Bybelskool

Kontak my

Jy kan my op hierdie e-pos adres kontak: Chris van Wyk.  Klik net op die skakel en jou e-pos program sal oopmaak met my adres reeds ingevul.  Dit is ‘n persoonlike e-pos adres en dus heeltemal privaat.  Niemand anders sal ‘n boodskap wat jy na hierdie adres stuur, kan sien nie.

Opmerkings (27)

  • Avatar

    Adri

    |

    Is dit moontlik om vir my ‘n lys te gee met die verse van genade en hoop

    Reply

    • Avatar

      Chris van Wyk

      |

      Hi Adri – daar is net 3 verse waar genade en hoop saam voorkom:

      Verwysing

      • Rom 5:2 Deur Hom het ons in die geloof ook die vrye toegang verkry tot hierdie genade waarin ons nou vasstaan. En ons verheug ons ook in die hoop om deel te hê aan die heerlikheid van God.
      • 2 Tess 2:16 En mag julle in al die goeie wat julle in woord en daad doen, bemoedig en gesterk word deur ons Here Jesus Christus en God ons Vader. Hy het aan ons sy liefde bewys en aan ons deur sy genade ’n blywende troos en goeie hoop gegee.
      • 1 Pet 1:13 Wees daarom verstandelik wakker en nugter, en vestig julle hoop volkome op die genade wat julle deel sal word by die wederkoms van Jesus Christus.

      Daar is 697 waar óf genade óf hoop voorkom. Ek het ‘n Word dokument vir jou aangeheg: Laai dit hier af.

      Reply

  • Avatar

    lettie jacobs

    |

    haai Chris, ek geniet jou aanbieding van Lukas so baie, ek sou dit graag by ons bybelskool wil aanbied. Het jy dalk al die hele oorsig van Lukas en sal jy dit met my deel asseblief?

    Reply

    • Avatar

      Chris van Wyk

      |

      Ek is bly jy geniet dit! Die eerste paar bydraes gaan oor die breë prentjie van Lukas en Handelinge, wat ek in die gemeente al as Bybelskool aangebied het. Die huidige bydraes word egter geskryf soos ek dit nou saam met julle lees. Dit is dus so vars soos die sonsopkoms elke oggend!

      Reply

  • Avatar

    Herman van Bybelverskille

    |

    Chris, kosbare werk waarmee jy besig is.
    Ek doen ‘n studie van die oorsake vir die verskille tussen ouer vertalings soos die 1933/53 Bybel en die KJV, teenoor nuwer vertalings soos die 1983-Bybel en die NIV.
    Seën,
    Herman Grobler

    Reply

  • Avatar

    Tania

    |

    Goeie dag, enige lees materiaal oor vas? Ek wil graag weet, is vertel dat alle vasse dieselfde deurbrake verskaf, maar waarom is daar dan verskillende vasse? Kan mens dus enige vas volg, of is daar spesifikie vasse vir spesifike deurbrake…? Baie dankie.

    Reply

    • Avatar

      Chris van Wyk

      |

      Johannes Calvyn het drie doelstellings aan die vas gekoppel: lewensdissipline, gebedsvoorbereiding of (‘n vorm van) skuldbelydenis. Vas was vir hom meer ‘n saak vir die geloofsgemeenskap as ‘n persoonlike saak, en dit gaan daarom met openbare gebed saam (bv die voorbeeld van Antiogië). Vas is ook nie net weerhouding van kos nie, maar kan ook beteken dat jy min en lig eet, om te kan bid. Calvyn het ook op drie gevare van vas gewys: uiterlike vertoon, verdienstelikheid, en gewetensdwang. Lees meer by: http://wp.me/pZl58-1ar

      Reply

  • Avatar

    rina

    |

    Ek wil graag weet wat word bedoel in Spreuke 11 vers 15 met borg staan,sou dit beteken dat daar nie geleen moet word nie?

    Reply

    • Avatar

      Chris van Wyk

      |

      Borgstaan beteken om in te staan vir iemand as dié in die skuld kom. Dit is nie dieselfde as leen nie, maar die beginsels geld ook daarvoor. Gee eerder as borgstaan/leen. Ek het eintlik in Spreuke 6 meer daaroor geskrywe: http://www.bybelskool.com/spreuke/spreuke-61-19-leef-met-oorleg/. Ek haal ‘n deel daaruit vir jou aan:
      6:1-5 – Wees versigtig met verbintenisse aan vreemdes
      Die eerste vermaning het met borgstaan vir vreemdes te make. Dié tema sal nog ’n paar keer aangeraak word in Spreuke (11:15; 20:16) selfs ook wanneer dit nie met vreemdes verband hou nie, maar met enigiemand wat in die skuld is (22:26).
      Die punt wat die pa aan sy seun maak, is dat hy versigtig moet wees aan wie hy hom verbind, veral uit die hoek van die mag wat ander dan oor jou kan hê. Sy pa wil hê dat hy vry moet wees van verpligtinge wat vanweë ander se dwaasheid op hom gelê kan word.
      Dit geld uiteraard nie wanneer ’n mens vir iemand anders iets kwytskeld of as ’n geskenk gee nie. Dit het die pa reeds in sy vierde lewensles vir hom geleer, dat hy nie ’n weldaad moet weerhou van iemand wat dit toekom nie (3:27-28). Borgskap van vreemdes het egter net só ’n inherente gevaar van misleiding, waaraan die pa sê ’n mens jou net nie moet blootstel nie.
      En as dit wel gebeur het? Wel, doen alles in jou vermoë om daaruit los te kom! Soebat, pleit, selfs al kos dit jou ’n nag se slaaploosheid, sorteer dit uit!

      Reply

  • Avatar

    Carol

    |

    Is die Lees, luister en leef slegs in ePub beskikbaar of ook in boekvorm?

    Reply

    • Avatar

      Chris van Wyk

      |

      Op die oomblik is dit net in ePub beskikbaar. Binnekort sal ek dit ook in mobi vir Kindle publiseer. Ek is besig om te onderhandel met ‘n uitgewer vir gedrukte kopieë. Maar die detail moet nog uitgesorteer word.

      Reply

      • Avatar

        Carol

        |

        Baie dankie…sal gaaf wees as dit ook in gedrukte vorm verkrygbaar kan wees en sal op die uitkyk wees daarvoor. Sterkte en dankie vir al die moeite, tyd en energie wat hierin gegaan het en nog gaan.

        Reply

  • Avatar

    Chris van Wyk

    |

    Hi Maruschka – ek het die volgende geskryf oor Hooglied 3:1-5 met die boodskap dat Hooglied hier vir ons sê: “Liefde kom tot sy reg binne families”

    Ek haal aan:
    “So pas het die vrou die hoop uitgespreek dat die man haar veilig sal laat voel in hulle liefde, dat hy haar vrees sal help besweer van die afskeid van haar ouerhuis. Nou worstel sy in haar droom/nagmerrie met haar eie behoeftes. Hoewel sy hom beskryf as die een wat sy liefhet, letterlik: “die een wat my siel liefhet” – dws die een aan wie haar binneste verkleef geraak het – wil sy nie, selfs nie in haar droom nie, onbehoorlik optree nie. Sy wil hom eers gaan haal na die geborgenheid van haar ma se huis, háár veilige ruimte.
    Dat sy hom na haar ma se huis bring, dra die betekenis van haar soeke na veiligheid, vastigheid, en aanvaarding, iets soortgelyks as wat ons lees van Isak wat sy vrou Rebekka by sy ma Sara se huis laat bly het (Gen 24:67), hoewel die rolle hier omgekeer is. Die vrou van Hooglied beskryf daarmee haar begeerte aan ouerlike goedkeuring van haar liefde. Sy het ‘n sterk behoefte aan die liefde van die man, maar sy het net so ‘n sterk behoefte dat dit nie onbehoorlik of onvanpas sal wees binne die konteks van haar familielewe nie.
    Die wagte wat die stad patrolleer is al op baie maniere metafories geïnterpreteer. Sommige dink daaraan as die samelewing se reëls, ander weer aan die beskerming van maagdelikheid (Garrett). In die lig van die geweldige prioriteit wat op maagdelikheid in Israel geplaas is, maak laasgenoemde vir my sin. Met die herhaling van die frase rondom die vroue van Jerusalem (ook in 2:7; 5:8; 8:4) lewer sy waarskynlik verder kommentaar op haar eie droom-behoeftes, dat die liefde nie ryp gedruk moet word voor die tyd daarvoor aanbreek nie. Dit dui aan die een kant op haar keuse teen die insluiting in die harem van Salomo, en aan die ander kant op haar keuse om die liefde net binne die veilige ruimte van familie-wees te geniet, soos dit met die huweliksluiting in die volgende perikoop moontlik word.
    Daar is ‘n hele paar ooreenkomste tussen dié gedig en die een wat ons in hoofstuk 5:2-8 lees – die verlange na die man, die soeke in die stad, en die verwysing na die vroue van Jerusalem. In hoofstuk 5 is die konteks egter haar aanvanklike weiering van die man se toenadering, en stel dit haar bloot aan verguising deur die wagte. Die ander gedigte wat daarop volg, sluit dan by dié soektog aan, maar daaroor later.”

    Reply

  • Avatar

    Annalize

    |

    Hi Chris waar begin ek die Bybel lees en leer .Ek weet nie waar om te begin nie en ek wil graag dit reg doen gee asb vir my riglyne.

    Reply

    • Avatar

      Chris van Wyk

      |

      Hi Annalize – jy rig ‘n belangrike versoek waaroor ek ‘n bietjie verder wil nadink. Jy soek ‘n soort beginner lees van die Bybel, en ek gaan mettertyd iets in daardie rigting skep. Hier is solank ‘n skakel om met die evangelie van Johannes te begin en dit met my begeleiding deur te lees. Dit gee vir jou riglyne vir jou leeswerk en ‘n inleiding oor die evangelie van Johannes. Daarna vind jy al die skakels om dit hoofstuk vir hoofstuk deur te lees. Soos jy lees kan jy kommentaar lewer en ek sal antwoord, soos tyd my toelaat. Geniet!

      Reply

      • Avatar

        Michelle

        |

        More Chris, Ek wil dit ook graag weet. Ek sal dan ook nou met die evangelie van Johannes begin, maar sal jy ons asseblief laat weet met watter boek moet ons volg.

        Reply

        • Avatar

          Chris van Wyk

          |

          Hi Michelle, dit hang af van wat julle plan met die Bybel is. Julle sou doodgewoon die NT kon deurlees. Daarna die OT. Of julle sou kon afwissel. Een NT boek. Dan ‘n OT boek. Dan ‘n Psalmboek (daar is vyf). Dan weer ‘n NT boek. En so kan julle aangaan. Iets wat my op die oomblik interesseer is om Paulus se dertien briewe in volgorde deur te lees. Miskien maak ek ‘n post om mense daarmee te help … Vir al bogenoemde maniere is die skakels na die onderskeie Bybelboeke by http://bybelskool.com/alfabetiese-lys-van-bybelboeke-by-bybelskool-com/ beskikbaar. Onthou net dat die datums wat soms daarin aangegee word, verouder is. Lees dit net in volgorde soos dit aangegee is en ignoreer die datums en ander verouderde instruksies.

          Reply

  • Avatar

    mariza

    |

    iemand het aan my verduidelik om in tale te praat is van ‘n heidense gees omdat korinte n heidense stad was. help asb om dit reg te kan verduidelik dat dit van die Heilige Gees is.

    Reply

    • Avatar

      Chris van Wyk

      |

      Om in tale te praat, is nie heidens nie, maar ‘n gawe van die Heilige Gees. Paulus verduidelik die plek wat tale inneem in die geloofsgemeenskap in 1 Korintiërs 12-14. Die gemeente se siening van die gawe van tale as die taal van die engele (13:1) en iets wat in ’n toestand van ekstase manifesteer (12:2) het wel gedreig om so oorbeklemtoon te word, dat die ander gawes oorheers is, en hulle eredienste onverstaanbaar begin word het. Daarom het Paulus hulle gehelp om te verstaan dat nie almal al die gawes het nie, ook nie tale nie, en dat daar beter gawes is (profesie is bv. beter as die gawe van tale, soos hy in hoofstuk 14 wys), maar dat alles ondergeskik is aan die gawe van die liefde wat aan almal in die gemeente gegee is, waaroor hoofstuk 13 handel.

      Hy brei in hoofstuk 14 uitvoerig uit oor die onverstaanbare onsinnigheid van tale in die erediens eerder as die verstaanbare opbouende karakter van profesie, veral ook omdat tale eintlik ’n teken vir die (lidmaat-)ongelowiges is (vgl Jes 28:11-12; Deut 28:49 – God se grootheid is raakgesien in die vreemde taal van die Assiriërs, hoewel dit nie begryp is nie). Nie dat Paulus die gebruik van tale afkraak nie, hy gebruik dit immers self. Maar tale is bedoel vir die binnekamer en aanbidding, nie soseer vir die eredienste en byeenkomste nie, omdat dit ’n gebedstaal is. Paulus sal dus eerder 5 woorde met sy verstand wou praat (met ’n openbaring, kennis, profesie of lering) as 1 000 woorde in ’n ongewone taal. Dit is die geestelik volwasse manier om in eredienste op te tree, wat nie net vir gelowiges iets beteken nie (opbou), maar ook vir ongelowiges of buitestaanders (appèl).

      Reply

  • Avatar

    gloria

    |

    Ds Chris.die program wat die bybelskool gebruik het ek nie op my rekenaar..en ek is maar baaaiiiieee dom met tegnologie.. n Ander manier hoe ek die bybelskoolmateriaal kan ontvang op rekenaar….ASB
    groetnis
    gloria

    Reply

    • Avatar

      Chris van Wyk

      |

      Hi Gloria – stapsgewyse:
      1) Gaan na http://bybelskool.com/subscribe/ op die Internet
      2) Vul jou e-pos in die blokkie in en klik op Subscribe
      3) Maak jou e-pos program oop en klik op die Confirm Follow skakel wat in die e-pos sal wees wat van WordPress na jou gestuur word.
      4) Dan sal die bydraes per e-pos na jou toe gestuur word.

      Anders kan jy dit elke weeksdag ook lees by http://bybelskool.com/job/

      Reply

  • Avatar

    Susan Leeuwner

    |

    Ek wil graag e pos stuur aan jou Chris maar ek kry dit nie reg nie. Ek wil graag die 4 evangelies lees en die leer kry wat die 4 evangelies langs mekaar het asseblief.

    Reply

  • Avatar

    Sonja Slater

    |

    Goeiedag Ds Chris, Ek het vanaf middel Desember 2016 ‘n nuwe dringendheid in my om meer vd Here en die Bybel te weet en het begin om Bybelstudie te doen, elke dag ‘n stiltetyd te hou met behulp van ‘n Bybeldagboek en ek lees fisies die Bybel deur van Genisis tot Openbaring, woord vir woord, en wil dit in een jaar doen. Nou, ek is amper deur Genisis met my Bybelstudie (bo en behalwe die fisies deurlees) en sou graag die boeke in volgorde wou deurwerk. Ek laai solank af wat u reeds van Eksodus het maar sou dit vinniger wou doen as wat u publiseer. Ek soek ook Bybelstudie oor Levitikus, Numeri ens wat nog nie op u webtuiste is nie. U praat by die beskrywing van 1 en 2 Konings dat u reeds saam met u lesers en gemeente die 5 boeke van die pentateug deurgelees het maar ek sien niks van dit nie? Dankie vir u goeie werk en dat u my help om die Bybel beter te verstaan. Groete.

    Reply

    • Avatar

      Chris van Wyk

      |

      Hi Sonja. Ek het aanvanklik boek vir boek gewerk en dan riglyne gegee sodat mense dit kan deurlees. Dié stof is wel beskikbaar, maar redelik “oud” in die sin dat ek gegroei het in my verstaan van ‘n hele paar dinge met die deurwerk van die hele Bybel. Eksodus se riglyne is geïnkorporeer in die huidige boek, en die res is ek tans besig om te skryf. Vir die res van Eksodus sal jy dus geduldig moet wees! Ek sou egter Levitikus, Numeri, Deuteronomium, Josua en Rigters se riglyne kon beskikbaar stel. Dit is egter effe verouderd!

      Reply

      • Avatar

        Sonja Slater

        |

        Goeiedag Ds Chris, Soos ek voorheen gevra het kan u asb die riglyne vir Levitikus tot Rigters vir my beskikbaar stel? Se net waar ek dit kan aflaai asb. Dankie.

        Reply

Maak 'n opmerking

Onlangse kommentaar

  • Avatar

    Chris van Wyk

    |

    Ja, Petrus sê: “Hy is geduldig met julle (gemeente), omdat Hy nie wil hê dat iemand verlore gaan nie: Hy wil hê dat almal hulle moet bekeer.” (2 Pet. 3:9). God se wens is dus bekering van almal wat deel is van die geloofsgemeenskap en dat dit nie uiteindelik blyk dat sommige die pad byster geraak het omdat hulle hulle nie in geloof en bekering aan God verbind het nie.

  • Avatar

    anna makwatie

    |

    Baie dankie vir die brood wat my siel voed, soos dit in Ps 23 staan. God wil ook nie he dat een mens(Sy beeld) verlore moet gaan nie. Die bybel getuig van Sy liefde vir die mensdom, soos dit staan in Miga 6 vers 8. Nogmaals dankie!

  • Avatar

    Chris van Wyk

    |

    Jesus het ons geleer dat mense óf gered word om in die koninkryk van God in te gaan óf in die hel (gehenna) gegooi te word (Matt. 10:28; Luk. 13:28). Op soortgelyke wyse verkondig Hy aan die ongelowiges in Kapernaum dat hulle tot die doderyk (hades) verdoem sal word. Dieselfde geld mense wat in hulle sonde bly (Matt. 5:22, 29-30; 23:31-33). Hy beskryf hierdie plek weg van God se aangesig as ‘n ewige vuur (Matt. 25:41), ‘n plek van donkerte (Matt. 8:8-12), ‘n bodemlose afgrond (Luk. 8:31), waar mense in pyn verkeer weens die vuur van die doderyk (Luk. 16:23). Die vuur word nooit geblus nie en die wurm hou nooit op met vreet nie (Mar. 9:48).

    Paulus praat minder oor die hel en die doderyk, maar kontrasteer steeds die wonder van die koninkryk van God met die afgryse van die dood (2 Kor. 7:10) en die ewige verdoemenis waar God die mense wat nie vir Hom ken nie, sal straf (2 Tess. 1:6-10). Dit sluit dus alle mense in wat nie in Jesus glo nie, maak nie saak in watter godsdiens hulle hulle bevind nie.

    Dit wil voorkom of die vuur daar alreeds brand, want daar is alreeds engele wat daarheen verdoem is (2 Pet. 2:1-10). Dit is ‘n plek van gloeiende vuur waarin al die vyande van God uiteindelik gegooi sal word (Hebr. 10:26-27).

    Sommige interpreteer al bogenoemde beskrywings as metaforiese beskrywings. Ander interpreteer dit letterlik. Dit maak in wese nie saak watter roete ‘n mens met die interpretasie gaan nie, want selfs metafore het werklike referente. Die hel is dus ‘n plek waar God in sy toorn aanwesig is, en in sy genade afwesig. Dit is ‘n werklikheid van onbedenkbare leed.

    Johannes brei op dié temas uit in sy Openbaring en voeg nog twee belangrike elemente by. Een, dit is Jesus wat die mag het oor die doderyk (Openb. 1:18). Hy sluit dit oop vir die ongelowiges en Hy sluit dit toe vir die gelowiges. Twee, die doderyk (hades) word as sodanig uiteindelik in ‘n vuurpoel gegooi wat bedoel is vir almal wie se name nie in die boek van die lewe opgeskryf is nie (Openb. 20:13-14). Die hel/doderyk beland dus uiteindelik in hierdie finale vuurpoel. Dit is ook die plek waar die duiwel vir ewig sal brand (Openb. 20:20) saam met al die ongelowiges.

  • Avatar

    Sonja Slater

    |

    Maw Jode, Moslems en ander gaan almal hel toe?

  • Avatar

    Natascha

    |

    Baie baie dankie vir die breedvoerige verduideliking. Ek waardeer dit opreg.

  • Avatar

    Chris van Wyk

    |

    Mense wat nie Christus erken nie, is skepsels van God, maar nie kinders van God nie. Jy kan net ‘n kind van God word deur in Christus te glo (Joh. 1:12). Net hierdie kinders van God beërf die ewige lewe (Joh. 6:47).

  • Avatar

    Sonja Slater

    |

    Wat van ander gelowe wat nie Christus erken nie? Hulle is kinders van God maar nie Christene nie? Volgens wat ons glo gaan hulle dan nie Hemel toe nie omdat hulle nie in Christus glo nie?

  • Avatar

    Chris van Wyk

    |

    Hier is ‘n preek oor Handelinge 9:32-42 waarin ek onder andere oor Tabita die Woord van die Here gebring het:

    GOD SE GROOT DADE

    Handelinge is die verhaal van God se groot dade. Dit is die prentjie wat Lukas die dokter-skrywer by sy vriend Theofilus skilder. In die boek gebeur groot ingrypende dinge, soos Jesus se hemelvaart, die Gees se uitstorting, 3000 mense wat op een slag tot bekering kom, heidene wat begin glo en dan die grootste sending-uitreike ooit!

    God is besig om met groot kwashale die wêreldtoneel permanent te verander.

      God is met Petrus op pad.
      God is met sy kerk op pad.
      God is met die goeie boodskap van die opgestane Jesus Christus op pad na die hele wêreld toe.

    GOD GEE VIR GEWONE MENSE OM

    Binne hierdie Groot Storie is daar twee klein los storietjies wat eintlik nie so lekker inpas nie. Paulus, nog ‘n groot verhaal, is al op die toneel en eintlik is alles reg vir die groot geestelike beweging na die heidene … en dan glip daar hierdie twee storietjies in. Een van Eneas in Lidda en die ander van Tabita in Joppe. Eneas was verlam en het geruime tyd (8jr) gelê. Tabita was siek en het dood gegaan.

    In hierdie twee klein storietjies word vertel dat die lewendmakende krag van God – in die Naam van Jesus – mense opwek, gesond en lewend maak.

    En laat ons mekaar herinner:

    Oral langs ons pad is daar klein liggies – helder maar klein.
    Met ‘n doel – wat hulle waarskynlik self nie eens begryp nie.
    Ons sien ‘n Eneas; ‘n Tabita; later die leerlooier, Simon, en so kan ons hulle opnoem . . . ‘n Willem en Sannie en Marie en wie ook al oor God se pad mag kom.
    Lukas laat ons stop en hy laat ons kyk – na die onopsigtelike mense, doodgewone mense, wat God aanraak, vir wie Hy omgee, en dan gebruik op die groot en belangrike pad wat Hy vir die evangelie – die goeie boodskap van die opgestane Here Jesus, oopmaak.

    Dit is die duidelike boodskap van dié twee stories:

    Geen mens – hoe gering ook al – is vir God onbelangrik nie. God gee om vir gewone mense.

    GOD GEE OM VIR TABITA

    Tabita – ‘n gewone vrou daar eenkant in ‘n klein dorpie wat goed doen en besonder mededeelsaam is – sterf.

      Sy word ‘n dissipel (Gr mathetria) genoem wat baie insiggewend is. Dié vroulike vorm van die woord kom net hier in die Nuwe Testament voor. Die NAV het dit ongelukkig wegvertaal en haar net ‘n “gelowige vrou” genoem.
      Sy was ‘altyd besig’ , ‘besig om goed te doen’ ‘die armes te help’. ‘n Besige by in die goeie sin van die woord.
      Eneas was relatief onaktief vir agt jaar omdat hy verlam was; Tabita daarteenoor, was weer besonder aktief in haar diens aan die behoeftiges (:36).
      Ons kan ‘n groot groep hartseer mense hoor wat snikkend daar rondstaan terwyl hulle vertel van al die mooi kledingstukkies wat sy al vir hulle gemaak het.
      ‘n Mens lei af dat sy een van daardie besondere mense was wat oor grense heen barmhartigheid verleen het. Sy het ‘n Joodse en ‘n Griekse naam, Tabita en Dorkas, want beide die Jode en die Grieke het in haar barmhartigheid ‘n heenkome gevind. Sy het nie gediskrimineer tussen groepe nie. In haar barmhartigheid het sy dit reggekry om oor grense liefde te bewys. Dit is juis wat groot en belangrike mense baie keer nie kan regkry nie!

    In Tabita gee Lukas ons dus ‘n model van Christelike omgee in ‘n gemarginaliseerde gemeenskap. Weduwees en weeskinders was immers die mees kwesbare mense in die destydse gemeenskappe. Daar was geen regeringsondersteuning of welsynsorganisasies om hulle te hulp te kom nie. Tabita het omgegee en gehelp. Sy het goed gedoen.

    En haar vriende en diegene wat sy gehelp het, weet dit … en hoor dan van Petrus, ‘n gestuurde, ‘n apostel van Jesus Christus.

    Jesus, wat self mense uit die dood opgewek het.
    Jesus, wat self uit die dood opgestaan het.
    Jesus, wat aan sy dissipels die mag gegee het om mense uit die dood op te wek.
    Hulle vra vir Petrus om dringend na hulle te kom.

    En Petrus kom ook hier tot stilstand, by die gewone mense.
    En hy buig voor die God wat mag het oor die dood.
    Petrus praat in geloof – praat sy Meester na – en beveel die gestorwe Tabita – klein wildsbokkie – om op te staan.
    En die dood moet wyk – sy maak haar oë oop.
    Wat ons moet raaksien is dat dit God is wat Hom ontferm oor Tabita. Vir Hom is mense wat barmhartigheid verleen belangrik. Hy ontferm hom en gee die lewe aan Tabita – sodat sy kan voortgaan om ander te help en hulle lewe mooi te maak.

    Soos Heidi Petersen sê: “The widows would not be abandoned. God would not allow it.”[1]

    God is nie so besig met die groot werke van die geskiedenis dat hy die kleintjies wat aan hom behoort, vergeet nie. Die Here is nie net geïnteresseerd in die Paulusse, Petrusse en Johannesse nie – maar ook in die Tabita’s en vele anonieme goed-doeners in die wêreld. Inteendeel, ‘n mens kry die indruk dat Hy juis in die kleintjies geïnteresseerd is … dié wat gewone mooi goed doen.

    Ons is vandag te dikwels behep met die groot stories en die groot getalle, groot syfers en groot geld. Selfs in die kerk is ons geneig om die lewe en die sorg van God te soek en te sien in die groot dinge. Hier sien ons hoe ook die klein dingetjies van die alledaagse, die klein mense en die eenvoudige by die Here gereken word.

    Soos Tom Wright sê:

    “Do not belittle the ministry of stitching, sewing, knitting and generally providing for the needs of the larger community – especially at a time before anyone dreamed of mass-produced clothes. And do not forget to celebrate, as Luke does here, the fact that the apparently ordinary people are not ordinary to God, and that when we tell the story of the great sweep of God’s purposes in history there are, at every point, the Aeneases and the Dorcases who smile out of the page at us, like the robin in the garden, and remind us what it’s really all about. Luke is right to draw our eyes down to the small-scale and immediate, in case we should ever forget that these are the people who form the heart of the church, while the apostles and evangelists go about making important decisions, getting locked up, stoned on, shipwrecked, preaching great sermons, writing great letters, and generally being great and good all over the place.”

    GOD IS OP PAD NA DIE HELE WÊRELD.

    Petrus het ‘n ongelooflike ding hier gedoen – net soos Jesus ‘n dooie mens opgewek in God se naam.

    Maar Petrus weet dis nie sy vermoë wat die dood oorwin het nie – en NB gaan bly by Simon die leerlooier. Die uitgestotene van die dorp. Die onrein man wat met dooie diere werk!

    Hierdie laaste feit is betekenisvol. Leerlooiery het by die Jode tot een van die veragte beroepe behoort. ‘n Rabbi het gesê: “It is impossible for the world to do without tanners; but woe to him who is a tanner.” ‘n Jodin kon ‘n egskeiding aanvra as sy sou uitvind haar man is ‘n leerlooier.

    Dit was so, omdat ‘n mens in die beroep verplig was om die dooie liggaam van diere aan te raak en sodoende onrein geword het (Lev 11:39). ‘n Leerlooier se huis of werkplek moes daarom op die buitewyke van die dorp wees as gevolg van die stank wat met die leerwerk gepaard gegaan het. Dit is heel moontlik waarom Simon se huis by die see was (10:6).

    Petrus bly by so iemand oor. Dit was waarskynlik sy eerste tree op die pad om later saam met heidene te eet. Aangesien die leerlooiers deur die Grieke en Jode verag is, getuig hierdie optrede van Petrus reeds van die vryer opvattings wat hy gehuldig het teenoor sy volksgenote. Hiermee begin hy hom reeds van die vooroordele van sy volksgenote losmaak. Sy verblyf by Simon berei hom voor vir sy ontmoeting met Kornelius in hoofstuk 10.

    Daarvandaan doen Petrus nou God se werk.
    God is op pad met Sy groot sending en met een van Sy groot apostels – en die pad loop deur die huis van die wildsbokkie en die leerlooier!
    So werk God – en so mag ons nooit die geringstes verby gaan nie.
    So mag ek ook nooit dink my stinkende huis is nie goed genoeg nie.
    Dalk moet die apostel daar kom oorbly.

  • Avatar

    Chris van Wyk

    |

    Dit is nie ‘n stupid vraag nie. Eintlik is vrae per definisie nooit stupid nie, want dit bring die waarheid na vore. Solank dit eerlik en opreg is. Die antwoord is egter nie so eenvoudig nie. Wat beteken dat die vraag diep is!

    ‘n Christen is Bybelsgesproke iemand wat as ‘n gelowige en ‘n volgeling van Christus bekend is. Dit is wat die Griekse woord Christianos in die NT beteken. Louw en Nida beskryf die woord in hulle woordeboek as volg: “one who is identified as a believer in and follower of Christ.

    Dit word die eerste keer vir gelowiges gebruik in Antiogië (Hand. 11:26). Die gemeenskap sien in hulle lewe dat hulle met Christus identifiseer en Hom navolg. Dit is ook die hart van ons getuienis. Ons probeer mense oortuig om met Christus te identifiseer en Hom na te volg. Ons hoor bv. by koning Agrippa dat hy in Paulus se passievolle getuienis voor die hof probeer om hom te beweeg om ook ‘n Christianos te word, iemand wat glo in Christus en Hom navolg (Hand. 26:28). En Petrus moedig ons met dieselfde passie aan om as draers van die naam Christianos ons nie te skaam vir die lyding wat baie keer daarmee gepaard gaan nie, maar God te verheerlik as onbeskaamde Christianos.

    ‘n Christen is dus iemand wat in Christus glo en wat Hom volg. Hulle is dus ook kinders van God, want Johannes sê, elkeen wat glo dat Jesus die Christus is, is uit God gebore, is ‘n kind van God (1 Joh. 5:1). Dit is die groot liefde wat God aan ons bewys het dat almal wat in Christus glo kinders van God genoem kan word (1 Joh. 3:1).

    Daar behoort dus nooit enige verskil te wees tussen iemand wat ‘n Christen is – ‘n Christianos soos die Bybel dit sê, iemand wat in Christus glo en Hom navolg – en ‘n kind van God nie.

    Die werklikheid is egter dat baie mense vandag hulleself Christene noem, omdat hulle óf biologies deel van die kerk is, óf hulleself nog as deel van die Westerse Christendom samelewing beskou wat aanvanklik op Christelike waardes gebou is, maar daardie Christelike basis lankal versaak en verlaat het. Dit wil sê, mense wat nie waarlik glo in Christus en Hom navolg nie, maar so identifiseer omdat hulle deel is van die kerk of die Westerse samelewing. Sulke mense is egter nie kinders van God nie, al dra hulle wel nog in die oë van die wêreld, asook in hulle eie beoordeling van hulleself, die naam Christen.

    Paulus waarsku ons in sy tweede brief aan Timoteus teen mense wat die krag van Christus in hulle lewe verloën deur ‘n gedaante van godsaligheid te hê (‘n breë identifisering met Christenwees), maar met hulle lewens te bewys dat hulle nie Christene is nie deurdat hulle Christus nie meer volg nie. Dit is mense wat selfsugtig is, geldgierig, grootpraterig, aanmatigend, godslasterlik, ongehoorsaam aan hulle ouers, ondankbaar, goddeloos, ongevoelig, genadeloos, beledigend, sonder selfbeheersing, wreed, sonder liefde vir die goeie, verraaiers, roekeloos, hooghartig, lief vir plesier eerder as vir God, mense wat wel op die oog af godsdienstig lyk, maar wat die krag daarvan misken (2 Tim. 3:2-5). Van sulke mense moet ons wegbly, sê Paulus, terwyl hy ons waarsku dat dit swaar tye voorspel.

  • Avatar

    Rina

    |

    Goeiedag

    Ek wil graag meer inligting hê oor Tabita ( Dorkas )

    Dankie

    Rina

  • Avatar

    Natascha

    |

    More, more vertrou dat jul n wonderlike naweek agter die rug het. Chris, ek het n vraag?
    Kan jy asb. vir my se wat die verskil is tussen n Christen en n Kind van God? Ek weet ons almal is Christene, want ons glo tog is God, maar wat is die verskil?
    Dit klink dalk stupid, maar ek sal graag wil weet?

  • Avatar

    Chris van Wyk

    |

    Dankie! Ek leer natuurlik ook by die meesters van die eeue. Wonderlik om hierdie werk as ‘n lewensroeping te doen. Ek is my gemeente ewig dankbaar vir die geleentheid wat hulle my gun om ‘n deel van my tyd aan die Bybelskool af te staan.

  • Avatar

    Francois Conradie

    |

    Ds,
    Dankie vir die wonderlike reeks oor Levitikus. Dit is verbasend wat mens agterkom in ‘n Bybelboek geskryf is as jy deur ‘n kundige begelei word.
    Sterkte en seën.

  • Avatar

    Chris van Wyk

    |

    Dankie! ‘n Voorreg om só besig te wees met die Woord.

  • Avatar

    Francois Conradie

    |

    Ds van Wyk,
    U reeks oor Galasiërs is uit die boonste rakke. My verstaan van die vewantskap tussen net geloof, genade, die wet in die Nuwe Testament, sonde , vrygekoop, kindskap ens is op gehelder en dit help my op my pad van heiligmaking.
    Baie dankie
    FConradie , Kempton Park.
    Francois Conradie

%d bloggers like this: