LUKAS 2:1-7 – Jesus word gebore in Betlehem

¹Dit het gebeur in daardie dae dat ’n dekreet van keiser Augustus uitgegaan het dat die hele wêreld geregistreer moes word.

²Hierdie eerste sensus het plaasgevind toe Sirenius oor Sirië goewerneur was.

³En almal het gegaan om geregistreer te word, elkeen na sy eie stad toe.

⁴En ook Josef het opgegaan vanaf Galilea uit die dorp Nasaret na Judea, na die stad van Dawid wat Betlehem genoem word, omdat hy uit die huis en nageslag van Dawid was,

⁵om geregistreer te word saam met Maria wat aan hom verloof was, wat swanger was.

⁶Dit het gebeur terwyl hulle daar was dat die tyd vir haar gekom het om geboorte te gee,

⁷en sy het geboorte gegee aan haar eersgebore Seun, en sy het Hom in doeke toegedraai en Hom neergelê in ’n krip, omdat daar nie vir hulle plek was in die herberg nie.

Teks en konteks

Nadat Lukas in hoofstuk 1 verhale vertel het wat nie in die ander evangelies voorkom nie – verhale wat sentreer om die aankondigings rondom Johannes en Jesus en die reaksies wat dit by Maria, Elisabet en Sagaria uitlok – sluit hy in hoofstuk 2 dieselfde verhaal as Matteus (1:18-25) oor die geboorte van Jesus in. Die res van die hoofstuk is daarna weer eie verhale, wat nie in die ander evangelies voorkom nie.

2:1-3 Lukas verbind die verhale van die Verlosser aan die gebeure op die wêreldfront ter wille van die konteks daarvan. Hy noem keiser Augustus (regeer van 27 vC tot 14 nC) en goewerneur Sirenius van Sirië. Eersgenoemde omdat Palestina deel van die Romeinse ryk was, en laasgenoemde omdat hy waarskynlik die hele Palestynse gebied se volkstelling gereël het (volgens sommige historici was Quirenius Varus toe goewerneur, met Sirenius waarskynlik ’n militêre veldheer wat Varus bygestaan het).

Die volkstelling het in 8-6 vC plaasgevind, wat min of meer die tyd is toe Jesus gebore is. Hierdie volkstelling, sê Lukas, was die eerste van sy soort. Daar was ook ‘n tweede volkstelling (Hand 5:37) toe daar ‘n volksopstand was deur Judas, die sogenaamde Galileër.

2:4-5 Bethlehem – 85 km van Nasaret af en 8 km suid van Jerusalem – is die stad van Dawid. Die naam is nogal betekenisvol. Die naam beteken letterlik: “huis van brood” en is die plek waar Rut en Naomi (in die Rigterstyd) nie net fisiese brood gekry het nie, maar Rut, die Moabiet, ook met haar troue met Boas Jesus se voorouer geword het.

Gegewe dat Josef-hulle arm was – hulle kon net twee duiwe bekostig eerder as ‘n lam met hulle offer by die tempel – is dit heel waarskynlik dat dié reis te voet afgelê is. Die idee van ‘n donkie vir die reis kom uit die tradisie van hierdie gebeure, nie uit die Bybel self nie.

2:6-7 Let ook op dat Jesus gebore word in nederige omstandighede in ‘n krip. Ironies, gegewe die betekenis van dié geboorte! Daar was egter nie vir hulle plek in die normale akkommodasie nie.

Waarskynlik word hier verwys na ‘n gastekamer by familie – waar daar nie vir hulle plek was nie – eerder as na ‘n herberg. ‘n Ander Griekse woord (kataluma) word hier gebruik as dié vir herberg (pandocheion – vgl Luk 10:34 waar verblyf in ‘n herberg vir die man wat onder die rowers geval het, deur die barmhartige Samaritaan verskaf word).

Die geboorte vind waarskynlik ook plaas in ‘n grot wat aan die huis of langs die huis vir die diere gebruik is, nie ‘n stal per se nie, soos die kerkvader Justinus die Martelaar vroeg in die 2de eeu nC skryf.

Later sal hulle egter in ‘n huis in Betlehem bly.

Betekenis en boodskap

1. Ons lewens vind altyd plaas teen die agtergrond van wat in die wêreld, ons land en gemeenskap gebeur. Dink na, soos Lukas, oor wat aan die gang is in hierdie drie sirkels van jou lewe. Lees daaroor, dink ná daaroor, en skryf in jou joernaal die dinge wat jou tref daarvan neer. Hou vol daarmee, want die betekenis van die gebeure kom in die herhaalde besig wees daarmee.
2. Bid oor die impak van gebeure in die wêreld, ons land en jou gemeenskap op jou lewe. Bid oor die impak wat jy ook daarop kan hê. Oorweeg hoe die Here jou wil gebruik in dié dinge waarop jy ‘n invloed kan uitoefen. Moenie die effek van gehoorsaamheid onderskat in ‘n tyd van ontwrigting nie. Maria-hulle eindig in ‘n stal in baie moeilike omstandighede … en die Verlosser van die wêreld maak sy opwagting!