – God bewerk vir ons ‘n kragtige verlossing deur die Here Jesus

⁶⁷Sagaria, sy pa, is hierna met die Heilige Gees vervul en het geprofeteer en gesê: ⁶⁸“Lofwaardig is die Here, die God van Israel, want Hy het omgesien na sy volk en hulle bevryding bewerkstellig. ⁶⁹‘n Kragtige verlossing het Hy vir ons bewerk uit die nageslag van Dawid, sy dienskneg, ⁷⁰soos Hy reeds lank gelede by monde van sy heilige profete beloof het – ⁷¹verlossing van ons vyande en uit die hand van almal wat ons haat. ⁷²Dit het Hy gedoen om ontferming aan ons voorvaders te bewys en sy heilige verbond in gedagte te hou, ⁷³die eed wat Hy teenoor ons vader Abraham gesweer het, sodat ons, ⁷⁴gered uit die hand van ons vyande, Hom sonder vrees sou dien, ⁷⁵en al ons dae voor Hom in heiligheid en geregtigheid kan leef. ⁷⁶En jy, kindjie, profeet van die Allerhoogste sal jy genoem word, want jy sal voor die Here uitloop om sy paaie gereed te maak, ⁷⁷en om sy volk in te lig dat hulle verlos kan word deur die vergewing van hulle sondes, ⁷⁸danksy ons God se innige ontferming, waardeur die môreson uit die hoogte oor ons sal opkom, ⁷⁹om te skyn oor diegene wat hulle in die duisternis en in die skadu van die dood bevind, en om ons voete op die pad van vrede te plaas.” ⁸⁰Die kindjie het gegroei en sterk geword deur die Gees. Hy het in die woestyngebiede gewoon totdat hy in die openbaar voor Israel begin optree het.

Die profesie van Sagaria word deur die eeue die Benedictus genoem. Dit kom van die eerste woord van sy loflied in die Latynse vertaling: “Blessed be the Lord”. Sagaria profeteer onder leiding van die Heilige Gees:

• oor die Verlosser wat volgens die belofte die volk weer toegewy (heilig) en opreg (regverdig) en sonder vrees vir hulle vyande sal laat lewe (1:68-75), en
• oor die voorloper, Johannes (die naam beteken God is genadig), wat die pad vir Hom sal voorberei, interessant genoeg om hulle deur vergifnis en die lig wat Hy gee op die pad van vrede te laat loop (1:76-79).

Sagaria se loflied het ‘n aantal aanhalings of toespelings uit die Psalms (18:2; 105:8-9; 106:9-10; 148:4) en die profete, veral Jesaja (9:1-2; 11:1-10; 40:3). God kom hulle van hulle vyande verlos deur hierdie Verlosser. Hy sal hulle kom bevry van almal wat hulle haat, wat hulle verbintenis aan God wil verbreek. God kom hulle deur hierdie Verlosser bevry dat hulle Hom “sonder vrees kan dien met toewyding en opregtheid voor Hom.” “Al ons dae”! (vers 74-75) En hierdie toesegging gaan terug op die verbond met Abraham (Luk 1:73 – Gen 12:1-3; 17:1-27) en die belofte aan Dawid (Luk 1:69 – 2 Sam 22:3). Want aan hulle het God belowe dat Hy ‘n ruimte sal gee waar hulle God kan dien, sonder om bang te wees vir hulle vyande, waar hulle geseënd kan wees, en tot ‘n seën vir ander sal wees. God het belowe dat Hy sal afreken met die sonde, die vyand van binne.

Heilig en opreg – “met toewyding en opregtheid voor Hom” – dit is God se doel met sy volk. In ‘n noue verhouding met Hom, so heilig soos Hy is, en onberispelik na buite in die gemeenskap. Die feit dat Sagaria profeteer dat dié Verlosser uit die huis van Dawid sou kom, is betekenisvol, want dit versterk die idee dat Maria ‘n verbintenis met die stam van Juda gehad het. Dit beïnvloed die interpretasie van Jesus se geslagsregister, soos ons later gaan hanteer.

Daarvoor, sê Sagaria, het God hulle ook van hulle sonde kom verlos. Om hulle te leer hoe om uit die duisternis van die sonde, “die skaduwee van die dood” te beweeg na die pad van vrede, waarin hulle sonde vergewe is, en hulle in die lig van die Môreson, ‘n beskrywing van die Here Jesus (Mal 4:2; 2 Pet 1:19), kan lewe (vers 76-79). Vrede beskryf hier die kalmte van hart wat God bring, en die krag van oortuiging om sy wil te doen in die lewe. En Johannes sal die voorloper wees, die een wat die volk sal voorberei om die verlossing te ontvang wat die Messias sal bring.

Johannes het grootgeword en is geestelik versterk (bekragtig deur/in die g[G]ees). Dit kan geestelik of Geestelik verstaan word. Maar let op, dat sy openbare bediening eers gebeur op die tyd wat God bepaal. Daar is vir hierdie voorloper ’n tyd van voorbereiding nodig soos dit ook was met heelwat ander Godsfigure, Moses en Dawid in die OT, en in die NT, Jesus en Paulus.

Lees meer: https://bybelskool.com/lukas-11-56-twee-godsmanne-word-vir-twee-godsvroue-belowe/