Bybelskool

Oor my

Ek het tot dusver geen inligting oor myself op hierdie webtuiste geplaas.  Met die groei in lede van oor die hele land en oorsee, wil ek meer oor myself en hierdie bediening vertel, ter wille van mense wat my nie persoonlik ken nie.

Die Here het my geroep in my matriekjaar om ‘n predikant in die NG Kerk te word.  ‘n Leidende teks in my verstaan van my roeping is 1 Kor 9:19-23 – “Ek het my aan almal diensbaar gestel om soveel mense as moontlik vir Christus te wen.” Sag 3:7 het ook ‘n rol gespeel, hoewel ek vandag dit baie meer genuanseerd gebruik as vroeër.

Ek het in 1978 op Stellenbosch teologie gaan studeer en in 1984 klaargemaak.  Terwyl ek verder gestudeer het, is ek in 1986 as studenteleraar na die gemeente Somerstrand, Port Elizabeth, beroep.  Ek het my studies in die Ou Testament voortgesit en my doktersgraad in 1993 behaal.  My onderwerp was “Die vervulde landsbelofte as literêre en teologiese motief in die boek Jeremia”.

Met die groei in die gemeente Somerstrand het ek in 1990 gemeenteleraar geword, ‘n pos wat ek tans nog beklee.  Ek is ongelooflik bevoorreg om so ‘n groot groep gelowiges te hê wat saam met my die pad stap, en my toelaat om nie net in die gemeente nie, maar ook wyer my gawes aan te wend en die Here op dié manier te dien.

My bediening het in die laaste paar jaar op twee vlakke ontwikkel.

  1. Ek is al hoe meer in leiersposisies ingetrek in die sinode en Algemene Sinode en vervul tans onder andere die rol as voorsitter van die Oos-Kaaplandse NG sinodale kommissie.
  2. Ek het ook by fasilitering van gemeentes en die ontwikkeling van materiaal vir geestelike verryking betrokke geraak, onder andere by GDN, Communitas en die Seisoen van Luister, waarvoor ek ook steeds as webmeester optree.

My betrokkenheid veral by die ontwikkeling van die luistersiklus van die Seisoen van Luister – en met die skrywe van ‘n paar boeke saam met Nico Simpson en Frederick Marais – het my passie vir die Bybel en die lees van die Bybel eksponensieel laat groei.

Met ‘n besoek aan die gemeente Willow Creek in Chicago, Illinois, in 2008 het hulle Midweek byeenkoms my uitgedaag om iets soortgelyks te probeer in Somerstrand.  En met ons beplanning in die gemeente is die gedagte van ‘n Bybelskool gebore.

En die res is geskiedenis, soos hulle sê.

Ek word deur my kollegas ondersteun met die uitdaging: Werk die hele Bybel deur! … en DV is dit wat ek graag wil doen.

Chris van Wyk

     

Comments (14)

  • Avatar

    Theresa

    |

    chris, ek is tans in iets wat soos n nagmerrie voel wat nooit einde kry nie, en my hoop en geloof is teen die grond. ek sal graag met jou wil gesels oor hoop en geloof want ek weet nie met wie om te praat oor die hoekoms en waaroms van die Bybel nie..asb sal jy my kan help met my vrae? dankie

    Reply

    • Avatar

      Chris van Wyk

      |

      Jy is welkom om direk met my per e-pos te gesels: acv.vanwyk@gmail.com

      Reply

  • Avatar

    Past L Titus

    |

    Dit word meer en meer duidelik dat die Here sy bruid bymekaar maak.Hy roep meer en meer manne en vroue uit bestaande gevestigde kerke en bedieninge om die evangelie te verkondig.Die enkele groot hiervoor is dat die dwaalleër net so vurig verkondig word.Die Here seën u Bediening ek was self jaar met die AGS en nou is ons Seed of Abraham Ministries.Vir Theresa is Jer 23v23 so relevant

    Reply

  • Avatar

    Danie Malan

    |

    Chris
    Jou bydraes is kernagtig, verstaanbaar en geestelik baie verrykend. Mag die Here jou vandag in die gesig kyk en sy genade oor jou laat val soos ‘n sagte winterreen.

    Reply

    • Avatar

      Chris van Wyk

      |

      Dankie Danie. Die genade van die Here is juis vir my vandag soos ‘n rivier waaraan ek my oorgee. Het vanoggend met 5 tekste gewerk saam met die Seisoen van Luister span, en die wysheid van Spreuke het ons meermale op nuwe weë geneem.

      Reply

  • Avatar

    Pierre

    |

    Chris

    Dankie vir jou bybelskool. Ek gebruik jou insig baie in my eie bybelstudie.

    Salwing fassineer my in die laaste tyd. Het jy enige materiaal daaroor. Ek sal graag die geestelike verstaan van salwing wil weet maar ook die praktiese toepassing in vandag se tye.

    Bie dankie

    Pierre

    Reply

    • Avatar

      Chris van Wyk

      |

      Salwing
      1. Salwing met (olyf)olie is op verskillende wyses in ou Israel gebruik: as offer (Eks 29:40; Lev 8:26; Num 7:19), as simbool van toewyding vir voorwerpe (Eks 40:9–11 – die tabernakel, die altaar en ander voorwerpe), priesters (Lev 8:12, 30), en konings (1 Sam 10:1; 1 Kon 1:39). Die salwing met olie simboliseer in die OT dus veral die amptelike bevestiging of toewyding van iets of iemand aan die Here. Dit is nou benewens die gebruik van olie in die kosmaak proses (1 Kon 17:12), as medisyne en as salf vir sere (Jes 1:6; Mark 6:13; Luk 10:34) en by die versorging van die liggaam (2 Sam 12:20; Ps 104:15). Olie simboliseer ook voorspoed en oorvloed (Deut 33:24; Job 29:6; Eseg 16:13).
      2. Die OT praat ook van ‘n salwing met die Heilige Gees wat die ontvanger bemagtig en toegerus vir sy werk en roeping (Jes 61:1). Dit is ook wat gebeur het met die kerk in die NT toe die Heilige Gees uitgestort is (Hand 2). Só is gelowiges gesalf/bemagtig vir die taak wat God vir hulle in sy koninkryk gehad het (1 Joh 2:22 – “Julle is egter deur die Heilige Gees gesalf, en julle almal ken die waarheid” -vgl ook vers 27).
      3. Jesus word natuurlik by uitstek die Gesalfde genoem (Luk 2:26), wat in Aramees met Messias en in Grieks met Christus weergegee word. Al drie hierdie name: Gesalfde, Messias en Christus, beteken dus dieselfde, dat Jesus deur God as Verlosser van die wêreld gesalf en bemagtig is (Luk 4:18-19; Hand 10:38). Dit is wat Petrus ook van Jesus bely, “U is die Christus” (Mark 8:29).
      4. Die NT noem gelowiges natuurlik ook gesalfdes, omdat ons volgelinge van Christus is (2 Kor 1:21). Die Heidelbergse Kategismus vra in Vraag en Antwoord 32: “Waarom word jy ’n Christen genoem ?”, en antwoord: “Omdat ek deur die geloof ’n lid van Christus is en daardeur deel aan sy salwing het, sodat ek sy naam kan bely, myself as ’n lewende dankoffer aan Hom kan toewy en in hierdie lewe met ’n vrye gewete teen die sonde en die duiwel kan stry en hierna met Christus in ewigheid oor alle skepsels kan regeer.” Christen beteken dus beide volgeling van Christus en gesalfde van Christus.
      5. Salwing met olie is ook deur die dissipels gebruik in die proses om siekes gesond te maak, dit waarvoor die Here hulle uitgestuur en bemagtig het (Mark 6:13). Hierdie salwing met olie was dus aan die een kant die benutting van ‘n bekende geneesmiddel, maar ook ‘n simbool van die genesing wat God deur Sy Gees gee.
      6. Dit is waarskynlik ook waarom salwing met olie gebruik is as deel van die gebed om genesing deur ouderlinge (Jak 5:14). Omdat olie ‘n geneesmiddel was, was dit ook ‘n kragtige simbool van die gebed om genesing.

      Salwing het dus ‘n geestelike betekenis waar dit aan die werk van die Heilige Gees verbind word, en as deel van ‘n gebedsaksie gebruik word. Die krag lê natuurlik nie in die olie nie, maar in die Heilige Gees en in die gebed. Gebed sonder olie is daarby ook net so kragtig, soos vele plekke in die Bybel dit vir ons uitspel (bv Jak 5:16).

      Reply

  • Avatar

    Chris Visser

    |

    Hi Chris, jammer om n besige man te steur; Kan jy dalk raad gee; Ek skep n Blog op WordPress (sien skakel-adres) Ek soek raad uit jou ervaring met twee vrae:
    1) Watter raad het jy vir die baie Scam wat ek in my comments ontvang, en ek is nog nie eers aan die gang nie.
    2) Is dit wys om jou eposadres op jou Blog te gee?

    Reply

    • Avatar

      Chris van Wyk

      |

      Gebruik Akismet. Dis briljant en gratis. Kry ‘n ander adres, bv by gmail, en wys dit daar. Of gebruik ‘n vorm in WordPress waarmee mense met jou kan kommunikeer sonder om jou adres te sien. Contact Form 7 werk lekker.

      Reply

      • Avatar

        Chris van Wyk

        |

        O ja, en gebruik Wordfence vir sekuriteit. Dit gee jou ook ‘n goeie oorsig van wie jou blog besoek, en jy kan daarmee ongewenste mense uit hou. Dit het selfs ‘n Firewall, maar wees versigtig hoe hoog jy die sekuriteit stel.

        Reply

  • Avatar

    Petro Reynders

    |

    Beste Ds Chris

    Ek is so opgewonde oor hierdie nuwe webtuiste wat ek vanoggend ontdek met dank aan Radio RSG.
    Was besig om ontbyt vir my gaste by my B&B te maak en my radio is langs my stoof toe ek U hoor praat oor die bybelskool. Ek is tans besig om Rev. David Pawson van Engeland se You Tube Videos te kyk en ook sy boek Unlocking the Bible te bestudeer. Hy neem ook die Bybel van Genesis tot Openbaring en werk elke boek deur.

    Ek bid U seen toe en goeie gesondheid vir die werk van die Here waarmee U besig is asook vir hierdie webtuiste en die Bybelskool, dat dit sal groei en die uithoeke van die wereld sal bereik.

    Vriendelike Groete

    Petro Reynders
    ESTCOURT KZN

    Reply

    • Avatar

      Chris van Wyk

      |

      Dankie! Ek het ook David Pawson se boek geniet, en het verskillende ander soortgelyke boeke in Engels, onder andere Larry Richards se uitstekende Bible Reader’s Companion en sy Teacher’s Commentary asook Gordon Fee en Douglas Stuart se fenomenale How to Read the Bible Book by Book. Laasgenoemde was die inspirasie vir my aanpak, hoewel ek vir ‘n hoofstuk-vir-hoofstuk metodiek gekies het, en nie net boek-vir-boek nie. Dié twee reuse het ook ‘n uitstekende boek How to Read the Bible for All its Worth. Geniet!

      Reply

  • Avatar

    Jan

    |

    Om watter rede gebruik mense die Here se naam in die algemene gesprek voering.
    Ek praat van in fleiks, mense in nood- wat nie noodwendig tot God roep nie, maar net die hele tyd, in engels sê”O my God”, ens.
    Hoekom dan nie sê ” O my Allah” of wat ookal nie?

    Reply

    • Avatar

      Chris van Wyk

      |

      Mense gebruik die Here se naam ydelik om verskillende redes, soos in “O my God”. Sommige gebruik dit as ‘n stopwoord, uitroep of kragwoord. Hulle beklemtoon daarmee hulle verbasing of afgryse. Dit is egter gewoonlik onnadenkend en het geen godsdienstige betekenis nie. Hulle weet baie keer nie eers wat hulle sê nie. Jy sal egter min kinders van die Here kry wat sy Naam só ydelik gebruik. Ons weet immers dat ons van elke ydele woord rekenskap moet gee. Mense in die Weste gebruik nie die woord “Allah” op dieselfde manier nie, want dit het nie vir hulle dieselfde betekenis nie. Allah is wel net die Arabiese woord vir God, maar baie dink verkeerdelik dat dit ook die persoonsnaam vir die Moslem God is.

      Reply

Leave a comment

Onlangse kommentaar

  • Avatar

    Nakkie

    |

    Baie dankie vir elke stuk wat ek ontvang. Dit beteken vir my baie. Ek leer so baie. Geseënde Kersfess en `n mooi 2018.

  • Avatar

    Chris van Wyk

    |

    JG, diere word beskryf as “lewende wesens”, in Hebreeus: “lewende siele” (Gen. 1:20). As hulle doodgemaak word, word dit weergegee as om die “siel van ‘n dier” dood te maak (Lev. 24:18). Net so ken ‘n regverdige die “siel van sy dier” in die sin van sy behoeftes (Spr. 12:10). Diere word egter nooit beskryf met ‘n siel wat voortbestaan ná die dood nie.

  • Avatar

    Jg

    |

    Chris,

    Het n dier n siel, of het hy nie????

  • Avatar

    Jan Louw

    |

    Dankie vir ‘n ewewigtige en insiggewende bydrae oor die gawe van profesie. Ek is ook maar skepties oor sommige aansprake uit charismatiese kringe oor die werkinge van die Gees, maar is ook huiwerig om kategoriese uitsprake te maak.

  • Avatar

    Chris van Wyk

    |

    Dankie Neels. Dit was ‘n wonderlike reis, ja. Gelukkig kan ons volgende jaar met Josua en die Rigters verder reis!

  • Avatar

    Neels Hubinger

    |

    More Chris, ‘n oorweldigende getuienis vandag oor die afsluiting van Moses se lewe wat ons nou weer saam met jou “geleef” het…! Mens wens en smag daarna om self meer van sy karakter en verhouding met God te ervaar in die vreugde daarvan dat Moses self nooit “die rykdom van die land besit het nie”, maar in die skat van die belofte van God, onvergelykbaar “ryk” was en sy lewe volkome kon afsluit en voltooi… Opreg, baie baie dankie vir jou toewyding, studie en insig om die Woord nuwe betekenis te gee en jou lesers se lewens te verryk. Vriendelike groet en seënwense.

  • Avatar

    Chris van Wyk

    |

    Hi. Die kerk werk vir eeue al met ‘n “kerkjaar”. Dit begin met Advent, die vier Sondae vóór die Christusfees, wat saamval met Kersfees (“Christ-mass”) wat aanvanklik verwys het na die nagmaal wat die vroeë kerk op Christus se geboorte gevier het in nagedagtenis aan Hom. Daarna is daar Epifanie, die viering van die doop (6 Januarie), verskyning en bediening van Jesus. Daarna kom die Lydenstyd, Goeie Vrydag, Paasfees, Pinksterfees en dan ‘n tyd wat ons noem Koninkrykstyd. Nie een van hierdie dinge is ‘n “moet” in die Skrif nie, maar wel gebaseer op die verhale van Jesus en die kerk. Dit help ons om die groot dinge van sy lewe te vier ter herinnering en bemoediging. Die datum van Jesus se geboorte is egter nie bekend nie, selfs sy geboortejaar is in dispuut. Maar, een van die tradisies is dat Maria op 25 Maart swanger geraak het, nege maande later op 25 Desember geboorte geskenk het, en dat Jesus weer op 25 Maart gekruisig is. Dit daar gelaat. Ek vier dus die Christusfees eerder as Kersfees, om myself te herinner, en my gemeente, dat Jesus as Verlosser gebore is. Dit is egter nie ‘n moet nie.

  • Avatar

    Deon Vermeulen

    |

    Hi
    Ek woon in Despatch . My vraag gaan oor kersfees. Ek het op op 1 Mei 2016 tot bekering gekom en is 16 Oktober gedoop. Hierdie jaar sal dit my tweede jaar wees wat wat ek nie deel gaan hê aan kersfees nie. Na ondersoek het ek besef dat kersfees ‘n mense instelling is en niks met Jesus te doen het nie. Kersfees soos ek dit sien gaan maar oor geldmakery. Dink ook nie daar staan enige iets in die Bybel dat ons Sy verjaarsdag moet vier nie. Wat vir my belangrik is, is die nagmaal en die doop wat deur Jesus ingestel is. Is ek dan verkeerd om nie kersfees te vier nie, ons weet ook dat dit nie Jesus se geboorte dag was 25 Des nie ?

  • Avatar

    Piet du Toit

    |

    Groot waardering vir jou deeglike uitlegging Chris. Baie dankie.

  • Avatar

    Chris van Wyk

    |

    Hi Sonja. Nee, Jeremia 10 verwys na die maak van afgode. Dit het niks met kersbome en versierings te make. Die Kersboom en sy versierings is eers lank daarna, en lank ná Jesus se geboorte self aan sy geboorte verbind. Aanvanklik was die ou kerkvaders baie negatief daaroor, Tertulianus bv. Lees meer by Christianity Today wat Edwin en Jennifer Woodruff oor die ontwikkelinge deur die eeue sê in hulle artikel Why do we have Christmas Trees?

%d bloggers like this: