Skip to main content

Jeremia 43 – Jeremia word teen sy sin saamgeneem na Egipte

Jeremiah lamenting - Rembrand van RijnHierdie hoofstuk vertel aan die een kant van die teleurstellende reaksie van die Joganan en die ander leiers op die antwoord wat die Here aan hulle gee deur die profeet Jeremia. Hulle kop het in elk geval in die rigting van Egipte gestaan, en dit is presies wat hulle nou doen.  Só verspil hulle die kans om God se bewaring in aksie te sien.

Aan die ander kant vertel die hoofstuk van die woord van die Here wat ook daar in Egipte na Jeremia toe kom, hierdie keer weer in die gedaante van ’n simboliese handeling wat hy moet uitvoer.  Die Here word dus nie gedwarsboom deur die ongehoorsaamheid van die Joodse leiers nie.  Hy laat van Hom hoor selfs in die vreemde.

43:1-7 – Joganan vat die oorblyfsel van Juda na Egipte toe

Die leiers tree hooghartig (vermetel) op deur die woord wat die Here vir hulle gee om aan Babel onderdanig te wees, te verwerp: “Jy lieg!” sê hulle vir Jeremia.  Hulle beskuldig vir Baruk dat dié Jeremia teen die leiers opstook om hulle in die mag van die Galdeërs te laat beland.

Niemand wil die Here gehoorsaam en in Juda bly nie.  Daarom neem Joganan-hulle die hele oorblyfsel van Juda na Egipte toe en gaan bly in Tagpanges (vandag Tel Defne, aan die Menzalameer in Noord-Egipte, in die Nyl-delta, teenaan die Suez kanaal).  Opgrawings het verskeie klei artifakte opgelewer wat uit dié tyd kom.

43:8-13 – Jeremia verkondig die val van Egipte aan die hand van Nebukadnesar

Die Here is egter selfs in Egipte in beheer nie net van sy profeet nie, maar ook van die situasie.  Hy gee aan Jeremia opdrag om klippe te begrawe in die kleivloer van die ingang na die farao se paleis in Tagpanges.  Daar sal die klippe as basis dien vir die troon van Nebukadnesar wanneer hy Egipte sal onderwerp en hulle gode vernietig.  “Hy sal Egipte so skoon stroop soos wanneer ’n skaapwagter luise soek in sy klere!”  Bet-Semes beteken “tempel van die son”.

Boodskap

Hierdie kort hoofstuk maak twee opmerkings oor die verhouding tussen God en sy mense.

  1. Dit is dwaas om iets van die Here te vra, en dit dan nie te doen nie.  Daarmee verraai jy net jou eie rebellie en opstand teen die Here. Vra dan liewer niks nie, en volg jou eie kop. Maar moenie vra, en dan nie die wil van die Here doen nie. Goeie raad vir enigeen van ons.
  2. Die Here is alomteenwoordig besig om sy wil in die lewe ten uitvoer te bring, selfs ook in Egipte, selfs in ’n situasie waarheen sy profeet teen sy sin ontvoer is.  Dit is die troos in hierdie verhaal van verspilde kanse.  God laat Homself nie onbetuig in die lewe van sy mense nie.

Jeremia


Chris van Wyk

Ek is gemeenteleraar by Somerstrand gemeente, Port Elizabeth. My passie in die lewe is om God bo alles te dien en gelowiges in geloofsvorming te begelei. I am pastor at Summerstrand congregation, Port Elizabeth. My passion in life is to serve God above all and to lead believers in faith formation.

Maak 'n opmerking

  • Chris van Wyk on 1 Kronieke 28-29Groete!
  • Wansen Engelbrecht on 1 Kronieke 28-29Baie dankie. Groetnis Wansen Engelbrecht Klerksdorp
  • Chris van Wyk on Genesis 1:1-2:3Is dit op 'n selfoon?
  • Johan Kirsten on Genesis 1:1-2:3Middag Chris. Ek merk dat as jy op die "menu" hierbo tik, die blok wat aan die linkerkant verskyn, blanko is. Daar is wel "onsigbare" skakels wat jou na die verskillende bladsye neem. Groete. Johan
  • Chris van Wyk on Psalm 11Dankie, Jenny. Ek het self weer baie moed uit dié Psalm 11 gekry. Veral uit die feit dat ons nie baie beheer het oor die fondamente nie, maar op God kan vertrou wat opregtes suiwer en goddeloses skroei, soos dit in die laaste deel van die Psalm uitgespel word. God kan oneindig meer doen as wat ons k…
  • Jenny on Psalm 11Baie dankie vir die boodskap wat weereens soos vorige boodskappe my help om deur baie swaar tye te kan kom. Die laaste jaar is daar so baie berge wat my toesak dat ek net kan vasklou aan God se woord en U maak dit makliker om sekere dinge beter te verstaan en net aan te hou glo en vertrou. Baie dank…
  • Chris van Wyk on Die Twaalf Kleiner ProfeteDankie Johan, waardeer.
  • Johan v Zyl on Die Twaalf Kleiner ProfeteHi Chris net so baie dankie vir die enorme werk wat jy in Bybelskool doen. Ek gebruik dit elke dag in my bediening hier in Lichtenburg Klipkerk. Ek het op 60 die Bybel herontdek met nuwe passie . Jesusliefde Johan v Zyl
  • Chris van Wyk on Salwing in die BybelEk is bly, Stoffie, dat ek kon help. Die waarhede in die Skrif is ons diepste en enigste beskerming teen dwaling.
  • Stoffie Van Dyk on Salwing in die BybelEk het die afgelope Sondag 'n diens bygewoon wat my baie ontstem het - mense in die gehoor is gesalf deur 'n "profetes", en snaakse dinge het gebeur. Hierdie hele skrywe oor die salfgebruik, en van die antwoorde op vrae was vir my baie leersaam omdat dit vir my Skriftuurlik is. Baie dankie
  • Chris van Wyk on 2 Samuel 18Dankie Lesley, waardeer.
  • Lesley Barnard on 2 Samuel 18Pragtig, ñ mooi toepaslike verduideliking.
  • Chris van Wyk on 2 Samuel 17Hi Hettie. Daar is twee letters in Hebreeus wat amper dieselfde geskryf word, maar verskillend uitgespreek word. Daar is die normale h wat uitgespreek word soos ons dit normaalweg doen. Dan is daar egter ook die letter ḥ (geskryf met 'n h met 'n punt onder) wat anders uitgespreek word. Die uitspraak…
  • Hettie Swart on 2 Samuel 17Baie dankie vir die oopbreek van die Woord. Ek sien dat my Bybel 35 vertaling na Husai verwys en nie Gusai soos in die Bybelstudie aangetoon word nie. Is dit verskillende uitsprake vir dieselfde mens? Help my reg asseblief.
  • Chris van Wyk on Josua 2 – Ragab se ontsag vir Jahwe spaar die verkenners se lewe👍