Hebreërs 8:1-13 – Jesus Christus is die Middelaar van ’n beter verbond
In hierdie hoofstuk word die eerste gevolg van Jesus se Hoëpriesterskap uitgespel. Hy is die Middelaar van ’n beter verbond, die vervulling van die nuwe verbond soos Jeremia reeds in die 6de eeu v.C. voorspel het in Jer. 31:31-34 (vgl. wat ek daaroor geskryf het: Jeremia 31:2-40 – Ek sluit ’n nuwe verbond met julle).
Dit hang saam met die feit dat die vorige verbond met sy priesterlike bediening vanuit ‘n aardse tabernakel/tempel vanweë die aardsgebondenheid daarvan onvolkome was. Trouens die aardse tabernakel is gebou na die voorbeeld van die hemelse een in opdrag van die Here (Eks. 25:40). Daarom het dit wel baie waarde gehad, maar was dit vanselfsprekend net ’n afbeelding en daarom ’n skadubeeld van die hemelse heiligdom.
Jesus het die heiligdom van God in die hemele betree en sit aan die regterkant van God van waar Hy ’n besondere magsposisie beklee. Hy maak nou die belofte van God in Jeremia dat daar ’n nuwe verhouding/verbond tussen God en sy mense tot stand sal kom, vir almal wat in Jesus Christus glo waar. Daarmee vervang God die ou verbond dan ook met die nuwe verbond.
In vers 8-12 haal die skrywer die belofte van Jeremia aan en verduidelik daarmee dat die Here in Jesus die gebreke van die Ou Verbond kom herstel het, spesifiek die feit dat die volk die verbond kon verbreek, al was God getrou aan hulle. Dit doen Jesus deur die wet (woorde) van die verbond as ’n interne werklikheid in hulle harte en verstand te skrywe wat hulle op ’n onverbreekbare manier aan Hom sal verbind. Die sekerheid van die nuwe verbond is dus volledig in God se aksie in ons lewe geleë. God gee ons dus die innerlike motivering en krag wat nodig sal wees vir die nakoming van die wet in die nuwe verbond.
Nie dat dit nie nog altyd die droom van God vir sy mense was nie (Deut. 6:6 – “hierdie woorde moet in jou hart wees”), maar God maak self in Jesus die droom nou ’n werklikheid. Die wonder is verder dat elkeen wat in Jesus Christus glo, sal deel in dié werklikheid, van die kleinste tot die grootste. In Jesus Christus het die vervulling van die nuwe verbond van Jeremia nou beslissend aangebreek.
Boodskap
Die wonder van Jesus Christus se Middelaarskap lê in die sekerheid wat dit bring. Jesus staan nie net tussen God en ons nie. Hy staan by God vir en ter wille van ons. Hy neem verantwoordelikheid vir ons om ons nie net in ’n intieme verhouding met God te bring nie, maar ons ook daarin te hou. In Jesus kan ons dit ervaar dat God ons God wil wees, en dat Hy sorg dat ons sy volk kan wees. Ons sekerheid is dus nie geleë in ons eie gehoorsaamheid nie, maar in Jesus s’n.
Ekleer
Sjoe – ek raak sommer opgewonde om so die woord te ondersoek! In die tempel het geen hoe priester ‘n sitplek gehad nie, maar deur dat God Jesus uitnooi om te kom sit aan Sy regterhand (ps 110:1) beteken dat Hy Jesus as offer aanvaar het (Heb 10:12)
Louwena Brand
Vir my was dit weereens ‘n wonderlike bevestiging dat Jesus Christus by God staan VIR en TERWILLE VAN ONS! Prys die Here!!
Dankie vir u wonderlike insette om die Bybel vir ons “oop te sluit” Dis heeeeerlik om saam met u Bybelstudie te kan doen!
Alle eer aan God!
Chris van Wyk
Dankie Louwena – Hebreërs is ‘n wonderlike boek!
Jaco
Wat beteken dit vir ons as die skrif sê: dat die nuwe verbond met die huis van Juda en die huis van Israel gesluit word en dat die wette nou in hulle harte gesit word. Beteken dit dat ons deel van die huis van Juda en Israel is.
Chris van Wyk
Hi Jaco, ja, ons raak deel van die ware Israel, soos Paulus daaroor skrywe in Romeine 9-11.