Wees versigtig vir die verkeerde idees oor Kersfees
Ek het ‘n navraag gekry oor die gewaande heidense oorsprong van Kersfees.
Ek sal egter versigtig wees vir die artikels wat Kersfees met afgodery verbind. Dit berus op swak navorsing. Ook die idee dat Kersfees uit ‘n heidense fees ontwikkel het. Die waarheid is dat dit andersom ontwikkel het. Heidene het Kersfees vir hulleself gekaap.
Daar is byvoorbeeld sommige mense wat probeer om ‘n Bybelse argument teen Kersfees, veral teen die idee van ‘n Kersboom, te voer vanuit die misplaaste gedagte dat die Bybel ons verbied om bome in ons huise te bring en te versier.
Daar is ‘n gedeelte wat dikwels aangehaal word om Kersfees met afgodery te verbind. Jeremia 10:1-16 word gereeld aangehaal. Wees regtig versigtig vir dié misleiding.
Hierdie gedeelte in Jeremia verwys na die afsny van bome, die afkap van die hout om ‘n afgod te maak, en dan die afgod met silwer en goud te versier voordat dit aanbid word. (sien ook Jesaja 44:9-18).
Die gedeelte in Jeremia kan egter nie só uit sy konteks geneem word as ‘n argument teen Kersbome nie. Die boodskap daarvan was in die eerste plek ses eeue voor Jesus se geboorte aan die Jode gerig. Dit was in die tweede plek nie as ‘n profesie vir vandag aangebied nie. En dit gaan in die derde plek in Jeremia 10 oor afgode waarteen tereg gewaarsku moet word.
Kersbome is nie afgode en word nêrens gebruik om aanbid te word nie!
Natuurlik moet ons Kersfees vier as ‘n fees van Christus, en fokus op die hoop, vrede, liefde en vreugde wat Hy bring. Lees byvoorbeeld sy geboorte en kinderverhale. Beklemtoon dat Hy die Geskenk is aan ons, en dat ons geskenke aan mekaar gee uit dankbaarheid is vir wat Hy vir ons gedoen het.
Maar, moenie die kerkjaar wat met Advent en Kersfees begin, besoedel met idees wat Christus se onoortreflike waarde vir ons verminder in die gedagtes van gelowiges en die gemeenskap nie. Vier die kerkjaar met oorgawe: Advent en Kersfees, Epifanie en Lydenstyd, Pase en Pinkster. Dit is ons storie!
Hier is ‘n paar artikels wat ek waardevol gevind het as jy meer hieroor wil lees.
- Hierdie Afrikaanse artikel van die Baptiste kerk in Kemptonpark was waardevol
- Ook die artikel van dr Eli wat uit ‘n Joodse hoek skryf en wys op die berekening dat 25 Desember nege maande is ná 25 April wat met die ontvangenis en kruisiging van Jesus verbind word.
- Hier is ook ‘n artikel van Biblical Archaeology oor die ontwikkeling van die verskillende idees daaroor.
- Hier is ‘n laaste onlangse artikel wat wys hoe ver verkeerd mense dit eintlik het oor die gewaande mite dat Kersfees uit ‘n heidense fees ontstaan het.
Discover more from Bybelskool
Subscribe to get the latest posts sent to your email.
Deon Vermeulen
Hi
Waar in die Bybel staan dit dat ons Jesus se verjaarsdag moet vier? Inteendeel is daar niemand behalwe Job se kinders wat daar van gelees kan word oor verjjaarsdag waarna hul ook gesterf het.
Moet ons doen wat die Bybel vir ons sê of kan ons self ook besluit wat ons moet doen. Kersfees is ñ wêreldse ding. En ons moet nie gelykvormig word aan die wêreld nie. Ek stap in winkels hoor mense praat. Ek sal nooit my Jesus daaraan kan koppel nie. Nee wat ek volg maar wat in die Woord geskryf staan.
Chris van Wyk
Geboortes was vreugdevolle gebeure in antieke tye (Gen 4:1,25; 21:1-7; 29:31-35; Rut 4:14 ens), soos dit vandag ook is. So was daar ook vreugde by Johannes die Doper (Luk 1:57-66) se geboorte, sowel as by die Here Jesus se geboorte, soos ons uit die verhaal van die herders kan aflei (Luk 2:1-20).
Daarom is geboortedae, dws verjaarsdae, gevier in die Ou Nabye Ooste, soos ons uit Persiese en Egiptiese bronne verneem. Dit geld ook die Jode. Ons lees drie keer eksplisiet van die viering van verjaarsdae in die Bybel: Job se kinders (Job 1:4,13,18), Farao (Gen 40:20), en Herodes (Matt 14:6).
Veral konings se verjaarsdae is gevier, so dit was ‘n logiese ontwikkeling om die geboorte van die Here Jesus te vier, omdat Hy die Koning van die konings is.
Ons het nie ‘n Bybelse opdrag om Jesus se verjaarsdag te vier nie. En die wyse waarop Kersfees baie keer gekommersialiseer word is irriterend oppervlakkig. Maar waar die behoefte bestaan om Jesus se koms na die wêreld te vier, kan dit as ‘n belangrike herinnering van die betekenis van sy koms dien.
Niemand word gedwing om Kersfees te vier nie. Ons kan egter ook niemand verbied om dit te vier nie. Solank dit tot eer van die Here gedoen word (Rom 14:5-6).
Este
Hi.
Baie dankie vir hierdie boodskap. Ekt nooit gedink aan kersfees as n afgod funksie nie maar was. nuuskierig om jou artikel te lees. Ek dink wel jou artikel het my die teenoorgestelde laat besef as wat jy wou voorgee in die artikel. Ekt Jeremia gaan lees, en dis n kersboom… presies… waarteen hy ons waarsku. Hy praat selfs van afgode geklee in rooi wolstof. Jou redenasie is ons moet dit nie so letterlik opvat nie maar dis letterlik in die Bybel geskryf. Waarom kies ons wat ons moet glo in die Bybel en wat nie. Eks jammer maar my kersboom word Vanaand afgeslaan. Baie dankie dat jy my gehelp het xxx
Chris van Wyk
Hi Este – ek lees juis die teks “letterlik”, en verwag dat mense dit nie simbolies sal interpreteer nie. Jeremia skryf vir die Jode in die 6de eeu vC. Hy wil keer dat hulle afgode in hulle huise toelaat. Die Jode het nie Kersbome gehad daardie tyd nie. Dit kan dus op geen manier met Kersfees verbind word nie.
bernard
hi dominee hoekom vier ons kersfees op 25 desember? want as Jesus op die dag gebore was sou die skape en hulle herders verkluim het in die sneeu want dan is dit winter in bethelem die sterrekundiges sou ook nie die ster sien opkom het nie want dan het dit gesneeu. Jesus is beslis nie op 25 desember gebore nie
Chris van Wyk
Hi Bernard, winter in Betlehem en omstreke is nie so swaar soos in Europa nie. Dit is kort en matig. Jesus het bv in die winter die fees van die tempelwyding bygewoon in Jerusalem (8 km van Betlehem) êrens tussen November en Desember (Joh 10:22). Die gemiddelde temperatuur in Desember is 12 grade Celsius vandag, hoewel ons nie weet hoe dit 20 eeue terug was nie. Dit is wel die reënseisoen in Israel soos ons in Esra 10:9 lees en daar is soms sneeu vir ‘n dag of twee. Maar dit het nog nooit die boere gekeer om hulle vee in die veld te versorg nie. Die landstreek oos van Betlehem val skerp na die Dooie See se kant toe wat dit eintlik warmer maak as die hoër liggende gedeeltes na die weste. Die weer hoef dus nie ‘n mens se standpunt oor Kersfees te beïnvloed nie. Die tyd 25 Desember is dus nie onmoontlik nie, maar kan nie histories geverifieer word nie. Maar, dit geld alle ander voorstelle vir datums. Die kerk het dus een van die datums wat voorgestel is, gekies. Dit is net so goed soos enige ander datum. Ek persoonlik hou baie van die voorstel dat dit moontlik êrens in September was as ‘n mens met Sagaria, Johannes die Doper se pa, se dienstermyn werk en dan die verhaal van Lukas 1-2 daarby inpas. Maar, dit is steeds raaiwerk. Kies ‘n datum wat vir jou sin maak. En vier die geboorte van Jesus, want Hy is die sentrum van ons lewe.
Wanda
Wat wel belangrik is, is dat Jesus beslis gebore was. Maak nice saak waneer nie, al het jy n kersboom en n kersvader met takbokke, ons val nie neer voor hulle en aanbid hulle nie. Jesus se geboorte was n groot gedoente die wysemanne het geskenke gebring, die engele leerskale het gesing dit was n groot groot wonderbarlike gebeurtenis, vier dit geniet dit en vertel almal daarvan wat dit nie weet nie. Die bybel se ook die een dag is hoër gèag vir een persoon as vir n ander, làat elkeen vir homself besluit watter dag vir hom belangrik is laat ons nie oordeel. Geseënde Christus fees
Chris van Wyk
Netso, soos ek ander geliefdes rondom my se verjaarsdae vier om my verbintenis aan hulle te bewys, só doen ek dit met Jesus s’n. Die datum maak nie saak nie. Die viering maak wel saak. Trouens, ek vier dan my eie verjaarsdag, al hoe meer omdat ander dit namens my onthou, maar nogtans! Hoekom dan nie Jesus s’n nie? Sy geboorte, bediening, kruisdood, opstanding, hemelvaart en wederkoms is die kern sake van sy betekenis vir die heelal. Ek vier al hierdie gebeure – sommige op spesifieke dae (geboorte, kruisdood, opstanding, hemelvaart) en ander regdeur my wandel in die Here sowel as deur my bediening.
Hendrina Holtzhausen
Daar is so baie kontreversie oor Kersfees. Kan mense nie net ophou stry en Jesus se verjaarsdag vier soos ons dit al vir jare en jare doen nie. Terloops
daar is so baie mense wat glad nie in Christus glo nie maar as die liggies en die kersbome opgaan dan weet almal dit is Kersfees en almal weet die Christene vier dit,.. miskien word daar dalk n paar gered as ons eerder die geleentheid gebruik om vir mense die geboorte wonderwerk te vertel. Want n wonderwerk was dit wel.
Ons vier die Kruiseging en Opstanding met oorgawe. Maar Jesus moes mos eers mens word en gebore word voor Hy uiteindelik aan die kruis moes hang vir ons sondes. Geniet dus hierdie Kersfees ook met oorgawe en dankbaarheid vir ons Koning.
Cherie
Goeie more Chris
Ek deel die volgende aangaande kersfees: Daar is sewe feeste van God wat Hy wil hê ons moet onderhou volgens Levitikus 23. Al sewe feeste is ‘n heenwysing na Jesus. Die eerste 4 het al tot vervulling gekom. Die laaste 3 moet nog vervul word deur Jesus. Die feeste is: 1. Pasga, wys heen na Jesus wat vir ons sondes gesterf het. 2. Fees van Ongesuurde brode. Wys heen na Jesus wat sonder sonde was. 3. Fees van “First Fruits. Wys heen na Jesus wat eerste mens was wat uit die dood opgestaan het en nie weer daarna gesterf het nie. 4. Pinksterfees Wys heen na Heilige Gees wat uitgestort is op mense 50 dae nadat Jesus gesterf het. 5. Fees van Trompette Wys heen na Jesus wat Sy bruid kom haal. 1THESS 4 :16. 6. Dag van Verootmoediging. Wys heen na die Boeke wat oopgemaak gaan word in Openbaring. 7. Fees van Tabernakels Wys heen na die tyd waar ons vir altyd en ewig by Jesus en Vader gaan wees. As jy wil sal ek die verwysende teks verse hierby insluit. Nêrens sê God ons moet Jesus se geboortedag vier nie. Ek wèèt nie hoèkom nie, maar God wou dit net nooit sò hê nie. Herodes en Faroa se verjaardae is wel gevier, maar op die 2 verjaarsdae is mense dood gemaak. Ons mense gaan en ons kìès om 3 feeste te hou…Easter, Pinkster en ‘n derde een wat God nie eers gesê het ons moet vier nie: kersfees…Dis soos jy koop vir jou vrou bos rooi rose, maar jý weet sy hou van wit magrietjies…hoèkom tog?? Sy gaan nie minder lief wees vir jou nie maar tog…Daar is 7 feeste wat God wil hê ons moet vier, maar òns sal besluit wat wil òns doen…
Chris van Wyk
Al die feeste is in Jesus vervul, met dele daarvan wat natuurlik nog verdere betekenis kan hê. Maar, in die tussentyd is feeste nie meer verpligtend nie, soos Paulus in Kolossense 2:16 sê: “Laat niemand julle dan oordeel in spys of in drank of met betrekking tot ’n fees of nuwemaan of sabbat nie.” Paulus het as Jood, nog feeste gevier ná sy bekering (Hand 18:21), selfs offers gebring (Hand 21:26), maar dit is nie meer verpligtend vir Christene nie. Jesus het die nagmaal ingestel wat eintlik die enigste “fees” is wat nou sy sanksie het. Al die ander feeste wat mense nog vier, of ander feeste wat hulle ingestel het om iets te herdenk, is net maniere waarop hulle die Here verheerlik in hulle lewens. Ons moet mekaar daardie ruimte gee in dié verband.
Richard
Môre oom Chris.
Gaan dit goed?
Dankie vir hierdie skrywe, wat seker vir altyd in debat sal wees, ongelukkig.
Nietemin, ek wil tog vra vir ń nuwe artikel rakende die onverantwoordelikheid waarmee ons Kersfees vier. Wat ek bedoel is die volgende:
Hoe kan ons derduisende rande spandeer aan bome, liggies, parfuum, iphones, lamsboude, nageregte en wat nog, terwyl miljoene ander mense swaar kry? En slégs op hierdie dag stroom ons kerk toe – ń vreemde plek wat ons nie eers ken nie.
Hier is die kersie op die koek (tong in die kies): Terwyl ons hierdie dinge doen, noem ons onsself trots Christene!!!
Maak ons nie sodoende openlik ‘n bespotting van God nie?
Ek word naar hiervan.
Chris van Wyk
Hi Richard, jy is reg, maar die belangrike is om nie saam te doen nie, en die dag as ‘n Christusfees te vier, terwyl ‘n mens in hierdie tyd fokus op uitreik na ander, en ook familiewees vier. Groete.